ونىڭ ايتۋىنشا, باستاپقىدا اۆتورلىق قۇقىقتى ءوز اتىنا تىركەۋدى كوزدەگەن. الايدا, بۇعان ەلداردا ەلەكتروندى تسيفرلى قولتاڭبانىڭ بولماۋى كەدەرگى كەلتىرگەن. سول سەبەپتەن, اۆتورلىق قۇقىقتى اناسى الماگۇل قۇرماشەۆانىڭ اتىنا تىركەۋىنە تۋرا كەلدى.
– اۆتورلىق قۇقىقتى تىركەتۋ ءۇشىن حالىققا قىزمەت كورسەتۋ ورتالىعىنا حابارلاستىم. ونداعىلار ەلەكتروندى تسيفرلى قولتاڭبانىڭ قاجەتتىگىن ايتتى. بىراق, ءدال قازىر ماعان ەلەكتروندى تسيفرلى قولتاڭبانى الۋ مۇمكىن بولماي تۇر. سەبەبى, قازىر بۇل ورتالىق قاشىقتان جۇمىس ىستەۋ رەجيمىنە كوشكەن. ال, قولتاڭبانى الۋ ءۇشىن كامەرا ارقىلى جەكە كۋالىكتى, ءوزىڭدى كورسەتۋ كەرەك. ۇيدەگى كومپيۋتەرىمدە كامەرا بولماعاندىقتان, ازىرگە اۆتورلىق قۇقىقتى انامنىڭ اتىنا تىركەۋگە ۇيعارىم جاسادىم. كەيىن كارانتين مەرزىمى اياقتالىپ, ءبارى قالپىنا كەلگەن كەزدە ءوز اتىما قايتا تىركەتۋدى كوزدەپ وتىرمىن, - دەيدى جاس ونەرتاپقىش ەلدار قۇرماشەۆ.
ءساۋىردىڭ 15-دە ەلدار قۇرماشەۆتىڭ KazMessage ءموبيلدى قوسىمشاسىن ىسكە قوسقانىنا 1 اي بولدى. ول 15 ناۋرىزدا ءموبيلدى قوسىمشانى Playmarket-كە ەنگىزگەن ەدى. سودان بەرى KazMessage-ءنى 2500 ادام جۇكتەپ العان. ونىڭ 2400-ءى – قازاقستاندىق. قازىر جاڭا قوسىمشانى 1500 ادام بەلسەندى قولدانىپ ءجۇر.
– ستاتيستيكانى كۇن سايىن قاراپ وتىرمىن. اسىرەسە, ءوز وتانداستارىمنىڭ قىزىعۋشىلىق تانىتقانى قۋانتادى. جاڭا ءموبيلدى قوسىمشانى قولداناتىنداردىڭ اراسىندا قىرعىزستان مەن وزبەكستاننىڭ, ومان سۇلتاناتى مەن گەرمانيا, يوردانيا ەلدەرىنىڭ ازاماتتارى دا بار, - دەيدى اتىراۋلىق 11-سىنىپ وقۋشىسى ەلدار قۇرماشەۆ.
