وبلىستىڭ ونەركاسىپ ءوندىرىسىنىڭ 70 پروتسەنتتەن استامى تاۋ-كەن سالاسىنىڭ ۇلەسىندە. وسى جىلدىڭ ءبىرىنشى توقسانىندا 1,2 ملن توننا مۇناي ءوندىرىلدى. وتكەن جىلمەن سالىستىرعاندا 253 مىڭ تونناعا از. بۇل جوسپارلى قىسقارتۋ. وبەكتيۆتى سەبەپتەردىڭ سالدارىنان جىل سايىن مۇناي ءوندىرۋ تومەندەيدى. سول سەبەپتى مۇناي ءوندىرۋشى كومپانيالاردىڭ الدىندا ءوندىرۋ كولەمىنىڭ جوسپارلى كورسەتكىشتەرىن ۇستاپ تۇرۋ جانە جىلدىڭ سوڭىنا قاراي كورسەتكىشتى كەمىندە 4,4 ملن تونناعا جەتكىزۋ مەجەسى تۇر. بۇل ءوز كەزەگىندە وبلىس تۇرعىندارىنىڭ الەۋمەتتىك جاعدايىنا دا اسەر ەتەدى.
ءوڭىر باسشىسى مۇناي ءوندىرۋشى كومپانيالاردىڭ باسشىلارىن جۇمىس ورىندارىن ساقتاۋ جانە توتەنشە جاعداي كەزىندە سانيتارلىق شارالاردى ەسكەرۋ قاجەتتىگىن ايتتى.
بۇگىنگى كۇنى بۇكىل الەمدە كوروناۆيرۋس پاندەمياسىنىڭ تارالۋىنا بايلانىستى ەنەرگيا تاسىمالداۋشىلارعا دەگەن سۇرانىس پەن جاھاندىق ەكونوميكالىق رەتسەسسيا اياسىندا كومىرسۋتەگى باعاسى دا ەداۋىر تومەندەگەن. سونداي-اق, ينۆەستيتسيالار كولەمىنىڭ دە كۇرت تومەندەۋى بايقالادى. قۇرىلىس جانە بارلاۋ جۇمىستارى سالالارىنا قارجى قىسقارتىلدى. مۇنىڭ ءبارى سەرۆيستىك كومپانيالارعا كەرى اسەرىن تيگىزىپ وتىر. سوندىقتان مۇناي باعاسى تۇراقتانعان كەزدە جانە كارانتين ۋاقىتى اياقتالعاننان كەيىن سەرۆيستىك قىزمەت كورسەتەتىن مەكەمەلەردىڭ جۇمىس اۋقىمىن, ونىڭ ىشىندە گەولوگيالىق بارلاۋ جۇمىستارىنىڭ كولەمىن ۇلعايتۋ مۇمكىندىگىن قاراستىرۋ قاجەت, - دەدى وبلىس اكىمى.
مۇناي-گاز سالاسىنداعى كۇردەلى جاعدايدى ەسكەرە وتىرىپ, وسى سالاداعى كومپانيالاردىڭ قارجىلىق جاعدايىنا كەشەندى تالداۋ جۇرگىزىلدى. سونىڭ ناتيجەسىندە وبلىس اكىمدىگى تاراپىنان بلينوۆسكوە جانە قونىس كەن ورىندارىن رەنتابەلدىلىگى تومەن ساناتقا قوسۋ ءۇشىن ءتيىستى مينيسترلىكتەرگە ۇسىنىستار جولداندى.
سونداي-اق كەزدەسۋدە وتاندىق تاۋار وندىرۋشىلەردى قولداۋ جانە بيزنەستىڭ الەۋمەتتىك جاۋاپكەرشىلىگى ماسەلەلەرى دە ايتىلدى.
كەزدەسۋ بارىسىندا «قۋاتاملونمۇناي «بك» جشس, «سنپس «ايدان مۇناي» اق, «ساۋتس ويل» جشس, «قازاتومونەركاسىپ «ۇاك» اق باسشىلارى اتقارىلىپ جاتقان جۇمىستار مەن الداعى جوسپارلارى تۋرالى ايتتى.
اتاپ ءوتۋ كەرەك, توتەنشە جاعداي كەزىندە جەر قويناۋىن پايلادانۋشى كومپانيالار جۇمىستى توقتاتپاي, ۆاحتالىق اۋىسىمىن 28 كۇنگە دەيىن ۇزارتىپ, 16 مىڭنان استام جۇمىس ورنى مەن جالاقىسىن ساقتاپ قالدى.
سونىمەن قاتار جۇمىس ورىندارىندا زالالسىزداندىرۋ جانە مەديتسينالىق قورعاۋ شارالارى كۇشەيتىلدى.
