كوروناۆيرۋس • 04 ءساۋىر، 2020

ماڭعىستاۋ: كوروناۆيرۋس ينفەكتسياسىن جۇقتىرعان ەرلى-زايىپتىلار تۋرالى دەرەكتەر بەلگىلى بولدى

7864 رەتكورسەتىلدى

بۇل تۋرالى قوعامدىق كوممۋنيكاتسيا قىزمەتىندە وتكەن بريفينگتە ماڭعىستاۋ وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى ءلاززات ەسەنعاليەۆا حابارلادى.

بۇگىنگى كۇنگە دەيىن ماڭعىستاۋ وبلىسىندا كوروناۆيرۋس ينفەكتسياسىن جۇقتىرعان 3 ادام تىركەلدى. سوڭعى ەكەۋى كەشە تۇندە انىقتالدى. 3 ساۋىردە بەلگىلى بولعان 2 ناۋقاس - ەرلى زايىپتىلار. جاعدايلارى ورتاشا اۋىر دەپ باعالانىپ وتىر. ەكەۋى دە ينفەكتسيالىق بولىمگە بوكس پالاتالارعا جاتقىزىلدى. زەرتحانالىق جانە دياگنوستيكالىق تەكسەرىستەر جۇرگىزىلۋدە، بارلىق ەم شارالارى باستالدى. قوسىمشا بەيىندى مامان دارىگەرلەرى جۇمىلدىرىلدى.

50 جاستاعى ەر ادام قىزىلوردا وبلىسىنىڭ تۋماسى. اقتاۋعا جۇمىس بابىمەن ايەلىمەن جانە 9 ايلىق قىزىمەن 12 ناۋرىز كۇنى كەلگەن. اقتاۋداعى جەكە كومپانيا ديرەكتورىنىڭ كەڭەسشىسى.

ناۋقاستىڭ ايەلىنەن دە كوروناۆيرۋس ينفەكتسياسى انىقتالدى. ال، بالاسىنا جۇرگىزىلگەن ساراپتاما ناتيجەسى تەرىس بولىپ شىقتى. دارىگەرلەر نارەستەگە تاعى دا ساراپتاما جاسالاتىنىن مالىمدەدى. ايتا كەتەيىك، ناۋقاس 4 كۇن بۇرىن جەكە ەمحاناعا حابارلاسىپ، اقىلى دارگەرلىك قىزمەتكە جۇگىنگەن. حرونيكالىق برونحيت دياگنوزى قويىلىپ، ەم تاعايىندالعان. ناۋقاسپەن بايلانىستا بولعان كلينيكانىڭ 5 قىزمەتكەرى دە وكشاۋلانىپ، پروۆيزورلىق گوسپيتالگە جاتقىزىلدى. ينفەكتسيانى جۇقتىرعان ەر ادامنىڭ 2-رەت تاكسي قىزمەتىنە جۇگىنگەنى انىقتالدى. ەكى تاكسي جۇرگىزۋشىسى وزدەرى حابارلاسىپ، وقشاۋلاندى. قازىر كارانتيندە جاتىر. جالپى، ناۋقاستارمەن بايلانىستا بولعان 42 ادام وقشاۋلاندى. ونىڭ 10-ى پروۆيزورلىق گوسپيتالدە جاتىر. قالعانى ءۇي كارانتينىندە، دارىگەرلەردىڭ باقىلاۋىندا. ناۋقاستار ۋاقىتشا تۇرىپ جاتقان اقتاۋ قالاسىنداعى 11 شاعىن اۋداندا ورنالاسقان 10-ءۇيدىڭ پودەزدى كارانتينگە جابىلدى. كارانتينگە جابۋ كەزىندە سول ۇيدەگى ءبىر پاتەرگە قوناققا كەلگەن بەينەۋ اۋدانىنىڭ تۇرعىنى 3-قاباتتان سەكىرىپ، قاشپاقشى بولادى. ومىرتقاسىن سىندىرىپ الىپ، قازىر اۋرۋحانادا جاتىر. سول سەبەپتى، ءوڭىر تۇرعىندارىن ۇيدەن شىقپاۋعا شاقىرامىز. قىزۋى كوتەرىلىپ، تۇماۋ بەلگىلەرى بىلىنگەن بويدا، جەكە كلينيكالار، اۋرۋحانا، ەمحانالارعا بارماي، جەدەل جاردەمگە نەمەسە ەمحاناعا قوڭىراۋ شالىپ، جاعدايىن بايانداۋى ءتيىس. بۇگىنگى تاڭدا ناۋقاستارمەن ءبىر ۆاگوندا كەلگەن جولاۋشىلاردىڭ ءتىزىمى انىقتالىپ، تەكسەرىلىپ جاتىر. قازىرگى تاڭدا وبلىس بويىنشا 19 دارىگەر، 115 ورتا بۋىن مەيىربيكە، 52 كىشى بۋىن قىزمەتكەر قىزمەت ەتۋدە. جەكە قورعانىش قۇرالدارى جەتكىلىكتى. كۇنى كەشە ايماققا قوسىمشا 560 كوپ رەتتىك قورعانىش كوستيۋمدەرى كەلدى.

سوڭعى جاڭالىقتار

ۇقساس جاڭالىقتار