ماڭعىستاۋ وبلىسى قان ورتالىعىنىڭ ديرەكتورى رافاەل سارساماليەۆتىڭ ايتۋىنشا, قانعا دەگەن جانە ونىڭ كومپونەنتتەرىنە سۇرانىس تومەندەگەن جوق, الايدا وسىلاي جالعاسا بەرەتىن بولسا, مەديتسينالىق مەكەمە سۇرانىس بەرۋشىلەردىڭ ءوتىنىشىن ورىنداي الماۋى عاجاپ ەمەس. بۇل جاعداي تەك ماڭعىستاۋ وڭىرىندە عانا ەمەس, جالپى رەسپۋبليكا بويىنشا سەزىلە باستاعان.
- سول سەبەپتى ءبىز بارلىق ەرىكتى دونورلاردى قان تاپسىرۋعا شاقىرامىز. ءبىزدىڭ ورتالىقتىڭ ەسىگى اشىق, ال ماماندارىمىز بولسا بەتپەردە كيىپ جۇرەدى. ياعني, قانداي دا ءبىر اۋرۋدى جۇقتىرۋ قاۋپى جوق دەپ سەندىرە الامىز. ونىڭ ۇستىنە بۇرىنعىداي حالىق كوپ كەلۋدى ازايتتى. ال قان تاپسىرۋعا نيەت بىلدىرگەندەر بولسا, ولارمەن الدىن الا سويلەسەمىز, ەگەر دە جاقىن ارادا الىس نەمەسە جاقىن شەت ەلدەردە بولعاندارى بولسا, ولاردان مۇلدەم قان الىنبايدى, - دەيدى ول.
جالپى وڭىردە قان جانە ونىڭ كومپونەنتتەرىمەن 14 مەديتسينالىق ۇيىم قامتاماسىز ەتىلەدى. ولاردىڭ ىشىندەگى ەڭ ءىرى مەكەمەلەر قاتارىنا وبلىستىق اۋرۋحانا, كوپبەيىندى بالالار اۋرۋحاناسى, ونكولوگيالىق ديسپانسەر, وبلىستىق جانە قالالىق پەريناتالدىق ورتالىقتارى, سونىمەن قاتار قالالىق جانە اۋداندىق اۋرۋحانالار بار.
ءوز سوزىندە رافاەل سارساماليەۆ قان قۇيۋ ەڭ الدىمەن جول-كولىك وقيعاسىنان, وندىرىستىك نىساندارىندا جاراقات العاندار, اۋرۋحانادا ءتۇرلى كۇردەلى وتا جاساعاندا, سونىمەن قاتار پەريناتالدىق ورتالىقتاردا بوسانعان ايەلدەرگە قاجەت ەكەندىگىن ايتادى. اسىرەسە, ونكولوگيالىق اۋرۋعا تاپ بولعان جاندارعا, ونىڭ ىشىندە لەيكوز جانە گەموفيلياعا شالدىققانداردىڭ ءومىرىن ۇزارتۋعا اۋاداي قاجەت. ماسەلەن, حيميوتەراپيادان سوڭ ناۋقاسقا ترومبوتسيت, ەريتروتسيت جانە بەلوكتار قورىن تولىقتىرۋ ءۇشىن اسا قاجەتتىلىگى تۋىندايدى.
- ارينە, جاعداي قاتتى قيىن دەۋدەن اۋلاقپىن, ال قان قورى بولسا ازىرگە جەتەدى, الايدا قول قۋسىرىپ قاراپ وتىرۋعا تاعى بولمايدى. سول سەبەپتى الدىن الا جۇمىس ىستەي بەرگەندى ءجون ساناپ وتىرمىز. ماسەلەن, كۇتپەگەن جەردەن تەحنوگەندىك جاعداي بولسا, بارلىق مەكەمەلەردى قانمەن قامتاماسىز ەتە الماۋىمىز مۇمكىن. ال ەندى دونورلىق ادام دەنساۋلىعىنا زيان با, الدە پايدالى ما دەگەن سۇراققا كەلەتىن بولساق, قان تاپسىرۋ ادامنىڭ اعزاسىنا وتە پايدالى ەكەندىگىن تاعى ءبىر ەسكە سالا كەتكەن دۇرىس دەپ ەسەپتەيمىن. سول سەبەپتى ۇرەي بولماسىن, كەرىسىنشە ادام بويىنداعى قان اينالىمى جاقسارادى جانە دەنساۋلىققا ەشقانداي زيانى جوق دەپ سەندىرگىم كەلەدى, - دەپ تۇسىندىرەدى رافال سارساماليەۆ.
ايتا كەتۋ كەرەك, قان ورتالىعى كوبىنە ەرىكتى دونورلاردى تارتادى. كەيبىر وڭىرلەردە اقىلى تۇردە دونورلىققا تارتۋ مۇلدە جوق. مەملەكەت ءوز تاراپىنان قان, ترامباتسيت جانە پلازماعا ءتيىستى مولشەردە قارجى ءبولۋ ماسەلەسىن قاراستىرعان.
ماڭعىستاۋ وبلىسى
