ايماقتار • 05 ءساۋىر، 2020

ماڭعىستاۋدا 6 ساۋىردەن باستاپ كارانتين رەجيمى كۇشەيتىلەدى

300 رەتكورسەتىلدى

بۇل تۋرالى قوعامدىق كوممۋنيكاتسيا ورتالىعىندا وتكەن بريفينگتە ماڭعىستاۋ وبلىستىق ىشكى ساياسات باسقارماسىنىڭ باسشىسى ەرجان كۇمىسقاليەۆ حابارلادى.

ماڭعىستاۋ وبلىسىندا COVID-19 ىندەتىن جۇقتىرعان تاعى دا ەكى ادام تىركەلدى. جالپى العاندا وبلىس بويىنشا ءۇش ناۋقاس انىقتالدى. جاعدايلارى ورتاشا اۋىر دەپ باعالانۋدا.

وسىعان وراي، 2020 جىلدىڭ 6 ءساۋىرى كۇنىنەن باستاپ وبلىستىق جەدەل شتابتىڭ جانە سانيتارلىق-ەپيدەميولوگيالىق ستانتسيا ماماندارىنىڭ شەشىمىمەن كارانتين رەجيمى كۇشەيتىلەتىن بولادى.

اتاپ ايتقاندا مەنشىك نىسانىنا قاراماستان وبلىس اۋماعىنداعى بارلىق ۇيىمداردىڭ كەڭسە قىزمەتكەرلەرى قاشىقتىقتان جۇمىس جاساۋ رەجيمىنە اۋىسادى. مەكەمە باسشىسىنىڭ شەشىمىمەن تەك قانا اسا قاجەتى قىزمەتكەرلەر اپتاسىنا 1-2 كۇن عانا جۇمىستا بولۋى مۇمكىن.

اقتاۋ مەن جاڭاوزەن قالالارىنداعى جەكە كولىكتەردىڭ ءجۇرۋ ءتارتىبى وزگەرەدى. ياعني، ساعات 06:00 – 09:00 ارالىعىندا جانە 18:00 – 21:00 ارالاعىندا عانا جۇرۋگە رۇقسات بەرىلەدى.

وبلىس بويىنشا بارلىق قالالار مەن اۋدانداردا قوعامدىق كولىكتەردىڭ جۇمىسى توقتايدى. تەك قانا، مۇنايلى اۋدانى مەن اقتاۋ قالاسىنىڭ اراسىندا جۇرەتىن قوعامدىق كولىكتەرگە رۇقسات بەرىلەدى. بىراق، دەزينفەكتسيا شارالارى قاتاڭ ساقتالۋى ءتيىس.

تاكسي قىزمەتتەرى بويىنشا دا وزگەرىستەر بار. قوعامدىق كولىكتەردىڭ قوزعالىسى توقتاتىلعاننان كەيىن تاكسي قىزمەتىمەن اينالىسۋعا ارنايى رۇقساتى بار ۇيىمدارعا عانا جۇمىس جاساۋعا مۇمكىندىك بەرىلەدى. تاكسي قىزمەتى قالالار مەن اۋدانداردىڭ اۋماعىندا عانا جانە ساعات 06:00 – 21:00 ارالىعىندا قىزمەت ەتۋى ءتيىس. الايدا، بۇل كولىكتەر تەك ءبىر ادامنان نەمەسە ءبىر وتباسى مۇشەلەرىن مىنگىزۋى قاجەت. جانە دەزينفەكتسيا شارالار مۇقيات ساقتالۋى ءتيىس.

اقتاۋ قالاسى ماڭىنداعى اۋىلداردا تۇراتىن مەديتسينالىق ۇيىمداردىڭ قىزمەتكەرلەرى بولەك تاسىمالداناتىن بولادى.

-بۇل شەكتەۋلەر حالىقتىڭ دەنساۋلىعى مەن اماندىعى ءۇشىن جاسالىپ جاتقان شارالار ەكەندىگىن اتاپ وتەمىن جانە تۇسىنىستىكپەن قاراۋعا شاقىرامىن! بۇگىنگى كۇنى قاتەرلى ىندەت قالامىزدا دا تاراۋدا. تۇرعىندار كەز-كەلگەن جەردەن جۇقتىرىپ الۋى مۇمكىن. سوندىقتان، سىزدەردەن بارىنشا ساق بولىپ، كارانتين رەجيمىن قاتاڭ ساقتاپ، ازاماتتىق جاۋاپكەرشىلىك تانىتۋلارىڭىزدى سۇرايمىن!

جاعدايعا بايلانىستى الداعى ۋاقىتتا وبلىستىق جەدەل شتابتىڭ شەشىمىنە سايكەس كارانتين رەجيمىن كۇشەيتۋ شارالارى قوسىمشا ەنگىزىلىپ وتىرادى، دەدى ماڭعىستاۋ وبلىسى ىشكى ساياسات باسقارماسىنىڭ باسشىسى ە.كۇمىسقاليەۆ.

 

ماڭعىستاۋ وبلىسى

 

 

سوڭعى جاڭالىقتار

پاۆلوداردا ەكوبازار اشىلدى

ايماقتار • بۇگىن، 17:09

جۇزدەگەن تۇرعىنعا جۇمىس تابىلدى

ايماقتار • بۇگىن، 12:44

ۇقساس جاڭالىقتار