قازاقستان • 01 ءساۋىر، 2020

ۇكىمەت رەسپۋبليكاداعى مۇگەدەكتەرگە ارنالعان جالعىز ارناۋلى كوللەدجگە قولداۋ كورسەتپەك

7 رەتكورسەتىلدى

«اق جول» پارتياسىنىڭ دەپۋتاتتىق ساۋالىنان كەيىن ۇكىمەت رەسپۋبليكاداعى مۇگەدەكتەرگە ارنالعان جالعىز ارناۋلى كوللەدجگە قولداۋ كورسەتەدى. ەستەرىڭىزدە بولسا، «اق جول» فراكتسياسى تۇركىستان وبلىسىنىڭ كەنتاۋ قالاسىنداعى اتالعان كوللەدجدىڭ جاعدايىنا نازار اۋدارۋدى سۇراعان بولاتىن.

«اق جول» فراكتسياسىنىڭ دەپۋتاتى ك.ابساتيروۆتىڭ وسى جىلدىڭ 26 اقپانىندا جاساعان دەپۋتاتتىق ساۋالىندا «1942 جىلدان بەرى قىزمەتىن اتقارىپ كەلە جاتقان كوللەدج توقسانىنشى جىلداردىڭ كەزىندە دە باستى ميسسياسىن توقتاتقان ەمەس. كوللەدجدىڭ باستى مىندەتى مۇگەدەك بالالاردى ەڭبەك داعدىلارىنا ۇيرەتىپ، ارناۋلى ءبىلىم بەرىپ قانا قويماي، قازىرگى قيىن كەزەڭدە جۇمىسقا ورنالاسۋعا مۇمكىندىك بەرەدى» دەلىنگەن.

تۇركىستان وبلىسى بيۋدجەتى ەسەبىنەن وقىتىلاتىن بۇل كوللەدجدە 16 جاستان 35 جاسقا دەيىنگى ەلىمىزدىڭ 7 وڭىرىنەن (اقتوبە وبلىسى، شقو، بقو، قىزىلوردا، قاراعاندى، تۇركىستان وبلىستارى مەن شىمكەنت قالاسى) 80 ستۋدەنت كاسىبي ءبىلىم الادى. الايدا، ەلىمىزدەگى 700 مىڭ قازاقستاندىق مۇگەدەك جاندارعا ارنالاعان جالعىز وقۋ ورنىنىڭ ماتەريالدىق-تەحنيكالىق جانە مەديتسينالىق-سانيتارلىق بازاسى بۇگىنگى تاڭدا ءبىلىم بەرۋ سۇرانىسىنىڭ ۇشتەن ءبىرىن عانا قاناعاتتاندىرا الادى.

وسىعان وراي، ۇكىمەتتەن كوللەدجدى رەسپۋبليكالىق بيۋدجەتكە اۋىستىرىپ، وقۋ قۇرالدارمەن جانە تۇرمىستىق جايلارمەن، كەرەكتى جابدىقتارمەن، ونىڭ ىشىندە ليفتىلەرىمەن، اۆتوتەحنيكا، سپورتزال مەن قامتاماسىز ەتىپ، مونشا-كىر جۋ كەشەنىن جوندەۋ سۇرالعان بولاتىن.

دەپۋتاتتىق ساۋالدىڭ رەسمي جاۋابىندا قر ءبىلىم مينيسترلىگىنە وبلىس اكىمدەرى جانە نۇر-سۇلتان، الماتى، شىمكەنت قالالارىنىڭ اكىمدەرىمەن بىرلەسە وتىرىپ ارناۋلى كوللەدجدى مەملەكەتتىك تاپسىرىس اياسىندا، ياعني رەسپۋبليكالىق بيۋدجەت ەسەبىنەن قارجىلاندىرۋ مۇمكىندىگىن قاراستىرۋ تاپسىرىلعانى ايتىلعان.

ارناۋلى كوللەدجدى قاجەتتى جابدىقتارمەن، ليفتىلەرىمەن، اۆتوتەحنيكامەن قامتاماسىز ەتۋدى «جاس مامان» جوباسى  شەڭبەرىندە ىسكە اسىرۋ تاپسىرىلعان. سونىمەن بىرگە، «جاس مامان» جوباسى اياسىندا تۇرىكستان وبلىسىنىڭ كوللەدجدەرىنە جابدىقتار ساتىپ الۋ ءۇشىن 2020-2022 جىلدارعا ارنالعان رەسپۋبليكالىق بيۋدجەتتەن 3،6 ملرد تەڭگە بولىنگەن.

سونىمەن بىرگە، ساۋال جاۋابىندى ارناۋلى كوللەدجگە قاجەت بولعان جاعدايدا تاربيەشى، زاڭگەر، الەۋمەتتىك پەداگوگ، پەداگوگ-ۇيىمداستىرۋشى لاۋازىمدارىن ەنگىزۋگە قۇقى بەرىلگەنى جونىندە ايتىلعان.

«كورسەتىلگەن ماسەلەلەر بويىنشا جۇمىستار ۇكىمەت باقىلاۋىندا»  دەلىنگەن قر پرەمەر-ءمينيسترىنىڭ ورىنباسارى ە.توعجانوۆتىڭ قولى قويىلعان حات جاۋابىندا.

سوڭعى جاڭالىقتار

ۇقساس جاڭالىقتار