قارۋلى كۇشتەردە اسكەري قىزمەتشىلەردىڭ دەنساۋلىق قاۋىپسىزدىگىن قامتاماسىز ەتۋگە, جەكە قۇرام مەن وتباسى مۇشەلەرىنىڭ اراسىندا جۇقتىرۋ جاعدايلارىن بولدىرماۋعا باعىتتالعان اۋقىمدى جۇمىستار جالعاستىرىلۋدا.
بارلىق اسكەري بولىمدەر مەن مەكەمەلەردە ەپيدەمياعا قارسى قورعاۋدى كۇشەيتۋ ماقساتىندا وتكىزۋ رەجيمى مەديتسينالىق سۇزگىمەن جابدىقتالعان تەك ءبىر عانا باقىلاۋ-وتكىزۋ پۋنكتى ارقىلى جۇزەگە اسىرىلادى. ءبىر رەت قولدانىلاتىن مەديتسينالىق ماسكالاردى اۋىستىرۋ ءتارتىبىن ساقتاي وتىرىپ كيۋ مىندەتتەلدى. بارلىق اسكەري قىزمەتشىلەر مىندەتتى تۇردە كۇنىنە ەكى رەت مەديتسينالىق تەكسەرۋدەن وتەدى.
جەكە قۇرامداعى اسكەري قىزمەتشىلەردىڭ اراسىن 2 مەتر قاشىقتىقتىقتى ساقتاي وتىرىپ ساپتى الشاق تۇرىپ وتكىزۋ تاپسىرىلدى.
كەڭەس بارىسىندا قورعانىس ءمينيسترى نۇرلان ەرمەكباەۆ بارلىق الدىن الۋ شارالارىن ناقتى ساقتاۋ قاجەتتىگىنە نازار اۋداردى.
اسكەري مىندەتتىلەرمەن ارنايى جيىن وتكىزۋگە باسا نازار اۋدارىلادى. قورعانىس ۆەدومستۆوسىنىڭ باسشىسى بارلىق قاتىسۋشىلاردى قاجەتتى زاتتارمەن جانە ماۋسىم بويىنشا بەلگىلەنگەن اسكەري كيىم نىسانى جيىنتىعىمەن ۋاقتىلى قامتاماسىز ەتۋدى تاپسىردى. بارلىق ءىس-شارالاردى سانيتارلىق-گيگيەنالىق نورمالاردى قاتاڭ ساقتاي وتىرا وتكىزۋ قاجەت.
ەستەرىڭىزگە سالا كەتەيىك, مەملەكەت باسشىسىنىڭ 2 ساۋىردەگى جارلىعىنا سايكەس, وبلىستار مەن رەسپۋبليكالىق ماڭىزى بار قالالاردىڭ اكىمدىكتەرى اۋماقتىق اسكەرلەردىڭ اسكەري مىندەتتىلەرىن جيىندارعا شاقىرۋ قۇقىعىنا يە بولدى. جيىننىڭ مەرزىمى مەن شاقىرىلاتىنداردىڭ سانىن اكىمشىلىك وزدەرى انىقتايدى. قر قارۋلى كۇشتەرى جوعارعى باس قولباسشىسىنىڭ بۇل شەشىمى ءار ءتۇرلى مىندەتتەردى شەشۋ ءۇشىن بارلىق قول جەتىمدى رەسۋرستاردى پايدالانۋعا مۇمكىندىك بەرەتىن جەرگىلىكتى اتقارۋشى ورگانداردى قولداۋدىڭ ءتيىمدى شاراسى بولدى. مۇنداي قادام جۇرتشىلىقتىڭ باسىم بولىگىنىڭ ماقۇلداۋمەن, ەلدىڭ يگىلىگى ءۇشىن ورتاق ىسكە ءوز ەركىمەن ۇلەس قوسقىسى كەلەتىن جاستاردىڭ وتىنىشتەرىمەن سۇيەمەلدەنۋدە.
