بۇل تۋرالى تۇركىستان وبلىسى بويىنشا توتەنشە جاعدايلار دەپارتامەنتى باستىعىنىڭ ورىنباسارى پودپولكوۆنيك ەرىك سارىباەۆ وڭىرلىك كوممۋنيكاتسيالار قىزمەتىندە وتكەن بريفينگتە مالىمدەدى. جازاتايىم وقيعالاردىڭ بارلىعى دەرلىك ازاماتتاردىڭ سۋ جاعالاۋلارىندا قاۋىپسىزدىك ەرەجەلەرىنە سالعىرت قاراۋىنىڭ سەبەبىنەن ورىن العان.
«سۋعا باتقانداردىڭ 3-ەۋى جاس بالا, 2-ەۋى ەرەسەك. ورىن العان جاعدايلاردىڭ نەگىزگى سەبەپتەرى – بالالاردى سۋاتتار جانىندا ۇلكەندەردىڭ قاراۋىنسىز قالدىرۋ جانە ابايسىزدان سۋعا قۇلاۋ, جۇزە بىلمەۋ. وسىعان بايلانىستى تۇرعىنداردى ساقتىق شارالارىن ۇستانۋعا شاقىراتىن تۇسىندىرمە جۇمىستارى جۇرگىزىلىپ كەلەدى. مىسالى, وقۋشىلاردىڭ قاتىسۋىمەن بولاتىن سۋداعى جازاتايىم وقيعالاردىڭ الدىن الۋ ماقساتىندا ءبىلىم بولىمدەرىمەن بىرلەسىپ, ونلاين ساباقتاردا, ۇكىمەتتىك ەمەس ۇيىمدار وكىلدەرىنە الەۋمەتتىك جەلىلەر ارقىلى ءتيىستى اقپاراتتار, سونداي-اق اۋدان قالا اكىمدىكتەرىنىڭ الەۋمەتتىك جەلىلەردەگى پاراقشالارى ارقىلى ەسكەرتۋ سيپاتىنداعى ماقالالار جاريالانۋدا», – دەدى ەرىك تەمىرحان ۇلى.
وڭىردە ورمان ءورتى دە وزەكتى ماسەلە. وبلىس اۋماعىندا جىل باسىنان بەرى 14 دالا ءورتى تىركەلگەن. ورمان شارۋاشىلىعىنا كەلتىرىلگەن ماتەريالدىق شىعىننىڭ جالپى سومماسى شامامەن 802,2 مىڭ تەڭگە.
