ايماقتار • 24 ناۋرىز، 2020

جامبىل وبلىسىنىڭ بەكەتتەرىندە 33 مىڭنان اسا جولاۋشى تەكسەرىلدى

82 رەتكورسەتىلدى

اعىمداعى جىلدىڭ 19 ناۋرىزىنان باستاپ جامبىل وبلىسىنىڭ رەسپۋبليكالىق ماڭىزى بار جولدارىندا سانيتارلىق-كارانتيندىك بلوك-بەكەتتەر جۇمىس ىستەپ كەلەدى.

وندا تاۋلىك بويى كەزەكشىلىك ۇيىمداستىرىلىپ، مەديتسينا، پوليتسيا جانە پروكۋراتۋرا قىزمەتكەرلەرى جۇمىس اتقارۋدا. ولار جولاۋشىلاردى كوروناۆيرۋستىق ينفەكتسيا تۋرالى حاباردار ەتىپ، كولىكتەر قوزعالىسىن باقىلاپ، تۇرعىنداردىڭ دەنە قىزۋىن ولشەۋ بويىنشا ءتيىستى جۇمىستار اتقارىپ وتىر.

كۇن سايىن بلوك-بەكەتتەر ارقىلى وبلىس اۋماعىنا مىڭداعان ادامدار وتۋدە. ءاربىر وتەتىن ادامنىڭ مالىمەتتەرى ساۋالناما ارقىلى جازىلىپ، مەديتسينا قىزمەتكەرلەرى تەپلوۆيزورلاردىڭ كومەگىمەن دەنە قىزۋلارىن انىقتاۋ شارالارىن جۇرگىزۋدە. الدىن الۋ بلوكتارى قىرعىز ەلىمەن شەكتەسەتىن قورداي اۋدانىندا، قاراعاندى وبلىسىمەن شەكتەسەتىن مويىنقۇم اۋدانىندا، تۇركىستان وبلىسىمەن شەكارالاس جۋالى جانە سارىسۋ اۋداندارىندا ورنالاسقان.

بەكەتتەردەگى مەديتسينا قىزمەتكەرلەرى اۆتوكولىك جۇرگىزۋشىلەرىنىڭ جانە جولاۋشىلاردىڭ دەنساۋلىق جاعدايىن تەكسەرەدى جانە الدىن الۋ ءىس-شارالارىن جۇرگىزەدى، سونىمەن قاتار دەرەكتەرى بويىنشا ساۋالناما تولتىرادى.وسىنداي سانيتارلىق-كارانتيندىك بەكەتتەر ءوڭىر اۋماعىنداعى ء«ايشابيبى» جانە «قاراسۋ» شەكارا ماڭىنداعى وتكىزۋ پۋنكتتەرىندە دە جۇمىس ىستەۋدە.

جامبىل وبلىسى اكىمدىگىنىڭ مالىمەتىنشە، 24 ناۋرىزداعى جاعداي بويىنشا الدىن الۋ بەكەتتەرىندە 11 211 بىرلىك اۆتوكولىك ءوتىپ، 33 409 جولاۋشى تەكسەرىلگەن. ولارعا 25 563 جادىناما مەن پاراقشالار تاراتىلعان.ءوڭىر تۇرعىندارى مەن قوناقتارى كوروناۆيرۋستىق ينفەكتسيانىڭ الدىن الۋ جانە تارالۋىنا جول بەرمەۋ بويىنشا اتقارىلىپ جاتقان ءىس-شارالارعا تۇسىنىستىك تانىتۋدا.بۇگىنگى تاڭدا جامبىل وبلىسى اۋماعىندا كوروناۆيرۋستىق ينفەكتسيا تىركەلمەگەن.

 

جامبىل وبلىسى

 

سوڭعى جاڭالىقتار

ۇقساس جاڭالىقتار