قازاقستان • 07 ءساۋىر، 2020

COVID-19: قىتايدىڭ بىلىكتى دارىگەرلەرى قازاقستانعا كەلمەك

486 رەتكورسەتىلدى

قىتايدىڭ كوروناۆيرۋستى الدىن الۋ جانە ناۋقاستاردى ەمدەۋدە تاجىريبەسى مول جوعارى بىلىكتى دارىگەرلەرى قازاقستاندىق ماماندارعا كومەك كورسەتپەك. بۇل تۋرالى coronavirus2020.kz سايتىندا جاريالاندى.

قۇرامىنا كوروناۆيرۋس ينفەكتسياسىنىڭ الدىن الۋ جانە كوروناۆيرۋسقا شالدىققان ناۋقاستاردى ەمدەۋدە تاجىريبەسى مول جوعارى بىلىكتى دارىگەرلەر كىرەتىن قىتاي دەلەگاتسياسىنىڭ ميسسياسى - قازاقستاندىق مەديتسينا قىزمەتكەرلەرىنە COVID-19 قارسى كۇرەستە كونسۋلتاتسيالىق ادىستەمەلىك كومەك كورسەتۋ، ونىڭ ىشىندە COVID-19 الدىن الۋ جانە باقىلاۋدىڭ قىتاي تاجىريبەسىمەن، جاقىن بايلانىستاردى انىقتاۋ جانە وقشاۋلاۋ تەتىكتەرىمەن تانىسۋ، قولدانىستاعى كلينيكالىق ەمدەۋ حاتتامالارىنا ۇسىنىستار بەرۋ جانە ت.ب.

بۇل باستامانى قازاقستان تاراپى وسى جىلدىڭ 24 ناۋرىزىندا مەملەكەت باسشىسى ق-ج. توقاەۆتىڭ قىتاي حالىق رەسپۋبليكاسىنىڭ (قحر) توراعاسى سي تسزينپينمەن COVID-19 جاڭا كوروناۆيرۋس ينفەكتسياسىنا قارسى كۇرەستە قحر-نىڭ قازاقستانعا جان-جاقتى قولداۋ كورسەتۋى تۋرالى تەلەفون ارقىلى سويلەسۋ بارىسىندا قول جەتكىزىلگەن ۋاعدالاستىقتى جۇزەگە اسىرۋ ماقساتىندا ۇسىندى.

ديپلوماتيالىق ارنالار ارقىلى قىتايلىق ساراپشىلاردى قازاقستانعا جىبەرۋدى ۇيىمداستىرۋ ماسەلەلەرىن شەشۋگە قاتىستى ەكىجاقتى كەلىسسوزدەر جۇرگىزىلۋدە. بۇگىن 7 ساۋىردە قر دەنساۋلىق ساقتاۋ ۆيتسە-ءمينيسترى ل.م.اقتاەۆانىڭ توراعالىعىمەن قحر دەنساۋلىق ساقتاۋ كوميتەتى وكىلدەرى مەن قىتايلىق دارىگەرلەرمەن ونلاين كەزدەسۋ ءوتتى. كەزدەسۋگە قازاقستان تاراپىنان قر دەنساۋلىق ساقتاۋ ۆيتسە-ءمينيسترى ك.نادىروۆ، قر دەنساۋلىق ساقتاۋ مينيسترلىگىنىڭ جاۋاپتى حاتشىسى ب.جاقسەلەكوۆا، نۇر-سۇلتان، الماتى، قاراعاندى قالالارىنداعى مەديتسينالىق جوو رەكتورلارى، نۇر-سۇلتان، الماتى قالالارى مەن قاراعاندى وبلىسىنىڭ دەنساۋلىق ساقتاۋ باسقارماسىنىڭ باسشىلارى، سونداي-اق قر سىرتقى ىستەر مينيسترلىگىنىڭ وكىلدەرى قاتىستى. قىتاي تاراپىنان چجان گانچان مىرزا – قىتايدىڭ شىڭجاڭ-ۇيعىر اۆتونوميالىق ولكەسى ء(شۇاو) دەنساۋلىق ساقتاۋ كوميتەتىنىڭ ينسپەكتورى، حە شاوحۋا مىرزا – قىتاي دەنساۋلىق ساقتاۋ كوميتەتى حالىقارالىق ىنتىماقتاستىق دەپارتامەنتى ديرەكتورىنىڭ ورىنباسارى، قىتايلىق دارىگەرلەر، قىتايدىڭ سىرتقى ىستەر مينيسترلىگى مەن قر-داعى قحر ەلشىلىگىنىڭ وكىلدەرى قاتىستى. وسى ونلاين كەزدەسۋ بارىسىندا تاراپتار 13 ماماننان تۇراتىن قىتايلىق دەلەگاتسيانىڭ قازاقستانعا ساپارىنىڭ باعدارلاماسىن، ىنتىماقتاستىقتىڭ باسىم باعىتتارىن، COVID-19 تاقىرىبى بويىنشا قازاقستاندىق دارىگەرلەرگە ارنالعان ترەنينگ تاقىرىپتارىن، لوگيستيكا ماسەلەلەرىن جانە ت.ب. كەڭىنەن تالقىلادى. دەلەگاتسيا قۇرامىندا پۋلمونولوگيا، ينفەكتسيا، شۇعىل تەراپيا، ەپيدەميولوگيا، قوعامدىق دەنساۋلىق ساقتاۋ جانە ت.ب. سالا ماماندارى بار. قحر دارىگەرلەرى ءساۋىردىڭ باسىندا نۇر-سۇلتانعا ارنايى ۇيىمداستىرىلعان ۇشاقپەن ۇشىپ كەلەدى. سونىمەن قاتار دەلەگاتسيامەن بىرگە قىتايدان گۋمانيتارلىق كومەكتىڭ ەكىنشى بولىگى دە جەتكىزىلەدى دەپ كۇتىلۋدە.

 

سوڭعى جاڭالىقتار

ۇقساس جاڭالىقتار