پاندەمياعا قارسى ءىس-قيمىل كەزەڭىندە كورشىلەس ەلدەرگە ەكونوميكالىق قولداۋ كورسەتۋ ماقساتىندا قازاقستان پرەزيدەنتى قاسىم-جومارت توقاەۆ قىرعىزستان مەن تاجىكستانعا گۋمانيتارلىق كومەك رەتىندە جالپى قۇنى 3 ملن اقش دوللارىنان اسا سوماعا ارقايسىنا 5 مىڭ توننادان قازاقستاندىق ۇن جەتكىزۋ تۋرالى شەشىم قابىلدادى. شەشىم حالىقتى ازىق-ت ۇلىكپەن ۇزدىكسىز قامتاماسىز ەتۋ ماقساتىندا قىرعىز جانە تاجىك تاراپتارىنىڭ رەسمي وتىنىشتەرىنە بايلانىستى قابىلداندى.
مەملەكەت باسشىسى قاسىم-جومارت توقاەۆپەن تەلەفون ارقىلى سويلەسۋ بارىسىندا تاجىكستان پرەزيدەنتى ەمومالي راحمون تاجىك حالقىنا وسى قيىن كەزەڭدە قولداۋ ءبىلدىرىپ, گۋمانيتارلىق كومەك كورسەتكەنى ءۇشىن العىسىن جەتكىزدى. سونداي-اق ول تاجىكستان ازاماتتارىن وتانىنا جەتكىزۋگە ىقپال ەتكەنى جانە قازاقستان اۋماعى ارقىلى جۇكتەردى تاسىمالداۋعا كومەكتەسكەنى ءۇشىن ريزاشىلىعىن ءبىلدىردى.
سونىمەن قاتار قازاقستان جانە قىرعىزستان سىرتقى ىستەر مينيسترلەرى مۇحتار تىلەۋبەردى مەن چينگيز ايداربەكوۆ تەلەفون ارقىلى سويلەسىپ, قىرعىز تاراپى قازاقستانعا گۋمانيتارلىق كومەك كورسەتۋ تۋرالى شەشىم قابىلداعانى ءۇشىن شىن جۇرەكتەن العىس ءبىلدىردى.
جاقىن ارادا اتالعان جۇكتەر قىرعىزستان مەن تاجىكستاندا جەتكىزىلەدى.
قازاقستان حالىقارالىق قوعامداستىقتىڭ جاۋاپتى مۇشەسى رەتىندە جاھاندىق كوروناۆيرۋس پاندەمياسى جاعدايىندا بەيجاي قالماي سەرىكتەس ەلدەرگە قاجەتتى گۋمانيتارلىق كومەك كورسەتۋدى جالعاستىرىپ جاتىر. بيىل اقپاندا COVID-19 ىندەتىنىڭ ءورشىپ تۇرعان كەزىندە قازاقستان العاشقىلاردىڭ ءبىرى بولىپ قىتايعا مەديتسينالىق قورعاۋ قۇرالدارىن بىرنەشە رەت جەتكىزۋ ارقىلى ارىپتەستىك قولداۋ كورسەتتى.
جالپى گۋمانيتارلىق كومەك كورسەتۋ – قازاقستاننىڭ سىرتقى ساياساتىنىڭ ماڭىزدى باعىتتارىنىڭ ءبىرى. وتكەن جىلدارى قازاقستان انتيگۋا مەن باربۋدا, اۋعانستان, بانگلادەش, قىرعىزستان, مولدوۆا, موڭعوليا, ميانما, پاكىستان, سەربيا, سيريا, تۇركيا, جاپونيا جانە تاعى باسقا ەلدەرگە ءارتۇرلى كومەك جىبەردى.
