پوليتسەيدى قورلاعان جانە كۇش قولدانعان ەر ادامدار جاۋاپقا تارتىلدى. ولاردىڭ ارەكەتتەرى قر قىلمىستىق كودەكسىنىڭ 380-بابى (بيلىك وكىلىنە قاتىستى كۇش قولدانۋ) جانە 378-بابى -(بيلىك وكىلىن قورلاۋ) بويىنشا تىركەلدى.
«19 ناۋرىزدان باستاپ الماتىدا كارانتين رەجيمى ەنگىزىلدى. كورونوۆيرۋستىق ينفەكتسيامەن كۇرەس جونىندەگى جەدەل شتابتىڭ الگوريتمىنە سايكەس, ازاماتتارعا ەرەكشە جاعدايلاردا عانا ۇيلەرىنەن شىعۋعا بولادى: دارىحاناعا, دۇكەنگە نەمەسە مەديتسينالىق مەكەمەلەرگە جەدەل بارۋ كەرەك بولسا. ازاماتتاردىڭ توتەنشە جانە كارانتيندىك تالاپتاردى ساقتاۋىن باقىلاۋدى ىشكى ىستەر ورگاندارى جۇزەگە اسىرادى. وسىعان بايلانىستى, پوليتسيا قىزمەتكەرلەرى, ۇلتتىق ۇلان, قورعانىس مينيسترلىگى جانە قۇقىق قورعاۋ ورگاندارىنىڭ جوعارى وقۋ ورىندارىنىڭ كۋرسانتتارىنان قالاداعى ءتارتىپتى قامتاماسىز ەتەتىن جاياۋ پاترۋلدەر قۇرىلدى. گوگول مەن قايىربەكوۆ كوشەلەرىنىڭ قيىلىسىنداعى پاترۋلدىك جاساقتاردىڭ ءبىرى ءبىر توپ جاستاردى بايقاپ قالدى. ولار ونلاين رەجيمدە فيتنەس – جاتتىعۋلاردىڭ ءتۇسىرىلىمىن جاساپ جاتتى. ۋچاسكەلىك ينسپەكتور كەلىپ, كارانتين كەزەڭىندە قاجەت جاعداي بولماسا ۇيدەن شىعۋعا تىيىم سالىناتىندىعىن ايتىپ ەسكەرتۋ جاسادى. ونىڭ ۇستىنە, بۇل ازاماتتاردىڭ قاسىندا كىشكەنتاي بالا بولدى, جانە ولار ونىڭ دەنساۋلىعىنا قاۋىپ ءتوندىردى», – دەدى الماتى قالالىق پوليتسيا دەپارتامەنتىنىڭ باسشىسى قانات تايمەردەنوۆ.
جاستار پوليتسيا قىزمەتكەرىنىڭ ەسكەرتۋىنە اگرەسسيۆتى جاۋاپ بەردى: ولار مەملەكەتتىك قىزمەتكەردىڭ زاڭدى تالاپتارىنا باعىنباي, وعان قارسى كۇش قولداندى. نارەستەنىڭ اناسى ءوزىنىڭ زاڭسىز ارەكەتتەرىمەن جانجالدى جاعداي تۋعىزا باستادى. توتەنشە جاعدايدى بۇزعانى ءۇشىن ول كەيىنىرەك جاۋاپقا تارتىلاتىن بولادى.
«جاساعان ارەكەتتەرى ءۇشىن بۇل ازاماتتار زاڭ الدىندا قاتاڭ تۇردە جاۋاپ بەرەدى. قۇقىق بۇزۋشىلار ءوز ارەكەتتەرىمەن بيلىك وكىلىنىڭ زاڭدى تالابىن جانە ەل بيلىگى مەن تۇتاس قوعامنىڭ, ءاربىر قازاقستاندىقتىڭ ءومىرى مەن دەنساۋلىعىن ساقتاۋ ماقساتىندا قابىلداعان شارالارىن ەلەمەدى. ۋچاسكەلىك پوليتسيا ينسپەكتورىنا قارسى كۇش قولدانعان ەر ادامدارعا قاتىستى سوتقا دەيىنگى تەرگەۋ باستالدى. ۇستالعاندار ۋاقىتشا ۇستاۋ يزولياتورىنا قامالدى. بيلىكتىڭ زاڭدى تالاپتارىنا باعىنباعان جاعدايدا مۇنداي فاكتىلەر قاتاڭ تۇردە جازالاناتىن بولادى. مەن ازاماتتاردى كارانتين رەجيمىن قاتاڭ ساقتاۋعا, سونداي-اق, وزدەرىن جانە باسقالاردى جۇقتىرۋ قاۋپىنە ۇشىراتپاۋعا شاقىرامىن», – دەدى تايمەردەنوۆ.
