COVID-19 پاندەمياسى ەلدەگى ءىرى كاسىپورىندارعا دا كەرى ىقپال ەتىپ وتىرعانى جاسىرىن ەمەس. سوندىقتان كارانتين مەرزىمىنىڭ ۇزارعانىنا قاراماستان, سسكوب ءوز ءوندىرىسىن جاقسارتۋ ءۇشىن جاڭا جوبالاردى قولعا العان. ەكى ەيفەل مۇناراسى سىيىپ كەتەتىن سارىباي كەنىشىن دە الداعى ۋاقىتتا ۇلكەن وزگەرىستەر كۇتىپ تۇر. كەنىشتىڭ شىعىس بەتكەيىن جاڭارتۋ كەن تيەۋ قويماسىن قايتا قالپىنا كەلتىرۋگە جانە تاۋ جىنىستارىنان شىعارىلاتىن ىشكى كەنىش ءۇيىندىسىن كەڭەيتۋگە مۇمكىندىك بەرىپ وتىر. ياعني ەندى بۇرىنعىداي جىنىستى تىم جوعارىدا جاتقان سىرتقى ۇيىندىلەرگە تاسۋدىڭ قاجەتى جوق. بۇل ايماقتىڭ ەكولوگياسىنا وڭ اسەر ەتەدى جانە كاسىپورىننىڭ كەن ساقتاۋعا, شىعارۋعا جانە تاسىمالداۋعا كەتەتىن شىعىندارىن ازايتادى.
– جوبانىڭ ۇتىمدى تۇستارى وتە كوپ. قازىر جوبالىق ءۇيىندىنىڭ بيىكتىگى 30 مەترگە الاساردى. بۇل بىزگە نە بەرەدى؟ جوعارىعا كوتەرىلەتىن كولىك جولىنىڭ جالپى بيىكتىگى كەنىش يگەرۋ ورنىنا دەيىن ەسەپتەگەندە 120-130 مەترگە تومەندەيدى. تاۋ جىنىسىن تاسىمالداۋ قاشىقتىعى شامامەن ءبىر شاقىرىمعا قىسقارادى. ناتيجەسىندە تاسىمالداۋعا كەتەتىن شىعىن ازايادى.
سونداي-اق, 320 مەتر تەرەڭدىكتە ورنالاسقان كەن قويماسى قايتا قالپىنا كەلتىرىلەدى. بۇرىن كەندى قابىلداۋ ايماعى قويمانىڭ سولتۇستىك قاپتالىندا بولعان, ەندى ول وڭتۇستىك قاپتالعا اۋىستىرىلدى. ناتيجەسىندە كەنىشتى ءوندىرۋ اياقتالعانعا دەيىن 1,2 ملرد تەڭگە ۇنەمدەي وتىرىپ, ىشكى ءۇيىندىنى شىعارۋ قۋاتى كەڭەيەدى. بۇگىنگى تاڭدا قويمانىڭ كولەمى 30 مىڭ تەكشە مەتر. بۇل ءبىر مەزگىلدە 100-گە جۋىق پويىزعا كەن تيەۋگە مۇمكىندىك بەرەدى. كەنىشتىڭ بۇكىل شىعىس بەتكەيىن -105 مەتر كوكجيەكتە قايتا قالپىنا كەلتىرۋ كەن قورىن 44 ميلليون تونناعا ارتتىرادى. بۇل كەنىشتىڭ قىزمەت ەتۋ مەرزىمىنىڭ ۇلعايۋىنا دا اسەر ەتەدى, – دەدى سارىباي كەنىشىنىڭ تەحنيكالىق ءبولىم باستىعى الەكساندر كورول.
قوستاناي وبلىسى
