حوككەي • 30 ناۋرىز، 2020

شايبالى حوككەي: اتتە وحتاماا «بارىستان» كەتتى

292 رەتكورسەتىلدى

قۇرلىقتىق حوككەي ليگاسىنداعى (قحل) نۇر-سۇلتاننىڭ «بارىس» كلۋبىندا ويناعان فينليانديالىق قورعاۋشى اتتە وحتاماا كەلەسى ماۋسىمدى ءياروسلاۆلدىڭ «لوكوموتيۆىندە» وتكىزەدى.

 32 جاستاعى  سۋومي ەلىنىڭ وكىلى ءار جىلدارى فينليانديا چەمپيوناتىنداعى «كيارپيات» پەن «يوكەريت»، قازاننىڭ «اق بارس» جانە شۆەيتساريانىڭ «لۋگانو» كلۋبتارىندا ونەر كورسەتتى. تاتارستاندىق كوماندا ساپىندا گاگارين كۋبوگىن جەڭىپ الدى. ۇزاق جىلدار ءوز ەلىنىڭ ۇلتتىق قۇراماسىنىڭ نامىسىن قورعاپ، 2014 جىلى الەم چەمپيوناتىنىڭ كۇمىس جۇلدەگەرى جانە 2019 جىلى الەم چەمپيونى اتاندى.

2019/2020 جىلعى ماۋسىمدى وحتاماا «بارىستىڭ» ساپىندا وتكىزدى. سول ارالىقتا 36 مارتە مۇز ايدىنىنا شىققان ول التى گول سوعىپ، 15 رەت ناتيجەلى پاس بەردى. بارلىعى – 21 ۇپاي. پلەي-وفف دوداسىندا ءبىر گول سوعىپ، ءبىر مارتە وڭتايلى پاس بەردى.  

اتتە وحتاماا مەن «بارىس» اراسىنداعى كەلىسىمشارتتىڭ مەرزىمى 30 ساۋىردە اياقتالادى. سودان كەيىن ايتۋلى حوككەيشىنىڭ اگەنتتەرى ونىڭ ءياروسلاۆلدىڭ «لوكوموتيۆىنە» اۋىساتىنى جايىندا مالىمدەدى. سونىمەن قاتار، فينليانديالىق قورعاۋشىعا ماگنيتوگرسكىنىڭ «مەتاللۋرگى» كوز تىككەن بولاتىن. الايدا ويىنشىنىڭ تاڭداۋى «لوكوموتيۆكە» ءتۇستى.

سوڭعى جاڭالىقتار

ۇقساس جاڭالىقتار