«ايدىن جىردىڭ قوس اققۋى» اتانعان ەكى اقىننىڭ اراسىنداعى دوستىق ءالى ۇزىلگەن جوق. سوڭعى جىلدارى اسەلحان ءاسياسىن ىزدەپ قوستانايعا بىرنەشە رەت كەلىپ كەتتى. ءاسيا اپامىز دا ارنەنى سەبەپ ەتىپ, قولى قالت ەتكەندە وڭتۇستىككە بارىپ, كامشات اپاسىنا ۇقسايتىن قۇرداسىنىڭ قۇرىمداعان شايىن ءىشىپ, ساعىنىش قۇمارىن تارقاتىپ كەلەدى.
«وتىرار» ەنتسيكلوپەدياسىندا اسەلحاننىڭ ايتىس ونەرىنە قوسقان ۇلگى-ونەگەسى تۋرالى: «اقىن اپا ايتىس الەمىندە الىپ سامۇرىققا ۇقسايتىن, قاناتىمەن داۋىل تۇرعىزىپ, ەكپىنىمەن نايزاعاي ويناتاتىن, ەلىنىڭ ەڭ سۇيىكتى پەرزەنتىنە اينالعان. رەسپۋبليكامىزعا تانىمال بەلگىلى اقىنداردىڭ بارىمەن كەزدەسىپ, ايماقتىق, رەسپۋبليكالىق, حالىقارالىق كوپتەگەن ءدۇبىرلى ايتىستاردا نامىستى قولدان بەرمەگەن, وت اۋىزدى وراق ءتىلدى, ارقالى اقىن» - دەپ جازىلىپتى. بۇل انىقتاما ءاسيا اپامىزعا دا قۇيىپ قويعانداي شاق ەكەنىنە شاك كەلتىرمەڭىز.
ءاسيا – ايتىسكەر اقىن, تالىمگەر ۇستاز. 2000-شى جىلى احمەت بايتۇرسىن ۇلى اتىنداعى قوستاناي مەملەكەتتىك ۋنيۆەرسيتەتى جانىنان «ونەر ستۋدياسىن» اشتى. بۇل ورتالىق بۇگىندە جاستار شىعارماشىلىعىن شىڭدايتىن ناعىز ونەر مەكتەبىنە اينالعان. ستۋديادا تالاپكەر اقىندارمەن قاتار, ونەرلى جاستار ءتالىم الادى. ء«بادريساپا» بي توبى, ۆوكال سىنىبى, دومبىراشىلار ءانسامبلى دە وسىندا. بۇگىندە ەسىمدەرى ەلىمىزگە تانىلعان ءبىرسىپىرا تالانتتى جاس وسى «ونەر ستۋدياسىنىڭ» تۇلەكتەرى.
سىرت قاراعان كىسىگە سۋىقتاۋ كورىنەتىن ءاسيا اپامىزدىڭ ىشكى جان دۇنيەسىنە ءۇڭىلىپ كورگەن ادام كەرىم ءبىر جىلىلىق پەن نازىكتىكتى, ءتۇزۋ ادامعا ءتان بەرىك ۇستانىمدى, ەلگە جاناشىر ازاماتتىقتى بىردەن اڭعارادى. اقىننىڭ بۇل قاسيەتى قاعازعا ادىپتەلگەن جازبا ولەڭدەرىندە كوزگە ۇرىپ تۇر.
نە بiتiردiم, تىندىردىم, ءسiرا, نەنi,
سىن ساداققا iلگەلi ەل مىنا مەنى,
اق تولقىنعا وراپ اپ جىر تەڭiزi,
گۇلدەتكەلi ءسوزiمدi قۇلا بەلi?
...تورەلەردىڭ شىقسام دا جيi ەسiنەن,
ءتول ونەردىڭ كۇش الام يەسىنەن.
توبەدەگi قامشىسىن ۇيiرگەندە,
تومەندەگi ەل قورعايدى كيەسiمەن.
ءاسيا اپامىزدىڭ ەسكەرىلمەي, ەلەنباي جاتقان ءبىر دۇنيەسى وسى جازبا ولەڭدەرى. بىردە ءالى كىتاپ بولا قويماعان ءبىراز ولەڭدەرىن بولماي سۇراپ ەدىم. ەلەكتروندى نۇسقادا بەردى. ارى-بەرى كوشىپ جۇرگەندە جوعالتىپ الدىم. قايتا سۇراۋعا ءدات بولمادى.
«ونەر ستۋدياسىنان» قاناتتانعان ونەرپازدىڭ ءبىرى – ەلگە اقىندىعىمەن قوسا ءانشى-سازگەرلىگىمەن تانىمال بولعان مارعۇلان وسپانوۆ. مەكتەپ قابىرعاسىندا ءجۇرىپ وبلىستىق ايتىستارعا قاتىسىپ جۇرگەندە مارعۇلانعا حالىق اقىنى سارى دومالاق دەپ ات قويىپ العان. بۇگىندە ءبىراز تۋىندىسى ۇلكەن ساحنالاردا ورىندالىپ جۇرگەن سازگەر ۇستازىنىڭ بىرنەشە ولەڭىنە ءان جازدى.
جۋرناليستەر ۇستاحاناسى اتانعان ايگىلى «قوستاناي» تەلەارناسىندا جۇمىس ىستەپ جۇرگەندە ءاسيا اپامىزدىڭ ءومىرى مەن شىعارماشىلىعىن «جانازىق» باعدارلاماسىنا ارقاۋ ەتكەن ەدىك. ءوز ارحيۆىمدە قالعان بەينەماتەريالدان قيىپ الىپ, اقىننىڭ سوزىنە جازىلعان ادەمى ءاندى كوپشىلىك نازارىنا ۇسىنۋدى ءجون كوردىك.
قوستاناي
