تۇرعىنداردىڭ جاۋاپكەرشىلىگىن ارتتىرۋ ماقساتىندا كولىكتەرىندەگى ارنايى بەلگىنى قوسىپ, تىزىلە كوشەلەرمەن ءجۇرىپ وتكەن مەديتسينا قىزمەتكەرلەرى «ەگەر بىزدە قالعىڭىز كەلمەسە, ۇيدە وتىرىڭىز» دەگەن ۇراندى ۇستانعان.
توتەنشە جاعداي كەزىندەگى تالاپتاردان جاقسى حاباردار قالا تۇرعىندارى مەديتسينا قىزمەتكەرلەرىنىڭ دابىلىنا تۇسىنىستىكپەن قاراۋدا.
"بۇل ەلدىڭ اماندىعى ءۇشىن جاسالىنىپ جاتقان شارا. ۇيدەن شىقپاي, قاۋىپسىزدىكتى قاداعالاساق ىندەتتى اۋىزدىقتايتىنىمىز ءسوزسىز. سول سەبەپتى بۇگىن ارىپتەستەرىمىزبەن بىرگە قالا تۇرعىندارىنا ءتۇسىندىرۋ شاراسىن وتكىزۋدى ءجون كوردىك", دەيدى تۇركىستان وبلىستىق جەدەل مەديتسينالىق جاردەم ستانساسى باس دارىگەرىنىڭ مەتوديكالىق ۇيىمداستىرۋ ءىسى بويىنشا ورىنباسارى تاحير ابديەۆ.
وبلىس بويىنشا 200-گە جۋىق مەديتسينالىق جەدەل جاردەم بريگاداسى قىزمەت كورسەدى. ءاربىر شاقىرتۋعا دەر كەزىندە جەتىپ, ادام ومىرىنە اراشا ءتۇسۋ اق حالاتتى ابزال جانداردىڭ بورىشى. كەشكى فلەشموب ارقىلى مەديتسينا قىزمەتكەرلەرى قاۋىپتى ىندەتكە شالدىقپاۋ ءاربىر ازاماتتىڭ تارتىپكە باعىنۋىنا تىكەلەي بايلانىستى ەكەنىن تۇرعىنداردىڭ ەسىنە سالدى.
تۇركىستان وبلىسى
