باستاپقىدا فەستيۆالدى 18-22 ناۋرىز ارالىعىندا ياكۋتسك قالاسىندا تولىققاندى فورماتتا وتكىزۋ جوسپارلانعان بولاتىن. الايدا كوروناۆيرۋس ىندەتىنە بايلانىستى ونى «جابىقرەجيمدە» وتكىزىپ, تەك قازىلار القاسى ءۇشىن قاتىسۋشى فيلمدەردىڭ كورسەتىلىمى ۇيىمداستىرىلىپ, جەڭىمپازداردى جاريالاۋ تۋرالى شەشىم قابىلداندى. رەسەيلىك كينورەجيسسەر بوريس حلەبنيكوۆ («كوكتەبەل», «اريتميا») توراعالىق ەتكەن فەستيۆالدىڭ قازىلار القاسى قۇرامىنا ەسىمى ءماشھۇر رەجيسسەرلەر ەدۋارد نوۆيكوۆپەن ەللا مانجەەۆا باستاعان كينو ماماندارى كىردى.
«جەڭىمپاز فيلم «اتبايدىڭ شايقاسى» – بۇل اركەلكى كەيىپكەردىڭ تاڭقالارلىق وقيعاسى. باسىندا ول جاعىمسىز بوپ كورىنگەنىمەن, سوڭىنا قاراي ونىڭ قايعىلى ءومىرىن تۇسىنە, سەزىنە باستايسىڭ. قاراپايىم وقيعا وتە كەرەمەت تىلمەن ايتىلعان. بۇل وقيعانىڭ ايتىلۋ مانەرىنىڭ وزىندە ءبىر سيقىر جاتىر. «اتبايدىڭ شايقاسى» ءسوزسىز باس جۇلدەگە لايىق تۋىندى», - دەپ باعا بەردى قازىلار القاسىنىڭ توراعاسى بوريس حلەبنيكوۆ.
«Short Brothers» جانە «Arizona Productions»كومپانيالارىنىڭ قاتىسۋىمەن «Sunny Production»كومپانياسى جاساعان كارتينانىڭ الەمدىك پرەمەراسى وتكەن جىلى حححV ۆارشاۆا حالىقارالىق كينوفەستيۆالىنىڭ نەگىزگى كونكۋرستىق باعدارلاماسىنا وتكەن بولاتىن. ءفيلمنىڭ باس پروديۋسەرى اكتريسا اسەل سادۋاقاسوۆا ايتۋلى فيلمدە باستى رولدەردىڭ ءبىرىن ورىنداپ شىقتى.
ەستەرىڭىزگە سالا كەتەيىك, «اتبايدىڭ شايقاسى» فيلمىندە جەڭىمپازى الدىن الا بەلگىلى بولاتىن ارالاس جەكپە-جەك بويىنشا تۋرنيرگە قاتىسۋدى شەشەتىن كوشە بۇزاقىسى اتبايدىڭ (اكتەر دانيار الشينوۆ) ءومىرى جايلى باياندالادى. سوعان قاراماستان باس كەيىپكەر جەكپە-جەكتە جەڭىستى قولدان بەرمەۋگە بەل بۋادى. سەبەبى ول ءۇشىن بۇل جەڭىس – جاڭا ءومىردى باستاۋ, ۇلكەن سپورتقا قايتا ورالۋ جانە ءوزىنىڭ سۇيىكتىسى ايدانى (دينارا باقتىباەۆا) قايتارۋ مۇمكىندىگى. اتبايدىڭ رينگ بويىنشا باستى قارسىلاسى, اتاقتى رافاەلدىڭ ءرولىن بەلگىلى اكتەر سانجار ءمادي سومدادى.
