التاي كولگىنوۆ: قالىپتى ءومىردىڭ كەپىلى

ەلوردا • 24 ناۋرىز، 2020

التاي كولگىنوۆ: قالىپتى ءومىردىڭ كەپىلى – تەمىردەي ءتارتىپ

نۇر-سۇلتان قالاسىنىڭ اكىمى التاي كولگىنوۆ ەلوردالىقتارعا ۇندەۋ جولدادى. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.

Egemen Qazaqstan

«قۇرمەتتى ەلوردا تۇرعىندارى! كورناۆيرۋس پاندەمياسى الەم بويىنشا جىلدام تارالىپ كەلەدى. وسىلاردى ەسكەرە وتىرىپ، ءبىزدىڭ ەلدە دە قاتاڭ شارالار قابىلداندى. بىرىنشىدەن، ءبىز وزگە ەلدەردىڭ تاجىريبەلەرىن قارادىق. دۇنيەجۇزىلىك دەنساۋلىق ساقتاۋ ۇيىمى اۋىرعان ءبىر ادام كەمىندە 2-3 ادامعا جۇقتىراتىنىن مالىمدەدى. ال 5-6 كۇننىڭ ىشىندە اۋىرعان ءبىر ادام 3،5 مىڭ ادامنىڭ دەرتتى بولۋىنا سەبەپ بولادى. ەۋروپا قالالارى بىرىنەن كەيىن ءبىرى كارانتينگە جابىلىپ جاتىر. ولاردىڭ كەيبىرەۋلەرى شەشىمدى تىم كەش قابىلداعانىن كورىپ وتىرسىزدار. ال ۆيرۋس العاش تىركەلگەن قىتاي، كۇرەستى تەمىردەي ءتارتىپتىڭ نەگىزىندە جۇرگىزدى. قىتاي، وڭتۇستىك كورەيا ەلدەرى ازاماتتاردى وقشاۋلاۋدىڭ قاتاڭ ءادىسىن قولداندى. مەكەمەلەر، كاسىپورىندار، قوعامدىق كولىكتەر جۇمىستارىن توقتاتتى. ولار كۇندەپ ەمەس، ايلاپ ۇيلەرىنەن شىقپادى. تەك وسىنداي ءتارتىپ قانا مەديتسينا قىزمەتكەرلەرىنە ۇلكەن كومەك بولدى جانە وڭ ناتيجە بەردى. ءبىزدىڭ ەلىمىزدە دە ءىس-شارالار دەر كەزىندە قولعا الىنىپ، توتەنشە جاعداي جاريالاندى. 22 ناۋرىزدان بەرى ەلورداعا كىرۋگە دە، شىعۋعا دا تىيىم سالىندى. بۇنىڭ ءبارى سىزدەردىڭ قاۋىپسىزدىكتەرىڭىز ءۇشىن قابىلدانعان شەشىم. ەكىنشىدەن، شەتەلدىك تاجىريبە كورسەتكەندەي، بۇل ىندەتتى جاسى ۇلكەن، سوزىلمالى دەرتتەرى بار ازاماتتار كوتەرە الماي جاتىر. سوندىقتان ءبىز قازىنالى قاريالارىمىزدىڭ اماندىعىن ويلاۋىمىز قاجەت. اسىرەسە جاسى ۇلكەن ازاماتتارىمىزدىڭ سىرتقا شىقپاۋىن وتىنەمىز. سابىر ءتۇبى سارى التىن. قيىن كەزەڭدە وزدەرىڭىز ءۇشىن توزىمدىلىك تانىتىڭىزدار. باسقا جول جوق. وسى كۇندەرى بايقاعانىمىز جاعدايدى كوپشىلىك ءتۇسىنىپ وتىر، راحمەت ايتامىز. بىراق ءالى وسى قاۋىپتى تەرەڭ سەزىنبەگەن ازاماتتار دا بار. ءدال قازىر تۋىسىڭىز بەن جاقىنىڭىزعا شىن جاناشىر بولساڭىز، ولاردىڭ اماندىعىن تىلەسەڭىز، وندا ءوز ۇيىڭىزدە وتىرۋىڭىز كەرەك. ۇشىنشىدەن، قالا ماڭىنداعى كارانتينگە كىرمەيتىن ەلدى مەكەن تۇرعىندارى ەلورداعا كەلۋدى قويا تۇرۋ قاجەت. ءبىز جۇمىس بەرۋشىلەرگە قىزمەتكەرلەرىنىڭ اماندىعى ءۇشىن، جۇمىستى توقتاتۋدى جانە جۇمىس ورىندارىنىڭ ساقتالۋى قاجەتتىگىن ايتتىق. تورتىنشىدەن، ءتارتىپ ماسەلەسى. تارتىپكە باعىنعان قۇل بولمايدى دەيدى. مۇنداي كەزەڭدە زاڭبۇزۋشىلىقتارعا جول بەرىلمەيدى. كەز كەلگەن زاڭسىزدىق قاتاڭ جاۋاپقا تارتىلادى. بەسىنشىدەن، بۇگىن مەملەكەت باسشىسى ەكونوميكانى، شاعىن جانە ورتا بيزنەستى، الەۋمەتتىك از قامتىلعان توپتاردى قولداۋعا، جۇمىسپەن قامتۋعا باعىتتالعان شارالار قابىلدادى. بيزنەس وكىلدەرى ءوز كەزەگىندە جۇمىس ورىندارىن قىسقارتپاۋلارى قاجەت. ەلباسىنىڭ ۇندەۋىنەن كەيىن ەل ازاماتتارى ۇلگى بولىپ ارنايى قورعا اقشا اۋدارىپ جاتىر. وسى ۇندەۋگە سايكەس، ءبىز نۇر وتان پارتياسىمەن بىرگە ءبىرىنشى كەزەكتە كومەككە مۇقتاج ازاماتتارعا كومەكتەسۋدى باستاپ كەتتىك. كارانتين مەن كوروناۆيرۋسقا قاتىستى سۇراقتارىڭىز بولسا 109 نومەرىنە حابارلاسۋىڭىزعا بولادى. ول جەردە قوسىمشا تەلەفون ورتالىعىن اشتىق. كارانتين ەرتە اياقتالسىن دەسەك، تارتىپكە باعىنىپ، جاۋاپكەرشىلىكتى تەرەڭ سەزىنۋىمىز كەرەك. ءبىز بۇل قيىندىقتى بىرگە ەڭسەرەمىز. ءبىز بىرگەمىز»، - دەدى قالا اكىمى التاي كولگىنوۆ.