21 ءساۋىر كۇنى كۇندىزگى ساعات 16:15 شاماسىندا ىرعىز اۋداندىق جەدەل جاردەم كەزەكشىلىك بولىمشەسىنە ءبىر بالانىڭ سۋعا اعىپ بارا جاتقانى تۋرالى حابارلاما كەلىپ تۇسەدى. بىراق, وقيعا ورنىنا قۇتقارۋشىلار كەلگەنشە كورشىسى 5 جاسار بالانى سۋدان شىعارىپ الىپ, كومەك كورسەتەدى. وقيعا ورنىنا لەزدە جەتكەن 19 جاستاعى نۇرجان اعىسى قاتتى سۋدان بالانى امان الىپ قالدى.
- كوشە جاقتا كولىكپەن كەلە جاتقان بولاتىنمىن. وزەن جاعاسىنان ءوتىپ بارا جاتقاندا قول بۇلعاپ شاقىرىپ, كومەك سۇراعان داۋىستى ەستىدىم. وقيعا ورنىنا جەتكەن كەزدە كورشىمنىڭ 5 جاسار نەمەرە ۇلى باتىپ بارا جاتقانىن بايقادىم. بار ويىم بالانى امان الىپ قالۋ بولدى. مەن ونى قۇتقارۋعا كەلگەندە بالانى جاعادان 7 مەتر, تەرەڭدىگى 2 مەترگە دەيىن الىپ كەتكەن. بالانىڭ اعىپ بارا جاتقان جاعىنا قاراي الدىنان شىعىپ ۇستاپ قالۋ ءۇشىن, بارىمدى سالىپ جۇزە باستادىم. وسىلايشا بالانى قۇتقارىپ, وعان العاشقى مەديتسينالىق كومەك كورسەتتىم. جاساندى تىنىس الۋ ءادىسىن جاسادىم. كەۋدە تۇسىنان باسىپ, دەم الۋىنا كومەكتەستىم. باستىسى بالا امان!, - دەيدى نۇرجان.
كوپ كەشىكپەي قۇتقارۋشىلار جاساعى دا, جەدەل جاردەم دە جەتكەن. ءجاسوسپىرىمدى سۋدان الىپ شىققاننان سوڭ دارىگەرلەر ونى بىردەن ىرعىز اۋداندىق ورتالىق اۋرۋحاناسىنا جەتكىزگەن.
ءوز كەزەگىندە بالالارىن امان الىپ قالعان ستۋدەنتكە ءجاسوسپىرىمنىڭ اتا-اناسى شىنايى العىستارىن ايتىپ, ريزاشىلىقتارىن بىلدىرگەن.
ايتا كەتەيىك, راشيد نۇرجان - ىرعىز اۋدانى, ىرعىز اۋىلىنىڭ تۋماسى. ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ تەحنيكالىق فاكۋلتەتىنىڭ «قۇرىلىس» ماماندىعىنىڭ 2-كۋرسىندا وقيدى.
- ءوز ارەكەتىمدى ەرەكشە ەرلىك دەپ ويلامايمىن. مەنىڭ ورنىمدا بولعان كەز كەلگەن ادام وسىلاي جاسار ەدى, - دەيدى ول.
ونىڭ ەرلىگى نازاردان تىس قالماق ەمەس. ىرعىز اۋدانىنىڭ باسشىلىعى جاس جىگىتكە باتىلدىعى مەن وجەتتىگى ءۇشىن العىس ايتتى. اتالعان وقۋ ورداسىنىڭ باسشىلىعى دا نۇرجاننىڭ ەرلىگى وسكەلەڭ ۇرپاققا ۇلگى-ونەگە بولۋى ءتيىس ەكەنىن ايتىپ, باتىردى ماراپاتتاۋدى ۇيعارىپ وتىر.
