ايماقتار • 27 ءساۋىر، 2020

قوستاناي: ءۇي كارانتينىندە وتىرعاندار موبيلدىك قوسىمشا ارقىلى باقىلانادى

38 رەت كورسەتىلدى

ۇيىندە وقشاۋلانعان وسىنشاما تۇرعىندى ۇنەمى باقىلاۋدا ۇستاۋ وڭاي شارۋا ەمەس. دەگەنمەن «SMART Qostanay» ماماندارى بۇل ماسەلەنىڭ وڭتايلى شەشىمىن تاپقان سىڭايلى.

قازىر ۇيدە وتىرعاندار «مەن ۇيدەگى كارانتيندەمىن»  دەپ اتالاتىن موبيلدىك قوسىمشا ارقىلى باقىلانادى. قوسىمشانى 21 ساۋىردەن بەرى 370 ادام ورناتقان. تۇرعىنداردى قوسىمشا ارقىلى باقىلاۋمەن قوستاناي مەديتسينالىق كوللەدجى بازاسىندا قۇرىلعان call-ورتالىق اينالىسىپ جاتىر. قالاداعى ەمحانالاردىڭ مەديتسينالىق قىزمەتكەرلەرىنەن جاساقتالعان 22 مامان تىزىمدەگى بارلىق ازاماتقا كۇن سايىن قوڭىراۋ شالىپ، جالپى جاعدايى تۋرالى ءبىلىپ وتىرادى.

«كۇن سايىن 1100 ادامعا قوڭىراۋ سوعىلادى. ويتكەنى قالعان 18-گە تولماعان 170-تەي جەتكىنشەكتەن الدەنە تالاپ ەتۋگە قۇقىعىمىز جوق. سونداي-اق، 50 جاستان اسقان 300-دەن استامدى دا جالپى تىزىمنەن الىپ تاستادىق. كوبىنىڭ سمارتفون ۇستامايتىنى ەسكەرىلدى. سونىڭ وزىندە، ءبىز حابارلاسقان 170-تەي تۇرعىن بايلانىس اياسىنان تىس بولادى. مۇنداي نومىرلەردى پوليتسياعا جولدايمىز. ورتالىققا ءنومىر قاتە بەرىلدى مە، الدە قاساقانا جالتارا ما – ونىمەن ءتارتىپ ساقشىلارى شۇعىلدانادى»، - دەيدى وبلىستىق دەنساۋلىق ساقتاۋ باسقارماسىنىڭ ءبولىم باسشىسى ءانۋار ەدريسوۆ.

بۇل قوسىمشانىڭ جەتىلدىرۋدى قاجەت ەتەتىن تۇستارى دا جوق ەمەس. ماسەلەن، مۇنى كوشىرىپ العان ادام اۆتوماتتى تۇردە GPS-باقىلاۋعا الىنادى دا، ەگەر اسۇيدەن بالكونعا شىقساڭىز، «ۇيدەن ۇزاماڭىز» دەگەن ەسكەرتۋ كەلەتىن كورىنەدى. سوندىقتان باسقارما باسشىلىعى قوسىمشانى جاساۋشى «SMART Qostanay» ماماندارىنا GPS-باقىلاۋ اياسىن 150-200 مەترگە دەيىن كەڭەيتۋگە ۇسىنىس جاسادى.

بۇل پيلوتتىق جوبا ەڭ اۋەلى نۇر-سۇلتان قالاسىندا ىسكە قوسىلعان بولاتىن.

 

 قوستاناي وبلىسى

سوڭعى جاڭالىقتار

تۇركىستان جاسىل قالاعا اينالۋدا

وڭتۇستىك قازاقستان • كەشە

ۇقساس جاڭالىقتار