كونۆەرسيا شەڭبەرىندە قورعانىس كاسىپورىندارى جەدەل تارتىپپەن جالپى جانە مەديتسينالىق ماقساتتاعى ازاماتتىق ونىمدەردى شىعارۋعا كوشتى.
كوكشەتاۋ «تىنىس» زاۋىتى مەديتسينالىق بەتپەردەلەر شىعارۋعا كىرىسىپ, قازىردىڭ وزىندە اقمولا وبلىسىنىڭ دەنساۋلىق ساقتاۋ مەكەمەلەرىنە 110 مىڭ دانا بەتپەردە جەتكىزدى. سونىمەن قاتار, زاۋىتتا تاعى 2 ميلليون دانا بەتپەردە شىعارۋعا ارنالعان شيكىزات پەن ماتەريالدار بار. وسى زاۋىت جەدەل جاردەم ماشينالارىنا ورناتۋ ءۇشىن وكپەنى جاساندى جەلدەتۋدىڭ ءموبيلدى اپپاراتتارىن شىعارۋدى باستادى. تاياۋداعى ەكى اي ىشىندە ءوجج اپپاراتتارى قازاقستاننىڭ بارلىق وڭىرلەرىندەگى جەدەل جاردەم قىزمەتتەرىنىڭ قاجەتتىلىگىن جابادى. وسىعان بايلانىستى زاۋىت تاۋلىك بويى ءۇش اۋىسىمدى جۇمىسقا اۋىستىرىلدى.
اسكەري كەمەلەر مەن كاتەرلەر وندىرەتىن باتىس قازاقستانداعى «گيدرواسپاپ» جانە «زەنيت» كاسىپورىندارى ادامدار بولاتىن ءار ءتۇرلى ايماقتارعا ءوتۋ كەزىندە دەزاكتيۆاتسيانى قامتاماسىز ەتۋ ءۇشىن ينجەنەرلىك قورشاۋلار مەن ارنايى توننەلدەر ءوندىرىسىن ۇيىمداستىرۋعا كىرىستى.
سولتۇستىك قازاقستانداعى «پەتروپاۆل اۋىر ماشينا جاساۋ زاۋىتى» اق, «س.م. كيروۆ اتىنداعى زاۋىت» اق جانە «مۇنايماش» اق كاسىپورىندارى وبلىستى اۆتوكولىككە ارنالعان دەزينفەكتسيالىق توسقاۋىلدارمەن قامتاماسىز ەتتى.
تۇنگە ارنالعان اسكەري اسپاپتار شىعاراتىن «قازاقستان اسەلسان ينجينيرينگ» اق قازاقستان-تۇركيا بىرلەسكەن كاسىپورنى ادامنىڭ دەنە قىزۋىن ولشەۋگە ارنالعان ديستانتسيالىق ەلەكترووپتيكالىق قۇرىلعىلار ءوندىرىسىن يگەرۋدە.
الماتى قالاسىندا ورنالاسقان ۇشپايتىن قارۋلار مەن پراكتيكالىق وق-دارىلەر شىعاراتىن الما-دك جانە قالقان-7 زاۋىتتارى ارنايى دەزينفەكتسيالاۋ قۇرالدارى مەن قورعاۋ كوستيۋمدەرىن ءوندىرۋدى ۇيىمداستىردى.
بۇدان باسقا, قورعانىس ونەركاسىبى زاۋىتتارى, سونىڭ ىشىندە № 405 الماتى اۆياجوندەۋ زاۋىتى قارۋلى كۇشتەرگە توتەنشە جاعداي رەجيمى شەڭبەرىندە ءىس-شارالاردى ۇيىمداستىرۋعا قاتىساتىن اسكەري قىزمەتشىلەردى دەزاكتيۆاتسيالىق قۇرالدارمەن قامتاماسىز ەتۋ ءۇشىن قارجىلاي كومەك كورسەتتى.
جالپى العاندا, قازاقستان رەسپۋبليكاسىنىڭ قورعانىس ونەركاسىبى كاسىپورىندارى تۋىنداعان سىن-قاتەرلەرگە قارسى شارالاردان شەت قالماي, رەسپۋبليكالىق جانە وڭىرلىك جەدەل شتابتاردىڭ مىندەتتەرىنە سايكەس COVID-19 تاراتپاۋعا ءوز ۇلەسىن قوسادى.
بۇدان باسقا, قورعانىس سالاسىنىڭ كاسىپورىندارى بەكىتىلگەن كەستەگە سايكەس كۇش قۇرىلىمدارى مۇددەسىندە 2020 جىلعى مەملەكەتتىك قورعانىستىق تاپسىرىستى ورىنداۋدى جالعاستىرۋدا – اسكەري ماقساتتاعى بارلىق ءونىم ۋاقىتىلى جانە ساپالى وندىرىلەتىن بولادى.
