اقپان ايىندا تاعايىندالعان جامبىل وبلىسى پوليتسيا دەپارتامەنتىنىڭ باسشىسى جانات سۇلەيمەنوۆ ەكى اي ۋاقىتتا دەپارتامەنتپەن اتقارىلعان جۇمىستاردى قورىتىندىلادى. جەدەل كەڭەستى پد باسشىسى ج.سۇلەيمەنوۆ ءوزى جۇرگىزىپ, كۇن تارتىبىندەگى قارالاتىن سۇراقتاردى اتاپ ءوتتى. ەكى ايدىڭ قورىتىندىسى بويىنشا وبلىس اۋماعىندا قىلمىس سانى وتكەن جىلدىڭ وسى كەزەڭىمەن سالىستىرعاندا 27,5%-عا ازايعان. اتقارىلىپ جاتقان ءىس-شارالاردىڭ ناتيجەسىندە بىرقاتار نەگىزگى باعىتتار بويىنشا وڭ كورسەتكىشتەرگە قول جەتكىزىلگەن.
اتاپ ايتقاندا, اسا اۋىر قىلمىستاردىڭ اشىلۋى 18%-عا; كىسى ءولتىرۋ قىلمىسىنىڭ اشىلۋى 88,9%-دان 100%-عا; كىسى ولتىرۋگە وقتالۋ قىلمىسىنىڭ اشىلۋى 100%-عا جوعارىلاعان. سونداي-اق, قاراقشىلىق قىلمىستارىنىڭ تىركەلۋى 20%-عا تومەندەپ, اشىلۋى 100%-عا, بۇزاقىلىق قىلمىستارىنىڭ اشىلۋى 50%-دان 100%-عا ارتقان. جالپى ۇرلىقتاردىڭ اشىلۋ كورسەتكىشى 17,1%-عا (75%-دان 92,1%-عا), ونىڭ ىشىندە پاتەر ۇرلىعىن اشۋ 19%-عا (66,7%-دان 85,7%-عا) جوعارىلاعان. قوعامدىق ورىنداردا جاسالعان قىلمىستار سانى 29%-عا تومەندەگەن. جۇرگىزىلگەن پروفيلاكتيكالىق جۇمىستاردىڭ ناتيجەسىندە كامەلەتكە تولماعاندارمەن جاسالىنعان قىلمىستاردىڭ 53,8%-عا, ماس كۇيىندە جاسالىنعان قىلمىستاردىڭ 41,9%-عا تومەندەۋىنە قول جەتكىزىلدى. وبلىس بويىنشا اۋىر قىلمىستاردىڭ اشىلۋ پايىزى 79,2-ءنى قۇرادى.
كەڭەس بارىسىندا دەپارتامەنت باسشىسى قالالىق جانە اۋداندىق پوليتسيا بولىمدەرىنىڭ باسشىلارىن تىڭدادى. ج.سۇلەيمەنوۆ ستاتيستيكا ءۇشىن ەمەس, حالىق ءۇشىن جۇمىس جاساۋ كەرەكتىگىن جەتكىزدى. سونىمەن قاتار, پد باسشىسى كەيبىر باسشىلارعا مەملەكەتتىك ءتىلدى مەڭگەرۋ كەرەكتىگى تۋرالى ەسكەرتپە ايتتى.
سونداي-اق, جەكە قۇرام اراسىندا جەمقورلىق دەرەكتەرى انىقتالسا, قىزمەتكەرمەن قاتار باسشىسىنىڭ جۇمىستان كەتەتىنى ءبىر بولەك, ونى جاۋاپقا تارتۋ تۋرالى تىلگە تيەك ەتتى. جەدەل كەڭەس بارىسىندا ج.سۇلەيمەنوۆ ءار اۋداندىق پوليتسيا بولىمدەرىنىڭ باسشىلارى ايماقتىڭ جاعدايىن تولىق مەڭگەرمەيتىنى تۋرالى دا توقتالدى. جالپى قورىتىندىلاي كەلە, اتقارىلىپ جاتقان جۇمىستار مەن وبلىستاعى جەدەل جاعدايعا وڭ باعا بەرگەن پد باسشىسى ءالى دە كەزدەسەتىن كوپتەگەن كەمشىلىكتى جويۋ بويىنشا ناقتى تاپسىرمالار بەردى.
