ايماقتار • 31 ناۋرىز، 2020

تۇركىستاندا ەرىكتى ۇستازدار 90 مىڭنان استام بەتپەردە تىگىپ تاراتتى

22 رەتكورسەتىلدى

تۇركىستان وبلىسىندا ۇستازدار قولدان 91 878 مەديتسينالىق بەتپەردە تىگىپ شىقتى. بەتپەردەلەر وڭىردەگى اۋىل، قالا تۇرعىندارىنا، الەۋمەتتىك از قامتىلعان وتباسىلارعا، دارىحانالارعا جانە مەكتەپ قىزمەتكەرلەرى مەن وقۋشىلارعا تەگىن تاراتىلدى.

بۇل يگى ىسكە وبلىس كولەمىندە جالپى 1980 وقىتۋشى ءوز ەرىكتەرىمەن قاتىسقان. سونىڭ ءبىرى كەنتاۋ قالاسىنداعى ب.مومىش ۇلى اتىنداعى جالپى ورتا مەكتەبىنىڭ ينفورماتيكا ءپانىنىڭ مۇعالىمى ايگۇل ارىستانبەكوۆا. ول قوعامعا قاۋىپتى ىندەتتىڭ تارالۋى كەزىندە ءدارىحانالاردا بەتپەردەلەردىڭ جەتىسپەۋشىلىگى الاڭداتقانىن جانە سول ءۇشىن بەتپەردە تىگۋ ىسىنە بەلسەنە اتسالىسقانىن ايتتى.

«وسىنداي قيىن شاقتا ءبىز بىرىگۋىمىز كەرەك. ءوزىمىزدى عانا ويلاماي جاقىندارىمىزدى، الەۋمەتتىك جاعدايى تومەن وتباسىلارعا دا قامقورلىق تانىتقانىمىز دۇرىس. وسى رەتتە بەتپەردەنىڭ جەتىسپەۋشىلىگىن بىلگەن سوڭ ۇجىماستارىمىزبەن اقىلداسىپ، بەتپەردە تىگۋدى قولعا الدىق. ەل باسىنا كۇن تۋعان كەزدە قول قۋسىرىپ وتىرماي، تىعىرىقتان شىعۋدىڭ جولدارىن ويلاستىرىپ، ونى ىسكە اسىرۋ ءاربىر جاننىڭ ازاماتتىق بورىشى دەپ بىلەمىز»، – دەدى ايگۇل ارىستانبەكوۆا.

ايتا كەتەيىك، اتالعان ءبىلىم ورداسىنىڭ قىزمەتكەرلەرى 22-30 ناۋرىز ارالىعىندا ءوز ەرىكتەرىمەن كەزەكشىلىككە ءتۇسىپ، ءبىر كۇندە شامامەن 2-2،5 مىڭ دانا بەتپەردە دايىنداعان. مۇنداي ەرىكتى ۇستازداردىڭ يگى باستامالارىن ەستىگەن قالا تۇرعىندارى دا ءوز ۇيلەرىندە بەتپەردە تىگىپ مىڭعا تارتا بەتپەردەنى ورتاق قورعا قوسقان.

سوڭعى جاڭالىقتار

ەلدىك نىشاندار تاريحى

قازاقستان • كەشە

ۇقساس جاڭالىقتار