توتەنشە جاعدايدا تۇرعىندار سۇرانىسىن وڭتايلاندىرۋ ماقساتىندا مەڭدىقارا اۋدانىندا تاعى ءبىر «كومەك الاڭى» ورتالىعى اشىلدى. مۇندا تۇرعىندار قاجەت قىزمەتتى تۇرلەرىن ء«بىر تەرەزە» ارقىلى الا الادى. فرونت-كەڭسەنىڭ اشىلۋ راسىمىنە قوستاناي وبلىسىنىڭ اكىمى ارحيمەد مۇحامبەتوۆ قاتىستى. «كومەك الاڭى» زاماناۋي بايلانىس جانە كوممۋنيكاتسيا قۇرالدارىمەن قامتىلعان. سونداي-اق ازاماتتاردى «وپەن سپەيس» فورماتىندا قابىلدايتىن ارنايى بولمە بار.
ايماق باسشىسىنىڭ ايتۋىنشا, مۇنداي فرونت-كەڭسەلەر بۇگىنگە دەيىن قوستاناي, رۋدنىي, توبىل قالالارى مەن بەيىمبەت مايلين, امانگەلدى, اۋليەكول, دەنيسوۆ, جانگەلدين, ناۋرىزىم اۋداندارىندا اشىلعان. «كومەك الاڭدارى» قازىر ءتيىمدى ءارى ساپالى, جەدەل جۇمىس اتقارۋدا. «كومەك الاڭى» ورتالىقتارى جىل اياعىنا دەيىن وبلىستىڭ بارلىق اۋداندارىندا اشىلماق.
قوستاناي وبلىسى
