-حالىقتى تۇسىنىستىكپەن قاراۋعا شاقىرامىز. بىزدە شاقىرتۋدىڭ ءۇش ساناتى بولادى. بىرىنشىسىندە جەدەل جاردەم بريگاداسى 10 مينۋتتا جەتۋى ءتيىس. مۇمكىندىگىنشە ۋاقىتىنان بۇرىن بارۋعا تىرىسامىز. الايدا كەيدە كەشىگەتىنىمىز راس, ونىڭ بىرنەشە سەبەبى بار. كوبىنە جولدا كەپتەلىس كوپ بولادى, مامان تاپشىلىعى دا قيىندىق تۋعىزىپ وتىر. قازىرگى جاعدايعا بايلانىستى مەديتسينا قىزمەتكەرلەرىنە قۇرمەتتىڭ ارتقانىن بايقادىق, جانى جومارت جاندار ىستىق تاماقپەن قامتاماسىز ەتۋدى جاۋاپكەرشىلىگىنە الدى. مەملەكەت باسشىسى قاسىم-جومارت توقاەۆتىڭ قوسىمشا جالاقى قاراستىرۋ جونىندەگى شەشىمىنە ءدان ريزامىز, دەيدى ول.
جەدەل جاردەم قىزمەتىنە بۇرىن تاۋلىگىنە 600-گە جۋىق شاقىرتۋ تۇسسە, بۇگىندە ورتالىقتاندىرىلعان ديسپەتچەرلىك بولىمىنە 900-دەن استام شاقىرتۋ تۇسەدى. جەدەل جاردەم بريگاداسىن تاسىمالداۋشى تەمىر تۇلپارلار تاۋلىگىنە 24 ساعات, جىلىنا 365 كۇن تىنىمسىز جولداردا جۇرەدى. سول سەبەپتى ءجيى ىستەن شىعىپ قالادى.
ءبىر كولىكتى ءتورت جۇرگىزۋشى اۋىسىممەن جۇرگىزەدى. قازىر وبلىس ورتالىعىنىڭ وزىندە كۇنىنە 20 كولىك كەزەكشىلىككە شىعۋعا ءتيىس بولسا, ونىڭ تەك 10 عانا ءجۇرىپ تۇر. ال قالعان ارنايى اۆتوكولىكتەر جوندەۋدى قاجەت ەتەدى. تاعى ءبىر ماسەلە, كولىك جۇرگىزۋشىلەرى مادەنيەتىنىڭ تومەندىگىندە. جول-كولىك وقيعاسىنا تۇسكەن جەدەل جاردەم قىزمەتىنىڭ ءۇش كولىگى گاراجدا تۇر. سوت شەشىمى شىقپاي, ولاردىڭ جولعا شىعۋىنا رۇقسات جوق. ال سوتتا قارالاتىن اكىمشىلىك ىستەر بىرنەشە ايعا سوزىلۋى مۇمكىن.
