ەل باسىنا كۇن تۋعان سىن ساعاتتا ورتاق ىستەن كاسىپوداقتار فەدەراتسياسى سىرت قالا المايدى. ناۋرىزدىڭ 31-ءى مەن ءساۋىردىڭ 6-سى ارالىعىندا فەدەراتسيا «ەڭبەك ادامدارىنا راقمەت» اتتى ارنايى چەللەندج ۇيىمداستىرىپ, 16 اۋماقتىق كاسىپوداق بىرلەستىكتەرى قيىن-قىستاۋ كەزەڭدە حالىققا قالتقىسىز قىزمەت ەتىپ جۇرگەن ەڭبەك ادامدارىنا الەۋمەتتىك جەلىلەردە ريزاشىلىقتارىن ءبىلدىردى. جاقسىلىق جاساۋدان جارىسقان جانداردىڭ ەڭبەگىن جارقىراتا جايىپ سالۋدى ماقسات ەتكەن چەللەندج بارىسىندا ەلىمىزدىڭ ءار وڭىرىندەگى تالاي ەڭبەك ادامىنىڭ اتتارى اتالىپ, كوپشىلىككە تانىستىرىلدى.
«بۇل كۇندەرى ءبىز ءار قازاقستاندىق ءۇشىن كۇندەلىكتى دەنساۋلىعىنا قاتەر توندىرە وتىرىپ, قىزمەت ەتىپ جۇرگەندەردىڭ ەلەۋلى ەڭبەگىن ايتتىق, كورسەتتىك. قىمباتتى ءبىزدىڭ مەديتسينا قىزمەتكەرلەرى, جۇرگىزۋشىلەر, پوليتسيا قىزمەتكەرلەرى, جۋرناليستەر, ساتۋشىلار, ەنەرگەتيكتەر, الەۋمەتتىك قىزمەتشىلەر, ەرىكتىلەر, جەتكىزۋشىلەر, اۋلا تازالاۋشىلار! سىزدەردىڭ ارقايسىلارىڭىز ءبىزدى قورعاۋداسىزدار. بۇگىنگى جاعدايدا سىزدەردىڭ اتقارىپ جۇرگەن ەڭبەكتەرىڭىز – ەرلىك! سىزدەرگە شەكسىز تاعزىم! وزدەرىڭىزدى ساقتاڭىزدار! ءبىز سىزدەردىڭ ەڭبەكتەرىڭىزگە العىس ايتامىز! ءبىز سىزدەردى ماقتان تۇتامىز!» دەدى س.داۋلەتالين.
كاسىپوداق باسشىسى سونىمەن قاتار, بارشا قازاقستاندىقتاردى توتەنشە جاعداي كەزەڭىندە باسىن قاۋىپ-قاتەرگە تىگىپ, ەل يگىلىگى جولىندا تىنىمسىز ەڭبەك ەتىپ جۇرگەن جاندارعا قولداۋ كورسەتۋگە ءارى ينفەكتسيانى جۇقتىرۋ قاۋپىن ازايتۋ ءۇشىن ساقتىق شارالارىن قاتاڭ ۇستانۋعا شاقىردى.
«ۇيدە بولۋلارىڭىزدى سۇرايمىن! كارانتين شارتتارىن ساقتايىق! قاتاڭ ءتارتىپ پەن بارلىق ەرەجەلەر ساقتالعان جاعدايدا عانا COVID-19 قارسى كۇرەستە جەڭىسكە قول جەتكىزە الامىز. ءبىز بارشا قازاقستاندىقتاردىڭ بىرلىگى مەن ىنتىماقتاستىعىنىڭ ارقاسىندا وسى قيىندىقتى ەڭسەرەتىندىگىمىزگە سەنىمدىمىز»,-دەدى قركف توراعاسىنىڭ مىندەتىن اتقارۋشى س.داۋلەتالين.
