وبلىس اكىمى ومىرزاق شوكەەۆ قۇرىلىسشىلارمەن كەزدەسۋدە بارلىق تۇرعىن ۇيلەردىڭ سىرتقى كورىنىسىنىڭ بىرىڭعاي بولۋىنا باسا نازار اۋدارۋدى مىندەتتەدى. ياعني تۇركىستانداعى تۇرعىن ۇيلەردىڭ باسىم بولىگى اشىق ءتۇستى تراۆەرتين مەن اق ءمارمار تاسپەن قاپتالادى. «جۇمىس اۋقىمى وتە ۇلكەن. ونى جاقسى تۇسىنەمىز. الايدا قارجى دەر كەزىندە بولىنگەن سوڭ جۇمىس توقتاماۋ كەرەك. جۇمىس كەستەسىنەن قالىس قالۋعا مۇلدەم بولمايدى. قاجەت بولعان قۇرىلىس نىساندارىنا قوسىمشا كۇش تارتىلدى. ونىڭ ۇستىنە كەيبىر قۇرىلىس نىساندارىندا تاۋلىك بويى جۇمىس ىستەۋگە كوشۋگە ابدەن بولادى», دەدى ومىرزاق شوكەەۆ.
سونداي-اق وبلىس اكىمى مەردىگەر كومپانيا جاۋاپتىلارىنا جۇمىس قارقىنىن جىلدامداتۋدى تاپسىردى. سالىنىپ جاتقان نىسانداردى ارالاپ, ساپاسىنا باسا نازار اۋداردى. قۇرىلىسقا اتسالىسىپ جاتقان شەتەلدىك كومپانيا جەتەكشىلەرىمەن كەزدەسىپ, جۇمىس بارىسىنداعى بىرقاتار وزگەرىستەردى تالقىلادى.
بۇگىنگى تاڭدا باسقارمالار, دەپارتامەنتتەر عيماراتتارى, كونگرەسس ورتالىعىندا قۇرىلىس اياقتالىپ كەلەدى. ىشكى ارلەۋ, ينجەنەرلىك جەلىلەرىن مونتاجداۋ جانە سىرتقى اباتتاندىرۋ جۇمىستارى ەكى اۋىسىمدا ءجۇرىپ جاتىر. نۇر-سۇلتان الاڭىندا قۇرىلىس جۇمىستارى تولىق اياقتالىپ, اباتتاندىرۋ جۇمىستارى جۇرگىزىلۋدە. وقۋشىلار سارايى, ستاديون, باسسەينى بار سپورت كەشەنى دە اياقتالۋعا جاقىن.
