مىسالى, Oracle كومپانياسىندا جۇمىس ىستەيتىن 136 مىڭ ادام قازىر YouTube پەن Zoom قىزمەتتەرىن ءساتتى پايدالانىپ, جۇمىستارىن بۇرىنعى قارقىنمەن جالعاستىرۋدا. اتاپ ايتساق, ۆيدەوكونفەرەنتسيا ارقىلى ماماندار ءوزارا پىكىر الماسۋ نەمەسە جينالىس سياقتى وفيستە اتقارىلاتىن جۇمىستارىن وڭاي جۇزەگە اسىترۋدا. كومپانيا ديرەكتورلار كەڭەسىنىڭ توراعاسى لارري ەلليسون جۇمىس ىستەۋدىڭ وسى فورماتىنا ءوزىنىڭ ريزا ەكەنىن دە ايتقان.
تەحنيكالىق قولداۋ كورسەتەتىن SAP Rimini Stree كومپانياسىنىڭ باسشىسى سەت راۆين ەسەبىنشە بارلىق ماماننىڭ وفيستە وتىرعانى كەرەك ەمەس ەكەن. سول سەبەپتى دە ولار وفيس ءۇشىن جالعا الىنعان عيماراتتارىنىڭ جارتىسىن بوساتپاقشى بولىپ وتىر. باسشىنىڭ ويىنشا, ۇيدەن جالىققاندا نەمەسە اسا ءبىر قاتتى قاجەتتىلىك بولعاندا عانا كەلىپ جۇمىس ىستەۋگە بولاتىن كونفەرەنتس-زالداردى قالدىرۋ قاجەت. قازىر كومپانيانىڭ ءار ەلدە 30 ۇلكەن ءوفيسى بار كورىنەدى.
Okta كومپانياسىنىڭ باس ديرەكتورى تودد ماككيننون پاندەميا الدىندا وفيستەر سانىن كوبەيتپەكشى بولىپتى. بىراق قاشىقتان جۇمىس ىستەۋ ءوزىنىڭ وڭ ناتيجەسىن بەرگەن سوڭ بۇل ويىنان باس تارتاتىنىن ايتىپ وتىر. بۇل كومپانيادا 2200 ادام الەمنىڭ ءار تۇكپىرىندەگى 12 وفيستە جۇمىس ىستەگەن.
وسىلايشا, پاندەميادان سوڭ بيزنەستى ۇيىمداستىرۋدىڭ جاڭا ءتۇرى تۋاتىن سياقتى. ونىڭ تيىمدىلىگى كوپ بولاتىنىنا ەش ءشۇبا بولماسى انىق. وسى رەتتە وتاندىق كاسىپكەرلەر مەن ءىرى بيزنەس وكىلدەرى دە وسىعان نازار اۋدارادى دەگەن سەنىمدەمىز.
