وبلىستىق فيليال ديرەكتورىنىڭ مىندەتىن اتقارۋشى جانتاس ءشارىپوۆتىڭ ايتۋىنشا, جىل باسىنان بەرى «اقتوبە-اتىراۋ-استراحان» اۆتوموبيل جولىن قايتا جاڭعىرتۋ, «اتىراۋ-ورال» جانە «دوسسور-قۇلسارى-بەينەۋ باعىتىنداعى اۆتوموبيل جولدارىن كۇتىپ-ۇستاۋ, اعىمداعى جوندەۋ, سونداي-اق, كەپىلدىكتە تۇرعان نىسانداردا 181 رەت تەكسەرىس ۇيىمداستىرىلعان.
–ناتيجەسىندە 27 اقاۋ انىقتالدى. ماسەلەن, «اتىراۋ-ورال» جول كۇتىپ-ۇستاۋدا, ياعني, جارىلعان بولىكتەرىنە شايىر قۇيۋ كەزىندە كەمشىلىكتەر تابىلدى. سونداي-اق, «اتىراۋ-ورال» جانە «اقتوبە-اتىراۋ-استراحان» باعىتىنداعى كەپىلدىكتە تۇرعان جولدى تۇنگى ۋاقىتتا جارىقتاندىرۋ, «دوسسور-قۇلسارى» جولىنداعى ورتاشا جوندەۋ جۇمىستارىندا دا كەمشىلىكتىڭ بارى بەلگىلى بولدى. اتالعان اقاۋلاردى ۋاقىتىلى جويۋ ءۇشىن تاپسىرىس بەرۋشى مەكەمە مەن مەردىگەرلەرگە حات جولداندى, - دەيدى ج.ءشارىپوۆ.
ورتالىق ماماندارى بيىلعى ءبىرىنشى توقساندا جولداردا جۇرگىزىلگەن تەكسەرىستە 101 رەت سىناما العان. زەرتحانادا قولدانىستاعى قيىرشىقتاس, قۇم, شايىر, مالتا تاس ارالاس قۇمدى قوسپا, تسەمەنتتى بەتون, بيتۋم, ۇساق قالدىقتاردىڭ ساپاسىن تەكسەرۋ بارىسىندا سايكەسسىزدىكتىڭ ءبىر دەرەگىن انىقتالعان.
بۇل – «دوسسور-قۇلسارى» جولىنداعى ورتاشا جوندەۋ جۇمىستارىنا پايدالانىلعان ماتەريال. اتىراۋ ايماعىنداعى جولدارعا قاجەتتى ماتەريالدار پگس, قيىرشىقتاس, بيتۋم كورشىلەس اقتوبە, ماڭعىستاۋ وبلىستارىنان اكەلىنەدى. مامانداردىڭ ايتۋىنشا, وڭىردەگى رەسپۋبليكالىق جولداردىڭ ساپاسى وبلىستىق دەڭگەيدەگى جولدارمەن سالىستىرعاندا الدەقايدا جوعارى بولىپ وتىر.
