جۇلدە قورى 400 مىڭ تەڭگە. ماڭعىستاۋ وبلىسىنىڭ دەنە شىنىقتىرۋ جانە سپورت باسقارماسى, شاحمات فەدەراتسياسى, سونداي-اق «دەبيۋت» شاحمات مەكتەبىنىڭ تەحنيكالىق قولداۋىمەن وڭىردە 2020 جىلدىڭ 19-ساۋىرىندە CHESS.COM. سايتىنىڭ Mangystau Chess كلۋبىندا «كاسپي پاتشاسى» ونلاين چەمپيونات وتەدى دەپ جوسپارلانۋدا. قاتىسۋعا نيەتتى وبلىس تۇرعىندارى ءۇشىن ەشقانداي شەكتەۋ جوق. تەك قانا اتالعان سايتتا ءوز اككاۋنتىن اشىپ, ءوتىنىم تولتىرسا بولعانى.
- جالپى جارىس 11 تۋردان تۇرادى. بليتس رەجيمدە 3 مينۋت 2 سەكۋندتان قوسىلىپ ءار ءجۇرىس ءۇشىن قوسىلادى. ارنايى وسى جوبا ءۇشىن CHESS.COM. سايتى تاڭدالدى. ويتكەنى, اتالعان سايتتىڭ اۋقىمى كەڭ. بۇل سايىس شاحماتشىلار ءۇشىن ۇلكەن مۇمكىندىك دەپ ەسەپتەيمىن. وبلىس تۇرعىندارى يۋتۋب جەلىسى ارقىلى تىكەلەي بايلانىستا تاماشالاي الادى, - دەدى «دەبيۋت» شاحمات مەكتەبىنىڭ باسشىسى انۆار شايحىموۆ.
باسەكەدە باق سىنايمىن دەۋشىلەر ءۇشىن ءوتىنىم قابىلداۋ 18-ءساۋىر كۇنى توقتايدى. چەمپيوناتتا الماتى, پاۆلودار, قاراعاندى قالالارىنان «حالىقارالىق دارەجەدەگى سپورت شەبەرلەرى» ونلاين قازىلىق ەتەتىن بولادى. جارىس قورىتىندىسى 2 كۇننەن كەيىن جاريالانىپ, قاتىسۋشالار اقشالاي سىيلىقتارمەن ماراپاتتالادى.
- بۇگىنگى كۇنگە دەيىن 100-گە جۋىق قاتىسۋشى تىركەلگەن. الدا مۇنداي چەمپيوناتتىڭ قالالىق, وبلىستىق كەزەڭدەرىن وتكىزۋ جوسپاردا, - دەيدى ۇيىمداستىرۋشىلار.
ماڭعىستاۋ وبلىسى
