ايماقتار • 28 ءساۋىر، 2020

قوستاناي وبلىسى: كارانتين تالاپتارى ەداۋىر جەڭىلدەدى

181 رەت كورسەتىلدى

بۇل تۋرالى ءوڭىر تۇرعىندارىنا وبلىس اكىمى ءوزىنىڭ ينستاگرامم پاراقشاسى ارقىلى حابارلادى. ايماقتا  3 كۇن بويى COVID-19 جۇقتىرۋدىڭ بىردە-ءبىر وقيعاسى انىقتالماعانىن اتاپ وتكەن ارحيمەد مۇحامبەتوۆ وبلىس تۇرعىندارىنا  وڭىردە قابىلدانعان قاتاڭ شەكتەۋلەرگە تۇسىنىستىكپەن قاراپ،  جاۋاپكەرشىلىك تانىتقانى ءۇشىن العىس ءبىلدىردى.

«قۇرمەتتى قوستانايلىقتار!

كەشە قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆ ەلدەگى قازىرگى جاعداي تۋرالى مالىمدەمە جاسادى. مەملەكەت باسشىسى كارانتيننىڭ شەكتەۋ شارالارىن كەزەڭ-كەزەڭمەن جەڭىلدەتۋدى تاپسىردى.

وبلىستا قالىپتاسقان جاعدايدى ەسكەرە وتىرىپ، كارانتين رەجىمىن ءۇش كەزەڭ ارقىلى جەڭىلدەتۋدى ۇيىمداستىرۋ تۋرالى شەشىم قابىلداندى.

بۇگىنگى كۇننەن باستاپ قارجى جانە ساقتاندىرۋ سەكتورىنىڭ، اۆتوجۋ، تۇرمىستىق جانە ۇيىمداستىرۋ تەحنيكاسىن جوندەۋ شەبەرحانالارىنىڭ جۇمىسى قايتا باستالدى. ب

ساعات 9.00-دەن 20.00-گە دەيىن اۋلا الاڭدارىندا سەرۋەندەۋگە رۇقسات ەتىلدى. الايدا قاۋىپسىزدىڭك شارالارى ساقتالادى. اۋماقتاردى دەزينفەكتسيالاۋ جۇمىسى جالعاسا بەرەدى.

وبلىستاعى ەپيدەميولوگيالىق جاعدايعا بايلانىستى الداعى ۋاقىتتا جۇمىسىن باستايتىن ۇيىمداردىڭ قوسىمشا تىزبەسى انىقتالاتىن بولادى.

قوستانايلىقتاردى الاڭداتاتىن قازىرگى ماسەلە ساياجايعا شىعۋ بولىپ تۇر. بۇل ماسەلەگە قاتىستى شەشىمدى ءار وڭىردەگى جەرگىلىكتى اكىم باسقاراتىن جەدەل شتاب قابىلدايدى.

مىسالى، رۋدنىي جانە ليساكوۆ قالالارىندا ساياجاي ۋچاسكەلەرىنە بارۋعا رۇقسات ەتىلگەن، بىراق بىرقاتار شەكتەۋلەر بار. قوستانايدا بۇگىننەن باستاپ جەكە اۆتوكولىكپەن 6.00-دەن 8.30-عا دەيىن ساياجايعا بارۋعا جانە 18.00-دەن 20.00-گە دەيىن ساياجايدان قايتۋعا رۇقسات ەتىلدى.

1 مامىردان باستاپ تج كەزەڭىندە ساياجاي مارشرۋتتارى جۇمىس ىستەي باستايدى، جول ءجۇرۋ تەگىن بولادى.

جەڭىلدىك ەنگىزۋ  - سانيتارلىق نورمالاردى ۇمىتۋ دەگەندى بىلدىرمەيدى. وسىنى دۇرىس تۇسىنۋلەرىڭىزدى سۇرايمىن. تاياۋ ۋاقىتتا قايتا اشىلاتىن ۇيىمدارعا قىزمەتكەرلەردىڭ قاۋىپسىزدىگى ءۇشىن دە، كليەنتتەر ءۇشىن دە ۇلكەن جاۋاپكەرشىلىك جۇكتەلەدى.

قۇرمەتتى جەرلەستەر، سىزدەردەن ءارى قاراي بارلىق قاجەتتى سانيتارلىق نورمالاردى ساقتاۋدى سۇرايمىن. ءوزىڭىزدى جانە جاقىندارىڭىزدى قورعاڭىزدار» دەدى ايماق باسشىسى.

 

 قوستاناي وبلىسى

 

 

 

 

سوڭعى جاڭالىقتار

ۇقساس جاڭالىقتار