سۇحبات • 29 ناۋرىز، 2020

«ءوز ابايىمدى» جازىپ كەتسەم، ارمانىم جوق

355 رەتكورسەتىلدى

«مەنىڭ سۇيىكتى كىتابىم – قۇران-كارىم، ال ەرەكشە جاقسى كورەتىن اقىنىم – سەرگەي ەسەنين» دەيدى بۇگىندە جەتپىس جاستىڭ جەلكەنىن كەرگەن اقيىق اقىن سەرىك اقسۇڭقار ۇلى.

وسىدان جارتى عاسىر بۇرىن  قازاق ادەبيەتىنە «داۋىلداي ورتكە تيگەن ولەڭىمەن» قۇبىلىس بولىپ كەلگەن اقىن پوەزيا پاتشالىعىنىڭ تورىندەگى ورىنتاعىنان ءالى تۇسە قويعان جوق. قايتا، قايىرىپ سالعان قىرانداي شىعارماشىلىق جۇمىستىڭ «قىزىلىنا» قۇلشىنىستى شابىتپەن بۇرىنعىدان بەتەر شۇيىلە تۇسكەن كورىنەدى: كۇن دەمەي، ءتۇن دەمەي جازۋ ۇستىندەمىن دەيدى ءوزى.

جازۋدىڭ مەحناتىنان جانىنىڭ داۋاسىن تاپقان ءبورى تەكتەس اقىنمەن مەرەيتويىنىڭ الدىندا جولىعىپ، از-كەم اڭگىمە-دۇكەن قۇرعان ەدىك. مارحاباتپەن ۇسىندىق سىزدەرگە!

– بيىل ابايدىڭ 175 جىلدىق مەرەيتويى. ءوزىڭىزدى حاكىم سالعان سارا جولداعى سانا بيىگىنە كوتەرىلگەن اقىننىڭ ءبىرى سانايسىز با؟ ءسىزدىڭ اباي – ول قانداي اباي؟

– اباي – الاشتىڭ رەنتگەنى! ءبارىمىز دە كەۋدەمىزدى اشىپ سونىڭ الدىندا تۇرمىز: كەۋدەمىزدە قانداي ءورت؟ كوكىرەگىمىزدە نەندەي دەرت؟! سونىڭ ءبارى ابايدان ايناعا تۇسكەندەي كورىنىپ تۇر!

باسىنا كۇن تۋعاندا عانا اللاسىن ەسكە الاتىن ولىمگە بولا تۋعان ماڭدايى قۋشىق پەندە قۇساپ، مەن دە تاعدىردىڭ تالكەگىنە تۇسكەندە ابايدىڭ قارا تومدارىنا ۇڭىلەمىن، سوندا ول سول ساتتەگى كوڭىل كۇيدى تاپ باسادى! دەرتىمە ودان باسقا داۋا تاپپاي بارامىن: «اباي 1902 جىلدان كەيىن ولەڭ جازعان جوق» دەيدى مۇحتار اۋەزوۆ. ول سوندا ەلۋ ءتورت جاستا ەكەن. جەتپىسكە كەلگەن مەن دە بۇرقىراتىپ جازىپ جاتىرمىن. نە تىندىردىم؟! قالامداستارىما قاراسام، وزىمە دەگەن ءبىر قاناعات سەزىم لىپ ەتىپ، ابايعا قاراسام… كوكىرەگىم سىزداپ، كوڭىلىم قۇلازىپ كەتەدى – ەكى وتتىڭ ورتاسىندا ءجۇرمىن مەن! ونى وقىعان سايىن وزگەلەرگە عانا ەمەس، وزىمە ءوزىمنىڭ كوڭىلىم تولماي، كوكىرەگىم قارس ايىرىلىپ بارادى… اقىن كوپ بولمايدى عوي. ابايدىڭ تۇسىندا، ماعجاننىڭ، قاسىمنىڭ تۇسىندا قانشاما اقىندار بولدى. ابايدىڭ تۇسىندا دا قورا مەن قوپسىنىڭ اينالاسىنداعى اقىندار بولعان. بىراق، اباي ءبىر ءوزى تاريحتا قالدى. نەگىزى شىن اقىنداردان گورى ناشار اقىندار كوپ. ونىڭ ءبارىن ۋاقىت سۇرىپتايدى.

ايگىلى بوكسشى مۇحاممەد ءاليدىڭ رينگتەگى تەڭدەسسىز مانەرىن قايتالايمىن دەپ اۋىر سالماقتا ونەر كورسەتكەن بىلعارى قولعاپ شەبەرلەرىنىڭ بۇتىندەي ءبىر بۋىنى دالادا قالعان ەكەن. سول سياقتى ءسىزدىڭ پوەزياداعى قايتالانباس قولتاڭباڭىزعا ەلىكتەپ، سىزشە جازعان، جازىپ تا جۇرگەن اقىندار بار. بۇلار سوندا دۇرىس جولمەن كەلە جاتىر دەپ ويلايسىز با؟

– ءبىر كەزدە تۇمانبايعا ەلىكتەدىك، جۇمەكەننىڭ تەرەڭىنە دە سۇڭگىپ كورگىمىز كەلدى. قاداعانىڭ قالىڭ وي ورمانىنا كىرىپ كەتىپ، اداسىپ، شىعا الماي جۇردىك. مۇقاعاليدى ءپىر تۇتتىق. بۇل - زاڭدى قۇبىلىس. قانداي تالانت بولسىن، تاقىر جەردەن شىقپايدى، قۇنارلى توپىراقتان عانا تۋادى. اللاعا شۇكىر، ءبىز تۋعان اتىراۋ-ارقا-الاتاۋ-التاي ايماعى ادامزات قاۋىمداستىعىنىڭ ساياسي كارتاسىنداعى ەشكىمگە ۇقسامايتىن ۇلان بايتاق ولكە ەدى. مۇندا ءۇش مىڭ عاسىرداي سالت اتتى كوشپەلىلەر وركەنيەتى سالتانات قۇرعان! ۇلى ماعجان اسقاقتاتا جىرلاعان تۇران جەرى بۇل! ەپوس ەلى!

اسان قايعى  –  قارت ابىز، –

الدى جارىق بولعان، مىنە، ارتى  –  اڭىز.

انام  – ۇماي.

اتام  –  كوك تۇرىك.

قىزىم  –  قىز جىبەك.

ۇلىم  –  الپامىس!

جەردەن جەمىت تەرىپ جەگەن قۋلاردىڭ،

تالكەگىنە ءتۇسىپ قالاي ۋلاندىم؟

بال  –  تاندايىم.

جارقىراپ اق ماندايىم،

مەن  – ەپوستان تۋعانمىن.

كوز جۇمىلسا – كوك ءتاڭىردى كورەم كەپ،

كوكتە جۇرگەم.

كورگەن ەمەن تومەندەپ:

«قوزى كورپەش  –  بايان سۇلۋ» دەيتۇعىن

جىردان تۋعام  –

ونە-بويىم ولەڭ بوپ.

بەسىككە دە تۋا جىرمەن بولەنگەن،

ولەڭمەنەن ورەلەنگەن ءتول ەم مەن.

ومىرمەن دە كەمپىربايشا ەگىلىپ،

حوشتاسقانمىن ولەڭمەن!

التىندايىن حيسساعا اپتاپ ءوز باسىن،

بوزداسا جۇرت مىنا مەندەي بوزداسىن:

«قوزى كورپەش-بايان سۇلۋ»  –  جاناردان

اياگوزگە تامىپ كەتكەن كوز جاسىم!

جاناقتايىن جاسىن بولىپ جارق ەتىپ،

قاسىم بولىپ، –

قاراورمانعا انت ەتىپ، –

و، عالامزات!

ساعان ۇشىپ كەلەمىن،

ماحابباتسىز دۇنيەنى تارك ەتىپ!

...اتشا تۋلاپ،

الپىس ەكى تامىرىمنىڭ بۇلكىلى،

ساعىنىشتان سارعايدى ىزدەپ تۇركىنى;

ءۇيسىن،

ارعىن،

اداي بولىپ الدىم دا،

اباي بولدىم ءبىر كۇنى...

ءبىز الدىمىزداعى اعا بۋىندى اۋليە كورىپ، ءپىر تۇتقان بۋىنبىز، ءوز سوقپاعىمىزدى تاۋىپ الساق دەدىك. ولار بولماسا، ءبىز دە جوق ەدىك. سەنىڭ ساۋالىڭ اندرەي ۆوزنەسەنسكيدىڭ «پوۆتورەنيە – مات تۆورەنيا»، دەگەنىن ەسكە تۇسىرەدى.  ءبىز وسىنداعى «شالا شەكسپير»، «بولماي قالعان بەلينسكيلەر» قۇساپ «بىزگە دەيىن ءجوندى ادەبيەت بولماعان...»، دەپ ويلاعان دا، ايتقان دا ەمەسپىز... وكىنىشكە قاراي، سول ءسوزدى ءبىر شيكى بالالار ايتىپ ءجۇر قازىر...

1986 جىلعى جەلتوقسان قوزعالىسى كەزىندەگى قاراعاندىدا بولعان ستيحيالى تۇردەگى ميتينگتە ءبىر جاس جىگىت ءسىزدىڭ «قاسقىردىڭ مونولوگى» اتتى ولەڭىڭىزدى وقىعاندا، جۇرتتىڭ ەرەكشە تەبىرەنگەنى ەستە قالىپتى... وسى ولەڭدى قانشا جاسىڭىزدا، قانداي جاعدايدىڭ كۇيىندە جازىپ ەدىڭىز؟

– ۇمىتپاسام، بۇل ولەڭ وتكەن عاسىردىڭ 70-ءشى جىلدارى جازىلدى. ازاتتىقتى اڭساپ، كوكبورى بولمىستىڭ ىشتەگى قىجىلدىڭ سىرتقا شىعۋىن قالاعان تىلەكتەن تۋعان عوي جىر عوي. بايقايمىن، جاستارعا بۇل ولەڭىم ۇنايتىن بولسا كەرەك، ورتا تولعان ءتۇرلى وتىرىستاردا وقيدى ەكەن دەگەندى ەستيمىن...

ال ەندى، جەلتوقسان وقيعاسى كەزىندە  وقىلعانىن بىلمەيدى ەكەنمىن. ولەڭنىڭ وسىنداي تاعدىرشەشتى كەزەڭدەگى تاريحي وقيعالار ۇستىندە وقىرمان جۇرەگىندەگى تىلەكپەن قاۋىشقانىنا قۋانۋ كەرەك، ارينە. ياعني، ول ءوزىنىڭ ميسسياسىنا ادال دەپ ەسەپتەۋگە بولاتىن شىعار.

– وسى جاسقا دەيىن جەرگىلىكتى اتقارۋشى بيلىكتىڭ وڭ نازارىندا بولىپ كەلەسىز. مۇنى ءسىزدىڭ ءتىل تابىسۋعا ۇستا ديپلوماتيالىق قابىلەتىڭىز دەپ قابىلدايمىز با، الدە بيلىكتىڭ اتاقتى اقىندى وزىنە نيەتتەس ەتىپ الۋدا ۇستانعان سۇڭعىلا ساياساتىنىڭ جەمىسى دەپ باعالايمىز ما؟

– بۇدان «ديپلوماتيا» ىزدەۋدىڭ كەرەگى جوق، جاڭا قوعام قۇرىپ جاتقان ەلىڭە قالايشا سىرتىنان سىناپ، مىنەپ قاراپ تۇراسىڭ؟ ءبىر فورماتسيادان ەكىنشى فورماتسياعا ءوتۋ قيامەت-قايىم دۇنيە. ورىنى ويسىراعان كەمشىن زاتتار قايتسە دە بولماي قويمايدى. اۋىر جۇكتى ەلىڭمەن بىرگە كوتەرۋ – مەنىڭ ازاماتتىق پوزيتسيام، مىنە، وسى! ەل نە دەسە و دەسىن!

– ءسىزدىڭ شىعارماشىلىعىڭىزدى جاقسى بىلەتىن اعا بۋىن وكىلدەرىنەن ەگەر سەرىك اقسۇڭقار ۇلى پروزا سالاسىندا قالام تەربەگەندە، ول اقىندىعىنان الدەقايدا قۋاتتى بولار ەدى دەگەندى ەستىپ ەدىك... ءسىز مۇنىمەن كەلىسەر مە ەدىڭىز؟

– مەن ءۇشىن پروزا دا – پوەزيا! ايىرماشىلىعى – اقىننىڭ پروزاسى ول.

– جازبا اقىندارىنىڭ ءمۇشايراسى كوبەيدى. سونىمەن بىرگە، بۇل سالاعا جەڭ ۇشىنان جالعاسقان سىبايلاستىق سيپاتى بار ءىس-ارەكەتتەردىڭ سىڭە باستاعانى تۋرالى دا ارەدىك ايتىلىپ قالىپ ءجۇر. قازىلار القاسىندا ءجيى وتىراسىز، ءسىزدىڭ پىكىرمەن جۇرتتىڭ ءبارى ساناسادى. وسى تۇرعىدان كەلگەندە، جوعارىداعى سىني پىكىرلەردىڭ جانى بار دەپ ويلايسىز با؟

– ءمۇشايرا – بۇگىندە جازبا اقىنداردىڭ كۇنكورىس كوزى. كۇنكورىس جۇرگەن جەردە داۋ-داماي دا جۇرەدى... قالاماقى ماسەلەسى جونىمەن شەشىلسە، اقىنداردىڭ وندا نەسى بار؟

ءسىز ۇزاق جىلدار قازاقستان جازۋشىلار وداعىنىڭ قاراعاندى بولىمشەسىن باسقاردىڭىز. وسىدان ءبىراز جىل بۇرىن ءسىزدىڭ ارىپتەستەرىڭىزدىڭ بۇل سالاداعى جۇمىسىڭىزعا سىن ايتقانى ەستە. بۇگىنگىنىڭ بيىگىنەن بۇعان قانداي جاۋاپ بەرەر ەدىڭىز جانە سول بولىمشەنىڭ تىزگىنىن سەنىمدى قولعا تاپسىردىم دەپ ويلايسىز با؟

– جازۋشىلار وداعى دەگەن قاشاندا داۋ-دامايدىڭ ورداسى بولعان. سوۆەت وكىمەتى كەزىندە سونداي ەدى، قازىر، ءتىپتى، ونىڭ داۋى كۇننەن-كۇنگە ءورشىپ بارادى. مەن 1991 جىلدان وسى وداقتىڭ قاراعاندى، جەزقازعان وبلىستارىنداعى بولىمشەسىن باسقارىپ ەدىم، ابىروي دا، العىس تا المادىم. الاتىن ايلىعى ءوز الدىنا، وتىراتىن كەڭسەم دە بولعان جوق. بىراق، قولدان كەلگەن جۇمىستى اتقاردىق. قاراعاندى ءبىر كەزدەگى كارلاگتىڭ تۋ تىككەن جەرى عوي. جاڭا عانا قازاقتانىپ، ۇلتتىق ناقىش رەڭ الا باستادى. سونىڭ ءبارى وپ-وڭاي بولا سالدى دەپ ويلايسىڭ با؟ ءالى ەسىمدە، 90-جىلدارى قاراعاندىنىڭ سوۆەتسكايا داڭعىلىنا بۇقار جىراۋدىڭ اتىن بەرەمىز دەپ، جىلقىشىعا جىر، قويشىعا ءسوز بولعانبىز. الەكين دەگەن ءبىر جازارمان ابايدىڭ «شورتانباي، دۋلات پەنەن بۇقار جىراۋ، ولەڭى ءبىرى – جاماۋ، ءبىرى – قۇراۋ...» دەگەنىن تاۋىپ الىپ، وسى دا اقىن با دەپ، قاراعاندىنى ءبىر شۋلاتقان! ونى وعان قازاق اۋدارىپ بەرگەن! ال، كەرەك بولسا؟! مەن سول كەزدە «... ويىنا كەلگەنىن ىستەي مە؟!» دەپ «ورتالىق قازاقستان» گازەتىنە ماقالا جازدىم. سوندا وبلىس اكىمى پەتر نەفەدەۆ «ۇلت ارازدىعىن تۋدىرىپ جاتىر» دەپ مەنى سوتتاتىپ جىبەرمەك بولعان...

لەنيننىڭ ەسكەرتكىشىن الۋ دا وڭاي بولدى ما بىزگە؟ قاراعاندىدا قالالىق اكىمدىكتىڭ الدىندا اق ماڭدايى جارقىراپ قازداۋىستى قازىبەك تۇر! ولاي-بۇلاي وتكەن جۇرگىنشىنى كەرۋەن سارايدىڭ الدىنان قانىش ساتباەۆ قارسى الادى! ارادا 100 جىل وتكەندە كىر جۋىپ، كىندىك كەسكەن جۇرتىنا قاسىم اقىن قايتىپ كەلدى! «سارىارقا» كىتاپحاناسى ايدارىمەن قاراعاندى قالامگەرلەرىنىڭ 100 تومى جالعاننىڭ جارىعىنا شىقتى، قازداۋىستى قازىبەكتەن جاپ-جاس ميراس اسانعا دەيىنگى جىر ءتاجى بۇل! ءار ەكى اي سايىن رەسپۋبليكالىق «قاسىم» جۋرنالى جارىق كورىپ تۇرادى. ەندى ارقادا «قاسىم ءۇيى» شاڭىراق كوتەرگەلى جاتىر. وسى وقيعالاردىڭ بەل ورتاسىندا قازاقستان جازۋشىلار وداعىنىڭ وبلىستىق بولىمشەسى ءجۇردى عوي!  مىناۋ ولەڭ سول كەزدە جازىلعان:

قازاقستان جازۋشىلار وداعىنىڭ فيليالى،

ەتەك-جەڭىن ەندى كەپ جينادى.

ونى قيناسا، –

سوۆەت وكىمەتى قينادى;

قاز داۋىستى قازىبەكتەن –

ميراسقا دەيىنگى بۋىننىڭ ءجۇز تومىن،

وعان ءتاڭىرى سىيلادى!

ەتەك-جەڭىن ەندى كەپ جينادى.

مەن وعان سىيماسام قايتەيىن،

ءبىر كەزدە جاقاڭ دا* سىيمادى...

جارقىراپ كۇن ديدارى،

ەتەك-جەڭىن ەل جاڭا جينادى.

... 70-كە، 80-گە كەلگەنشە جازباعان دۇنيەڭدى،

جازىپ بەرە مە –

جازۋشىلار وداعىنىڭ فيليالى...

(*جايىق بەكتۇروۆ – قازاقستان جازۋشىلار وداعىنىڭ قاراعاندى-جەزقازعان وبلىستىق بولىمشەسىنىڭ جاۋاپتى حاتشىسى (1957-1990 ج.ج. – ق.ءا)).

وسىدان ءبىر-ەكى جىل بۇرىن ءوز وتىنىشىممەن ودان كەتتىم. «ورنىما مەنەن گورى ىسكەر، مەنەن گورى تالانتتى جاستى قويۋ كەرەك» دەپ ۇسىنىس جاسادىم. «ونداي ادام بار ما؟» دەدى. «بار، «قاسىم» جۋرنالىنىڭ رەداكتورى سەرىك ساعىنتاي» دەدىم. قازىر فيليالدى سول جىگىت باسقارىپ ءجۇر.

«قازاققا ەس كىرگەندە، اباي ەسكىرەدى» دەگەن ءسوزدى ءسىز ءوز بيىگىڭىز تۇرعىسىنان قالاي ۇعىنىپ، قايتىپ تاپسىرلەر ەدىڭىز؟

بىرەۋلەر اسقار سۇلەيمەنوۆتىڭ  «قازاققا ەس كىرگەندە، اباي ەسكىرەدى» دەگەن ءسوزىن قاعىپ الىپ، سان-ساققا جۇگىرتىپ ءجۇر. اباي دا ۋاقىتشا ەكەن دەپ ءماز-ءمايرام بولادى! وزدەرى عانا ماڭگىلىك سەكىلدى... اباي ەسكىرمەيدى! قازاق حالقى قانداي ماڭگىلىك بولسا، ول دا ماڭگىلىك! مۇحتار اۋەزوۆ ءوزىنىڭ ءداۋىرناماسىن نەگە «اباي جولى» دەپ اتادى؟ الاش ماڭگى ەل بولعىسى كەلسە، وسى اباي جولىمەن ءجۇرۋى كەرەك دەگەندى يشارات قىلعانى ول! اللانىڭ جولىنا ءتۇسۋ ءۇشىن ەڭ اۋەلى اباي جولىنا ءتۇسۋىمىز كەرەك-ءتى. اسقاردىڭ دا جۇمباقتاپ ايتىپ وتىرعانى وسى عوي! اسقار سۇلەيمەنوۆتى ىندەتىپ وقىساڭ، ونىڭ ابايدى قالاي ءپىر تۇتقانى تايعا تاڭبا باسقانداي كورىنىپ تۇر عوي. «مەن شىڭعىستاۋعا ابايدىڭ باسىنا كۇللى كۇنامنان ارىلۋ ءۇشىن بارامىن!» دەگەن جوق پا؟! حاكىمدى قىزىل ءسوزدىڭ قىجىرتپاسىنا اينالدىرماي، ءبىز دە ونى، وسپادار ويىمىز بەن كۇللى كۇنامىزدان ارىلۋ ءۇشىن توبىر بولماي، ەل بولۋ ءۇشىن باسىمىزعا جاستانىپ وقۋىمىز كەرەك! ۇزىن ءسوزدىڭ قىسقاسى – وسى!

ءسىز ءۇشىن اتاقتىڭ قانداي پايدالى جاعى بار؟ مىسالى، ءسىز بىرنەشە رەت مەملەكەتتىك سىيلىققا ۇمىتكەر رەتىندە ۇسىنىلىپ، لاۋرەاتتىققا قول جەتكىزە الماي قالدىڭىز. وسى جايت ءسىزدىڭ جان-دۇنيەڭىزگە، شىعارماشىلىعىڭىزعا كەرى اسەرىن تيگىزدى مە؟

– ەشكىمگە ەشقانداي دا رەنىشىم جوق. بۇل سىيلىقتى مەن تۇگىلى كەزىندە قاسىم دا، مۇقاعالي دا الا الماعان...

– ءسىز ءوزىڭىزدىڭ ەڭ باستى شىعارماڭىزدى جازا الدىڭىز با؟ جالپى، شىعارماشىلىق ومىردە بولسىن، بىلايعى پەندەاۋي تىرلىكتى العاندا، ءوزىڭىزدى ءتورت قۇبىلاسى تۇگەل باقىتتى جانمىن دەپ سانايسىز با؟

– ءبىز ابايدان كەرى، كەيىن شەگىنىپ بارامىز! بىزدىكى بوس اۋرە ەكەن، اتتەڭ، قاسىم، مۇقاعالي، جۇمەكەندى دە وسىلاي ءبىر ءسۇزىپ شىعاتىن بىرەۋ بولسا، ولەڭ جازۋدىڭ تەحنيكاسىن مەڭگەرىپ الىپ، بۇرقىراتىپ جازا بەرەتىن پروفەسسيونالدىق اقىندىقتىڭ دا ايىقپاس ءبىر دەرت ەكەنىن الەكساندر بلوك باياعىدا-اق ايتىپ كەتىپتى. الدىمىزدا ابايداي ۇلى ۇلگى تۇرعاندا مۇنىمىز نە؟! ەندى عۇمىرىم جەتسە، ء«وز ابايىم» (م.تسۆەتاەۆانىڭ «موي پۋشكينى» سەكىلدى) تۋرالى ءبىر كىتاپ جازىپ كەتسەم، ارمانىم بولماس ەدى. ەندى، اللا جازسا، سوعان وتىرامىن!

– جاس كەزىڭىزدە ءسىزدى قولىنا دومبىرا الىپ، ايتىسقا قاتىسقان دەپ ەستىدىك. وسى راس پا؟ جالپى، پوەزيادا جازبا اقىن مەن ايتىسكەر شايىردى سالىستىرۋعا بولا ما؟ نەمەسە ايتىسكەردەن جاۋھار دۇنيەلەر تۋدىراتىن جاقسى اقىن شىعا ما؟

– ءالى ەسىمدە، وتكەن عاسىردىڭ 80-جىلدارى اۋدان، سوۆحوزداردا دا ايتىس بولدى. ءبىز ءسوزىن جازىپ بەرەمىز، بىرەۋلەر انگە سالىپ ايتۋشى ەدى. ايتىس كەيىننەن، 90- جىلدارى ۇلتتىق ناقىش الدى عوي. سۋىرىپ سالىپ ايتۋ ونەرى قازاق، قىرعىزعا ءتان ەرەكشە ونەر-ءدى... «كەمپىربايدىڭ اسەتپەن باقۇلداسۋى» دەگەن ءبىر جىر بار.  الەم ادەبيەتىندە جوق مۇنداي جاۋھار دۇنيە! قازاق اقىنىنىڭ سۋىرىپ سالىپ ايتقان جىرى! سول ولەڭ تۇپنۇسقاداعىداي كوركەم قالپىندا باسقا تىلگە ءتارجىمالانا ما؟

سول كەمپىربايدان بىزگە جەتىپ، جيىرماسىنشى عاسىردىڭ شاڭىنا كومىلگەن ايتىس ونەرىن ارقاسىنا ارۋاق قونعان ءجۇرسىن ەرمان بەتىندەگى شاڭ-توزاڭىن ءسۇرتىپ، جەتى قات جەردىڭ قالىڭ قاتپارىنان سۋىرىپ العان ەدى. كەيىنگى كەزدە ول دا قوجىراپ بارادى...

بۇل كوشپەلىلەردىڭ ءومىر ءسۇرۋ سالتىنىڭ ءبىر ءتۇرى ەدى. ونى وسى زامانعى پوەزيامەن سالىستىرۋعا بولمايدى!

– قازىرگى تاڭدا ءسىزدى الەم بويىنشا، سونان سوڭ قازاقستاندى العاندا نە نارسە قاتتى الاڭداتادى، تولعاندىرادى؟

– الاڭداتاتىن دۇنيە كوپ-اق. مىناۋ قىتايدان كەلگەن كوروناۆيرۋس، تەڭگەنىڭ قۇنسىزدانۋى دا وڭاي بولىپ تۇر ما؟ ماسەلە – وسىدان امان-ەسەن وتۋدە. وعان قازاقتىڭ ەرىك-جىگەرى جەتەدى دەپ ويلايمىن.

– قازاقستان جازۋشىلار وداعىنىڭ قازىرگى جۇمىسىنا كوڭىلىڭىز تولا ما؟ جالپى، ءبىزدىڭ قوعامدا ءوزىنىڭ ازاماتتىق پوزيتسياسىن باتىل ءبىلدىرىپ جۇرگەن اقىن-جازۋشىلار دەپ كىمدەردى اتاي الاسىز؟

– قازاقستان جازۋشىلار وداعىنىڭ بۇگىنگى قولعا الىپ جاتقان ىستەرىنە كوڭىل تويادى. وسى كۇنگى قازاق جىرىنىڭ ءىنجۋ-مارجانى بۇۇ-نىڭ التى تىلىندە جاريالانىپ جاتىر، ونىڭ ىشىندە مەنىڭ دە ءبىراز ولەڭىم بار. ەكى بىردەي حالىقارالىق فورۋم ءوتتى. ازىرگە بۇل از شارۋا ەمەس، ارينە.

ازاماتتىق پوزيتسياسىز ادەبيەت بولمايدى. قوعام، زامان تۋرالى ءوزىنىڭ باتىل ويلارىن ورتاعا سالىپ جۇرگەن قالامگەر كوپ-اق. قانشاما جىل بولدى، جازعانىنا قالاماقى الماي-اق جازىپ جاتقان كىمدەر؟ قازاق قالامگەرلەرى!

– انا ءۇشىن بالاسىنىڭ ءبارى بىردەي. دەگەنمەن، انا ەكەش انانىڭ دا جاسىرىپ جاقسى كورەتىن بالاسى بولۋى مۇمكىن عوي. وسى تۇرعىدان كەلگەندە، ءسىزدىڭ پوەزيادا باعىڭىزدى اشقان، بىلايشا ايتقاندا، قازىر باسقاسىنان جوعارىراق باعالايتىن تۋىندىڭىزدى اتاي الاسىز با؟

– اقىننىڭ سوڭعى ولەڭى جانىنا جاقىن بولادى. دەگەنمەن، كوزىمە ەرەكشە ىستىعى – «حح عاسىردىڭ 20 ءساتى» اتتى پوەما-پانوراما. ونىڭ العاشقى نۇسقاسى «سوتسياليستىك قازاقستاننىڭ» ءبىر بەتىن تۇتاس الىپ شىعىپ ەدى ءبىر كەزدە. سوندىقتان، «ەگەمەن قازاقستاننىڭ» ورنى ماعان ەلدەن ەرەك بولەك!

– اڭگىمەڭىزگە راحمەت. سوم جۇرەك سوعىسىنان، جۇيرىك قالام سىلتەسىنەن جاڭىلماسىن!

 

اڭگىمەلەسكەن قايرات ءابىلدا،

«Egemen Qazaqstan»

قاراعاندى

سوڭعى جاڭالىقتار

Covid-19: تاعى 3 ادام كوز جۇمدى

كوروناۆيرۋس • كەشە

Covid-19: 184 ادام جازىلىپ شىقتى

كوروناۆيرۋس • كەشە

نۇكتە فيلوسوفياسى

رۋحانيات • كەشە

ۇقساس جاڭالىقتار