فۋتبولدان قازاقستان قۇراماسى 2014 جىلعى الەم چەمپيوناتى ىرىكتەۋ ءتۋرنيرى اياسىندا فارەر ارالدارى كومانداسىمەن كەزدەسىپ, 2:1 ەسەبىمەن جەڭىسكە جەتتى. بۇل – ءبىزدىڭ قۇرامانىڭ ىرىكتەۋ ءتۋرنيرى اياسىنداعى العاشقى جەڭىسى بولسا, جىل باسىنان بەرگى ەكىنشى جەڭىسى.
فۋتبولدان قازاقستان قۇراماسى 2014 جىلعى الەم چەمپيوناتى ىرىكتەۋ ءتۋرنيرى اياسىندا فارەر ارالدارى كومانداسىمەن كەزدەسىپ, 2:1 ەسەبىمەن جەڭىسكە جەتتى. بۇل – ءبىزدىڭ قۇرامانىڭ ىرىكتەۋ ءتۋرنيرى اياسىنداعى العاشقى جەڭىسى بولسا, جىل باسىنان بەرگى ەكىنشى جەڭىسى.
بۇل كەزدەسۋ اسا تارتىستى جانە قىزىقتى ءوتتى دەي المايمىز. ءبىزدىڭ قۇراما ويىندى بەلسەندى باستاپ, ءبىرىنشى تايمدا قارسىلاستار قاقپاسىنا بىرنەشە قاۋىپتى جاعداي جاساعانىمەن, فارەر ارالدارىنا ءبىر گولدىڭ ءوزىن سوعا الماي كەتتى. ءبىرىنشى تايمدا ەسەپتى, كەرىسىنشە, قارسىلاستار اشتى. كەزدەسۋدىڭ 22 مينۋتىندا فروۋدي بەنيامينسەن ءبىزدىڭ قورعانىستاعى قاتەلىكتى ۇتىمدى پايدالانىپ, سيدەلنيكوۆتىڭ توركوز قاقپاسىنا گولدى توعىتتى. مۇنداي جاعدايدى ەشكىم كۇتپەگەنى بەلگىلى. وسى كەزدە ستاديونعا جينالعان جانكۇيەرلەر ۋلاپ-شۋلاپ, قۇرامانىڭ ويىنىنا نارازىلىقتارىن ءبىلدىرىپ جاتتى. وسىدان كەيىن مانادان بەرى الاقانداي ارالدىڭ جىگىتتەرىن قالپاقپەن وڭاي ۇرىپ الامىز دەگەن وتانداستارىمىز ەستەرىن جيناپ, قايتا شابۋىلداۋعا كوشتى. بىراق, ويىننىڭ ءبىرىنشى جارتىسىندا تابلوداعى ەسەپ سول كۇيىندە وزگەرىسسىز قالدى.
ال ەكىنشى تايمدا سان-مارينولىق باس تورەشى بىزگە گولدى سىيلادى دەسە بولادى. ويىن ەندى عانا باستالعاندا فارەر ارالدارىنىڭ قورعاۋشىلارى ءوز ايىپ الاڭىندا حيجنيچەنكونى قۇلاتتى. باس تورەشى بىردەن 11 مەترلىك ايىپ نۇكتەسىن نۇسقادى. وسى ءساتتى ءبىزدىڭ جىگىتتەر پايدالانىپ, ەسەپتى تەڭەستىردى. 11 مەترلىك ايىپ دوبىن مەكتەپتى «التىن بەلگىمەن» بىتىرگەن قايرات نۇرداۋلەتوۆ ءساتتى ورىندادى.
ايتقانداي, ماتچتان سوڭ فارەر ارالدارىنىڭ باس جاتتىقتىرۋشىسى كومانداسىنىڭ جەڭىلىسىنە باس تورەشىنى ايىپتاپ, پەنالتيدىڭ بولماعانىن ايتتى. ال ويىنعا قايتا كەلسەك, ەسەپ تەڭەسكەن سوڭ, باس جاتتىقتىرۋشى بەرانەك شابۋىل شەبىن كۇشەيتۋ ءۇشىن الاڭعا فينونچەنكونى شىعاردى. ول بىردەن ويىنعا ارالاسىپ, قارسىلاستار قاقپاسىنا مازا بەرمەدى. سونداي كەزدىڭ بىرىندە, ياعني ويىننىڭ 65 مينۋتىندا ول ەكىنشى گولدىڭ اۆتورى اتاندى. وعان پاستى «شاحتەردىڭ» تاعى ءبىر شابۋىلشىسى سەرگەي حيجنيچەنكو بەردى. ءسويتىپ, ءبىزدىڭ قۇراما «شاحتەردىڭ» وسى دۋەتىنىڭ ارقاسىندا جەڭىسكە جەتتى دەۋگە دە بولادى.
بۇل ماتچتا كوپتەن بەرى ۇلتتىق قۇراماعا شاقىرىلماي كەلگەن «توبىلدىڭ» شابۋىلشىسى نۇربول جۇماسقاليەۆ ونەر كورسەتتى. بىردەن ايتۋ كەرەك, جامان ويناعان جوق. قايتا ونىڭ ورنىنا الاڭعا شىققان سەرگەي وستاپەنكونىڭ ويىنى كوڭىلىمىزدەن شىقپادى. حيجنيچەنكو بولسا, جارادى. ول تاعى فينونچەنكو ەكەۋى ءبىر-ءبىرىمەن بىردەن ءتۇسىنىسە الاتىندارىن كورسەتتى.
ەندى 10 قىركۇيەكتە شۆەتسيا قۇراماسىن قابىلدايمىز. ولار استاناعا الدىنا زلاتان يبراگيموۆيچتى سالىپ كەلە جاتىر. بۇل كەزدەسۋدىڭ ءجونى ءتىپتەن بولەك بولاتىنى ءسوزسىز. شۆەتسيا, قالاي دەگەنمەن, دانيا كورولدىگىنىڭ اۆتونومياسى سانالاتىن فارەر ارالدارى ەمەس.
داستان كەنجالين,
«ەگەمەن قازاقستان».
––––––––––––––
سۋرەتتەردى تۇسىرگەن
ورىنباي بالمۇرات.
