رۋحانيات • 08 ءساۋىر، 2020

تەاتر ءار ۇيدە: «استانا وپەرا» تىلدەسۋگە شاقىرادى

وپەرا جانە بالەت ونەرىنىڭ جانكۇيەرلەرى ۇيلەرىنەن شىقپاي-اق وزدەرى ءۇشىن «استانا وپەرانىڭ» ينتەرنەت-جوبالارىن تاڭداپ ءارى ولاردىڭ تولىققاندى قاتىسۋشىلارى بولا الادى.

نازەركە جۇماباي

ەلوردالىق ساحنانىڭ تانىمال ارتىستەرى «ساۋالىڭدى جولدا» ايدارىندا اڭگىمە-دۇكەن قۇرۋعا شاقىرادى. اتالعان جوبا 8 ساۋىردەن باستاپ قولجەتىمدى بولماق، وعان كەز كەلگەن نيەت بىلدىرگەن ادام قاتىسا الادى. جۇلدىزبەن تىكەلەي ەفيردە جۇزدەسۋ مۇمكىندىگىنە يە بولۋ ءۇشىن، «استانا وپەرانىڭ» ينستاگرام الەۋمەتتىك جەلىسىنە كىرىپ، تەاتر پاراقشاسىندا سۇيىكتى ورىنداۋشىڭىزعا ساۋال قالدىرۋ قاجەت. كارانتين كەزەڭىندە تالعات مۇساباەۆ، گاۋحار ۋسينا، باقتيار ادامجان، سالتانات احمەتوۆا جانە ت.ب. وزدەرىنىڭ شىعارماشىلىق سىرلارىمەن بولىسپەك. ەسكە سالار بولساق، بۇدان بۇرىن اتالمىش جوبا بەينەفورماتتا جۇرگىزىلگەن بولاتىن، ال ەندى سوليستەرمەن ناقتى ۋاقىت رەجيمىندە جاندى سۇحبات قۇرۋ مۇمكىن بولىپ وتىر.

ۇلتتىق وپەرا ونەرىن قۇپ كورەتىندەر ءۇشىن اباي قۇنانباەۆتىڭ 175 جىلدىعىناارنالعان جوبا ازىرلەندى. «استانا وپەرانىڭ» ايگىلى انشىلەرى جاقىن ارادا وسىناۋ اڭىزعا اينالعان وپەرادان ۇزىندىلەردى ءوز ۇيلەرىنەن شىرقاماق.

بۇدان بولەك، ۇلتتىق توپتاماعا م.تولەباەۆتىڭ ء«بىرجان – سارا» وپەراسىنان «مەرەكە ءبيى» ەنگەن، ول قازاقستاننىڭ ەڭبەك سىڭىرگەن قايراتكەرى ابزال ءمۇحيتديننىڭ جەتەكشىلىگىمەن «استانا وپەرا» تەاترىنىڭ حور جانە سيمفونيالىق وركەستر ارتىستەرىنىڭ ورىندالۋىندا شىرقالادى.

«وپەرا جانە بالەت جۇلدىزدارىنىڭ باسقا ءومىرى» جوباسى «استانا وپەرا» ارتىستەرىنىڭ تەاتردان تىس ۋاقىتتا نەمەن اينالىساتىنىن كورسەتەدى. وندا سىزدەر بۇكىل الەمگە تانىمال ءبيشى باقتيار ادامجان ءوزىنىڭ بالالارىنا تۇندە قانداي ەرتەگى وقىپ بەرەتىنىن ءبىلىپ، وپەرا جۇلدىزى مايرا مۇحامەدقىزىنان ءدامدى تاعام ازىرلەۋ ءتاسىلىن الا الاسىزدار. سونداي-اق سىزدەردى باسقا دا توسىن سىيلار كۇتۋدە. ەندەشە، تەاترمەن بىرگە تىنىستايىق، مارتەبەلى كورەرمەن!

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز