سۋرەتتى تۇسىرگەن ەرلان ومار, «EQ»
كلينيكا ديرەكتورى مۇحتار تولەۋتاەۆتىڭ ايتۋىنشا, قازىرگى ۋاقىتتا ۆيرۋس جۇقتىرعان 28 ادامنىڭ جاعدايى قالىپتى. «كۇندەلىكتى تەمپەراتۋرا, قان قىسىمدارى تەكسەرىلىپ, دارىگەرلەر مەن مەيىربيكەلەردىڭ باقىلاۋىنداعى جانداردا كلينيكالىق اۋرۋدىڭ بەلگىلەرى جوق, تەك تاپسىرعان سىنامالارىنان ۆيرۋس تابىلعانى بولماسا», دەگەن مۇحتار ەسەنجان ۇلىنان ورتالىقتىڭ جۇمىسىنىڭ جاي-جاپسارىن سۇراپ بىلدىك.
حالىق «جامان ايتپاي جاقسى جوق», «قامدانعان قاپى قالمايدى» دەپ بەكەر وي تولعاماسا كەرەك. سوندىقتان جان-جاقتى قامدانعان ورتالىقتا بۇگىندە 60-تان استام دارىگەر مەن باسقا مەديتسينا قىزمەتكەرلەر كۇنى-ءتۇنى ۇيلەرىنە كەتپەستەن ورتالىقتا توتەنشە جاعدايدىڭ قاجەتتىلىگىنە وراي جۇمىس اتقارۋدا. ۆيرۋستىڭ ادام وكپەسىنە تيگىزەر زيانىن, سونداي ۋاقىتتا وزدىگىنەن تىنىس الا الماي قالاتىنىن ەسەپكە الا وتىرىپ, قالاداعى وزگە كلينيكالاردان وعان قاجەتتى اپپاراتتار جەتكىزىلىپتى. قازىر اپپاراتتار قولدانىسقا دايىن. سونداي-اق باسقا ەمدەۋ مەكەمەلەرىنەن كومەككە دارىگەرلەر كەلدى. ال ەمدەۋ شارالارى دەنساۋلىق ساقتاۋ مينيسترلىگىنىڭ حالىقارالىق ستاندارتتار نەگىزىندە بەكىتكەن حاتتامالارى بويىنشا جۇزەگە اسىرىلادى, الايدا سول حاتتامالاردى قولدانباي-اق امان وتسەك دەيمىز, دەيدى دارىگەرلەر قاۋىمى.
كۇنى بويىنا قورعانىش كيىمدەرىمەن تۇمشالانىپ ەڭبەك ەتۋ وڭاي ەمەس, بىراق بۇل مەديتسينا قىزمەتكەرلەرىنىڭ وزدەرى ءۇشىن دە, پاتسيەنتتەر مەن كارانتيندە جاتقان 245 ادام ءۇشىن دە ماڭىزدى. باقىلاۋداعى ادامداردى كۇنىنە بىرنەشە رەت تەكسەرۋ تولىقتاي قورعانىش كيىمىن كيۋمەن عانا اتقارىلادى. بۇل قاۋىپسىزدىك ءۇشىن قاجەتتى قادام, ال مۇنداي كيىمدەر جەتكىلىكتى. كوپسالالى ورتالىق ۆيرۋس دەپ قانا وتىرعان جوق, جوسپارلى جۇمىستارى دا ءجۇرىپ جاتىر, ال ىندەت ىلمەگىنە ىلىككەندەردى قامتۋعا ورتالىقتا 387 ورىن ءبولىنىپتى.
بۇل ۆيرۋس تۇتاس قوعام ءۇشىن سىن بولىپ وتىر. مەنى بۇل ىندەت اينالىپ وتەدى دەپ ەشكىم دە كەپىلدىك بەرە المايدى. سوندىقتان ءار ادام جەكە باسىنىڭ تازالىعىن ساقتاۋمەن قاتار, كوپشىلىك جينالاتىن جەردەن اۋلاق جۇرگەنى, قوعامدىق ورىندارعا بارماعانى ابزال. ول بىرىنشىدەن, ءوزىن كەسەلدەن ساقتاعانى, ەكىنشىدەن, ماڭايىن, جاقىن-جۋىقتارىن قورعاعانى بولىپ شىقپاق, ال بىزدەر دارىگەرلەر قولىمىزدان كەلگەندى اتقارۋعا تاس-ءتۇيىن دايىنبىز. بۇگىندە قان قۇرامىندا ۆيرۋس بار ادامداردا كلينيكالىق بەلگىلەر بولماعانىنا قاراماستان, جاعدايعا ءجىتى قاراۋ مىندەتىمىز, – دەيدى كلينيكا باسشىسى بىزبەن اڭگىمەسىندە.
