ايماقتار • 31 ناۋرىز، 2020

اقتوبە وبلىسى: الەۋمەتتىك وسال توپتارعا جاردەماقى تاعايىندالادى

13 رەتكورسەتىلدى

كوروناۆيرۋس ىندەتىنىڭ تارالۋىنا بايلانىستى ەلىمىزدە جاريالانعان توتەنشە جاعداي مەن ءىرى قالالارداعى كارانتيندىك كەزەڭ الەۋمەتتىك وسال توپتارعا قارجىلاي كومەك كورسەتۋگە توسقاۋىل قويا المادى. بۇل مىندەت اتاۋلى الەۋمەتتىك كومەك (ااك) الۋشىلار قاتارىن دا قامتىدى.

ايتالىق، اقتوبە وبلىستىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى بۇل-بۇل ەلەۋسىنوۆانىڭ مالىمدەۋىنشە، بيىلعى 2020 جىلدىڭ ەكىنشى توقسانىندا ااك-گە تۇڭعىش رەت قۇجات تاپسىرعاندار ءۇشىن جاڭاشا تارتىپتەر بەلگىلەنگەن. ياعني ولار بۇل كەزەڭدە ەلەكتروندى قولتاڭباسىمەن ەلەكتروندى ۇكىمەت پورتالىنا كىرۋى كەرەك. سودان سوڭ وعان وزدەرى تۋرالى دەرەكتەردى ەنگىزىپ، ءوتىنىش قالدىرادى. بۇگىنگى كۇنى اقتوبە قالاسى مەن وبلىس اۋماعىنا ەرەكشە جاعدايداعى شەكتەۋ رەجيمى ەنگىزىلگەن. وسىنداي سىني ساتتە وبلىستىق بيۋدجەتتەن الەۋمەتتىك وسال توپتاردى قارجىلىق جاعىنان قولداۋ شارالارى بەلگىلەندى. ارينە، بۇل ءىس باس-اياعى جوق، «كولدەنەڭ كوك اتتىنىڭ» بارىنە شۇلەن تاراتۋ ەمەس. ەلىمىزدەگى قالىپتاسقان نورماتيۆتەر مەن تالاپتارعا سايكەس اتقارىلماق. بۇل جونىندە ءوز وي-پىكىرىن Egemen.kz تىلشىسىنە سالا جەتەكشىسى تومەندەگىشە جەتكىزدى:

- قاراجات كولەمى ءار جان باسىنا شاققاندا كۇنكورىس دەڭگەيى 27666 تەڭگەدەن كەم بولعان جاعدايدا تولەنەدى. ءسويتىپ، وسى تارتىپكە سايكەس وڭىردەگى از قامتىلعان جانە كوپ بالالى وتباسىلارعا جانە جالعىزىلىكتى قاريالار مەن الەۋمەتتىك اۋرۋمەن اۋىراتىن ناۋقاستاردىڭ وتباستارىنا ءساۋىر ايىنان باستاپ جيىرما مىڭ تەڭگە كولەمىندە جاردەماقى تاعايىندالادى. بۇل قاراجاتتى الۋشىلارعا ەش جەرگە اياعىمەن بارۋدىڭ قاجەتى جوق. ويتكەنى ارنايى جاساقتالعان بازادا وسىنداي ساناتقا كىرەتىن ازاماتتاردىڭ دەرەكتەرى ساقتاۋلى. جاردەماقىلار وسى مالىمەتتەر بويىنشا جاساقتالىپ، ازاماتتاردىڭ ەسەپشوتتارىنا اۋدارىلادى، - دەدى باسقارما باسشىسى.

 

اقتوبە

 

سوڭعى جاڭالىقتار

پاۆلوداردا ەكوبازار اشىلدى

ايماقتار • بۇگىن، 17:09

ۇقساس جاڭالىقتار