توتەنشە جاعداي رەجيمىنىڭ قولدانىلۋ كەزەڭىندە ەڭبەك جانە حالىقتى الەۋمەتتىك قورعاۋ مينيسترلىگى مەديتسينالىق-الەۋمەتتىك ساراپتاما بولىمىنە بارماي, «مۇگەدەكتىكتى جانە/نەمەسە ەڭبەك ەتۋ قابىلەتىنەن ايىرىلۋ دارەجەسىن بەلگىلەۋ جانە/نەمەسە قاجەتتى الەۋمەتتىك قورعاۋ شارالارىن ايقىنداۋ» مەملەكەتتىك قىزمەتىن سىرتتاي فورماتتا الۋ تەتىگىن ازىرلەدى.
قىزمەت «ەلەكتروندىق ۇكىمەت» پورتالىندا «ەلەكتروندىق ءوتىنىش» سەرۆيسى ارقىلى بەرىلگەن ەلەكتروندىق ءوتىنىش نەگىزىندە ۇسىنىلادى.
مەملەكەتتىك قىزمەتتى الۋ ءۇشىن ازامات قاجەتتى قۇجاتتاردىڭ سكانەرلەنگەن نۇسقاسىمەن قوسا ءتيىستى ستاندارتقا سايكەس ءوتىنىشتى تولتىرۋى ءتيىس. وتىنىشكە ەلەكتروندىق تسيفرلىق قولتاڭبامەن قول قويۋ قاجەت.
بۇدان ءارى ءوتىنىش كورسەتىلگەن قىزمەتتى الۋشىنىڭ تۇرعىلىقتى جەرى بويىنشا ەڭبەك, الەۋمەتتىك قورعاۋ جانە كوشى-قون كوميتەتىنىڭ اۋماقتىق دەپارتامەنتىنە جىبەرىلەدى.
مەديتسينالىق-الەۋمەتتىك ساراپتاما جۇرگىزىلگەننەن كەيىن ونىڭ ناتيجەلەرى كورسەتىلەتىن قىزمەتتى الۋشىعا sms-حابارلاما ارقىلى, «ەلەكتروندىق ۇكىمەت» پورتالىنداعى جەكە كابينەتكە نەمەسە «ەلەكتروندىق ءوتىنىش» سەرۆيسى ارقىلى كەلىپ تۇسكەن وتىنىشكە جاۋاپ تۇرىندە جىبەرىلەدى.
ايتا كەتۋ كەرەك, توتەنشە جاعداي كەزەڭىندە مەديتسينالىق-الەۋمەتتىك ساراپتاما بولىمىنە قايتا كۋالاندىرۋعا كەلمەگەن ازاماتتارعا وتكىزىپ العان كەزەڭىنە 2020 جىلعى 16 اقپاننان باستاپ مەرزىم بەلگىلەنەتىن بولادى.
ەگەر قايتا كۋالاندىرۋ مەرزىمى توتەنشە جاعدايدان ءبىر اي بۇرىن (16 اقپانعا دەيىن) نەمەسە سول ۋاقىتتا كەلگەن بولسا (16 ناۋرىزدان كەيىن), وندا مەرزىمدەر توتەنشە جاعداي كەزىندە اۆتوماتتى تۇردە ۇزارتىلادى.
بۇگىنگى تاڭدا ناۋرىز ايىندا 268, ءساۋىر ايىندا 672 مۇگەدەكتىك الۋشىنىڭ مۇگەدەكتىك مەرزىمدەرى اۆتوماتتى تۇردە ۇزارتىلدى.
