قوعام • 08 ءساۋىر، 2020

باۋىرجان بايبەك ەلباسى باستاماسىنا قولداۋ بىلدىرگەن مەتسەناتتارعا العىس ايتتى

46 رەتكورسەتىلدى

ەلباسىنىڭ تاپسىرماسى بويىنشا، مەملەكەت باسشىسىنىڭ باستاماسىمەن قولعا الىنعان ء«بىز بىرگەمىز!» اكتسياسى اياسىندا Nur Otan پارتياسى مەن تۇڭعىش پرەزيدەنت قورى كوروناۆيرۋسپەن كۇرەس جاعدايىندا تۇرعىنداردىڭ الەۋمەتتىك ءالسىز توپتارىن قولداۋعا قارجى بولگەن ەدى. مەتسەناتتار، كاسىپكەرلەر مەن بەلسەندى ازاماتتاردىڭ قولداۋىنىڭ ارقاسىندا ەلىمىزدىڭ بارلىق ايماقتارىندا بۇگىنگە دەيىن 30 مىڭ وتباسىعا، ونىڭ ىشىندە جالعىزباستى قارتتارعا، ەرەكشە قاجەتتىلىگى بار جانە ت.ب. ازاماتتارعا كومەك كورسەتىلدى. بۇل تۋرالى Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك facebook-پاراقشاسىندا جازدى. 

«نۇرسۇلتان نازارباەۆتىڭ باستاماسىمەن قۇرىلعان «Birgemiz» قورى وتكەن اپتادا 150 مىڭنان استام مۇقتاج ازاماتقا 50 مىڭ تەڭگە مولشەرىندە تىكەلەي اقشالاي كومەك كورسەتۋ تۋرالى شەشىم قابىلدادى. بۇلار نەگىزىنەن كارانتين قيىندىقتارىن كوبىرەك شەگىپ جاتقان 23 ءىرى قالانىڭ تۇرعىندارى. اكىمدەر مەن الەۋمەتتىك قورعاۋ ورگاندارى ۇسىنعان كومەك الۋشىلار تىزىمدەرىندە تابىس دەڭگەيى ەڭ تومەن الەۋمەتتىك ءالسىز توپتاردان قۇرالعان ازاماتتار قامتىلعان.

ماتەريالدىق كومەك اقشانى ەكىنشى دەڭگەيدەگى بانكتەر ارقىلى جەكە تۇلعانىڭ كارتا نەمەسە اعىمداعى شوتىنا قولما-قول اقشاسىز اۋدارۋ ارقىلى كورسەتىلەدى. سونىمەن بىرگە، ماتەريالدىق كومەك كورسەتكەن كەزدە بانكتىك كوميسسياسىز جانە ەگەر ازاماتتاردىڭ نەسيەلىك قارازدارى بولعان جاعدايدا، بۇل قاراجاتتى سول قارىزدى تولەۋ ءۇشىن ۇستاپ قالماۋ ماسەلەلەرى قاراستىرىلدى» دەپ جازدى باۋىرجان بايبەك.

سونداي-اق پارتيا توراعاسىنىڭ ءبىرىنشى ورىنباسارى بۇگىن-ەرتەڭ 50 مىڭ تەڭگە كولەمىندەگى بىرجولعى تولەمدى ىندەت جۇقتىرعانداردىڭ 70%-كە جۋىعى شوعىرلانعان نۇر-سۇلتان جانە الماتى قالالارىنىڭ 2 مىڭنان استام دارىگەرلەرى دە الاتىنىن جەتكىزدى. بۇعان دەيىن «سق-فارماتسيا» ۇكىمەتتىك وپەراتورىمەن نۇر-سۇلتان، الماتى جانە شىمكەنت قالالارى تۇرعىندارىنىڭ ءالسىز توپتارىنا تەگىن تاراتۋ ءۇشىن 5 ميلليون ماسكا ساتىپ الۋ تۋرالى شارتقا قول قويىلعان.

«جالپى بۇگىنگە دەيىن «Birgemiz» قوعامدىق قورىنىڭ ەسەپشوتىنا 14 ملرد تەڭگەگە جۋىق قارجى ءتۇستى. وسىنداي كۇردەلى كەزەڭدە ەلباسى باستاماسىنا قولداۋ بىلدىرگەن بارلىق مەتسەناتتارعا تاعى دا العىسىمدى بىلدىرەمىن. جينالعان قاراجات جانە وڭىرلەر بويىنشا بولىنگەن كومەك تۋرالى اقپاراتتى باقىلاپ وتىرۋ ءۇشىن birgemiz2020.kz رەسمي سايتى اشىلدى» دەدى ب.بايبەك.

 

سوڭعى جاڭالىقتار

جۇزدەگەن تۇرعىنعا جۇمىس تابىلدى

ايماقتار • بۇگىن، 12:44

اۋىلدا سپورت كەشەنى سالىنۋدا

ايماقتار • بۇگىن، 09:28

ۇقساس جاڭالىقتار