ايماقتار • 23 ناۋرىز، 2020

توتەنشە جاعدايداعى قاراعاندى: ۋاقىتتى كىم قالاي وتكىزۋدە؟

862 رەتكورسەتىلدى
  1. سەرىك اقسۇڭقار ۇلى،

اقىن، قازاقستاننىڭ ەڭبەك سىڭىرگەن قايراتكەرى:

مۇنداي جاعداي تاريحتا بولعان. مىسالى، پۋشكيننىڭ زامانىندا «تىرىسقاق» دەگەن ىندەتكە بايلانىستى كارانتين جاريالانىپ، اقىن ءوزىنىڭ نەبىر جاۋھار دۇنيەلەرىن «بولدينو كۇزى» دەگەن اتپەن بەلگىلى سول كەزەڭدە دۇنيەگە كەلتىرگەن. سوندىقتان، بۇل ۋاقىتتى دا ءتيىمدى پايدالانۋعا بولادى. ايتسە دە، مەندە ۋايىم دەگەن باسىم، ەل-جۇرت ءۇشىن الاڭدايمىن. قازىر باس الماي كىتاپ وقىپ جاتىرمىن...

توتەنشە جاعداي – ەل-جۇرتتى ىندەتتەن امان الىپ قالۋدىڭ باستى امالى! تاريحتىڭ تالاي سىنىنان امان-ساۋ وتكەن الاش ەلى بۇل سىناقتان دا سۇرىنبەي وتەتىنىنە سەنىمىمىز كامىل!

ءاربىر قازاقستان ازاماتى توتەنشە جاعداي كەزىندەگى قاتاڭ ءتارتىپتى ساقتاپ، ءبىر جەردەن ءسوز، ءبىر جاعادان باس شىعارۋى كەرەك! پانيكا-دۇربەلەڭگە جول بەرمەي، تارتىپكە باعىنۋىمىز كەرەك! سابىر ءتۇبى – سارى التىن، اياۋلى الاش جۇرتى!

توتەنشە جاعداي كەزىندە كوڭىلى الاڭ الاش ەلىن ودان سايىن الاڭ ويعا سالىپ، الەۋمەتتىك جەلىلەردە جالعان حابار تاراتىپ، دۇربەلەڭ تۋعىزعىسى كەلەتىندەردى جاۋاپقا تارتۋ كەرەك! ەلدى الاتايداي بۇلدىرۋگە، مۇلدە جول بەرمەۋىمىز قاجەت!

ءبىزدىڭ كۇش، قۋاتىمىز – ۇلتتىق بىرلىكتە!

 1

  1. قويلىباي اسان ۇلى،

ە.بوكەتوۆ اتىنداعى قارمۋ-دىڭ پروفەسسورى، فيلولوگيا عىلىمدارىنىڭ دوكتورى:

ۋنيۆەرسيتەتتە پروفەسسور بولعاندىقتان دارىستەرىمىزدى، ساباقتارىمىزدى ونلاين ءتارتىبى بويىنشا جۇرگىزىپ جاتىرمىز. قالاي بولعان كۇندە دە شاكىرتتەرىمىزبەن تىكەلەي بايلانىس بار.

بۇكىل الەمدەگى، ءبىزدىڭ قازاقستانداعى احۋال وسىنداي بولىپ تۇر عوي. سوندىقتان، تارتىپكە باعىنامىز، باعىنۋعا ءتيىستىمىز دە. ارينە، ءبىر اي ۇيدە وتىرۋ دەگەنىڭىز ادامنىڭ كوڭىل-كۇيىنە كەرى اسەرىن تيگىزەدى. دەگەنمەن، شىعارماشىلىق ادامدارىنا بۇل اسا ءتيىمدى دەپ ەسەپتەيمىن. اياقتالماعان جۇمىستار، ويعا العان جوبالار بولادى، سونىڭ ءبارىن اياعىنا جەتكىزۋگە بۇل تااتىرمايتىن مۇمكىندىك دەگەن ويدامىن.

جاسىراتىنى جوق، ءۇيدىڭ الدىنا شىعىپ، ازىراق سەرۋەن قۇرىپ تۇرامىز. بىراق، قوناق شاقىرۋدى، قوناققا بارۋدى توقتاتا تۇرعان جايىمىز بار.

 1

  1. تەمىرحان ابىلاەۆ،

قاراعاندى وبلىستىق دەنە شىنىقتىرۋ جانە سپورت باسقارماسىنىڭ باسشىسى:

مەملەكەتتىك ورگاننىڭ باسشىسى بولعاندىقتان ۇيدە جايباراقات وتىرۋعا مۇمكىندىك تە، ۋاقىت تا جوق. تاڭەرتەڭنەن كەشكە دەيىن جۇمىستامىز. ويتكەنى، قازىرگى جاعداي سونى بىزدەن تالاپ ەتەدى. ارينە، قازىر ونلاين-رەجيمدە، الەۋمەتتىك جەلىلەر ارقىلى جۇمىستى كۇشەيتىپ جاتىرمىز. توتەنشە جاعدايعا بايلانىستى قازىرگى جۇمىستىڭ باعىتى وزگەرگەن، جوعارىدان تىڭ تاپسىرمالار تۇسەدى، جاۋاپكەرشىلىك ەسەلەپ كۇشەيگەن.

ال ەندى، بوس ۋاقىت بولىپ جاتسا، كىتاپ وقىعانعا نە جەتسىن؟! ماسەلەن، قان مايداندا ءجۇرىپ تە قاسىم قايسەنوۆ، باۋىرجان مومىش ۇلى سىندى باتىر اتالارىمىز شىعارماشىلىقتى توقتاتپاعان عوي. شىعارماشىلىق جۇمىس ارقاشاندا توقتاماۋى كەرەك.

نەگىزى، بۇل ۇلكەن سىناق، بۇدان ساباق الۋعا ءتيىستىمىز. ءتۇبى قايىرلى بولسىن دەپ تىلەيىك!

 1

  1. دۋمان ءابدىرامانوۆ،

«قازتسينك» جشس اشىق كەن ورىندارى بويىنشا باس تاۋ-كەن ينجەنەرى:

وتكەن اپتادان بەرى ۇيدە وتىرىپ جۇمىس ىستەۋگە كوشتىك. تاۋ-كەن ورىندارىندا ديسپەتچەرلىك بەكەتتەر بار، اقپاراتتىق تەحنولوگيانىڭ دامىعان زامانىندا سولارمەن تىعىز بايلانىسقا شىعىپ، قاجەتتى ماتەريالداردى الىپ وتىرامىز. جالپى، بەينەكامەرالار ارقىلى جۇمىستى تولىق باقىلاۋعا مۇمكىندىك بار. بىراق، ەل-جۇرتتى كوزبەن كورىپ، ارالاسا جۇمىس ىستەگەنگە نە جەتسىن؟!

بىزدەگى اشىق تاۋ-كەن ورىندارى، اتاپ ايتقاندا «جايرەم كەن-بايىتۋ كومبيناتى» جانە «التىن تاۋ-كوكشەتاۋ» كاسىپورىندارى ءبارى قالىپتى جۇمىس ىستەپ تۇر. نەگىزگى تەحنولوگيادا جۇمىس ىستەيتىن ماماندار كەستە بويىنشا ەڭبەك ەتۋدە. ال كەڭسەدەگى قىزمەتكەرلەر بارىنشا ونلاين-رەجيمدە جۇمىس ىستەۋگە كوشىرىلىپ جاتىر.

جالپى، كەن ورىندارىندا سانيتارلىق-گيگيەنالىق تارتىپكە وتە قاتتى ءمان بەرىلۋدە. دەزينفەكتسيالىق ءىس-شارالار تولىققاندى تۇردە جۇزەگە اسىرىلىپ جاتىر.

 1

  1. بەكزات التىنبەكوۆ،

مەتسەنات، قاراعاندى وبلىستىق ءماسليحاتىنىڭ دەپۋتاتى:

بۇل جاعدايدى مەن قازاقستاندا تۇراتىن ۇلت پەن ۇلىستاردىڭ باسىن بىرىكتىرەتىن ۇلى سىناق دەپ قابىلدايمىن. ءدال وسى سىندارلى شاقتا ءبىزدىڭ ازاماتتىعىمىزدىڭ، وتانسۇيگىشتىگىمىزدىڭ قانداي دارەجەدە ەكەندىگى انىق  كورىنىس تابادى.

قاراماعىمىزداعى قىزمەتكەرلەردىڭ بارلىعىن دا دەمالىسقا جىبەردىك. ولاردىڭ ەڭبەكاقىلارى 100 پايىز ساقتالادى. كوروناۆيرۋس ىندەتىنىڭ الدىن الۋ ءىس-شارالارىنا دا ءوز ۇلەسىمىزدى قوسىپ، ەگدە ادامدارعا، از قامتىلعان جانە كوپبالالى وتباسىلارىنا مەديتسينالىق ماسكالاردى تەگىن تاراتۋ اكتسيالارىنا قاتىستىق.

جالپى، توتەنشە جاعداي جاريالانعان ۋاقىتتان بەرى وتباسى مۇشەلەرىنە كوبىرەك ۋاقىت ءبولىپ، بالالارىمىزبەن اراداعى قارىم-قاتىناستى كۇشەيتىپ جاتقان جاعدايىمىز بار. قىزمەت، جۇمىس دەپ شاپقىلاپ ءجۇرىپ، بۇل ماڭىزدى ماسەلەگە جەتكىلىكتى ءمان بەرە قويماعان ەكەنبىز. سونىڭ ورىنىن تولتىرۋدىڭ مۇمكىندىگى ەندى كەلدى. ء«بىر جاماندىقتىڭ ارتىندا ءبىر جاقسىلىق بار» دەگەن وسى.

 1

  1. ەرجان بازاربەكوۆ،

ق.بايجانوۆ اتىنداعى قاراعاندى وبلىستىق فيلورمانياسىنىڭ ءانشىسى، ج.ەلەبەكوۆ اتىنداعى ءىىى رەسپۋبليكالىق ءان كونكۋرسىنىڭ گران-پري يەگەرى:

قازاق جامان اۋرۋدىڭ اتىن اتاماعان. مىناۋ «جامان تۇماۋ» الەمگە  تاراپ، ەلدىڭ ۋايىمداپ وتىرعانى راس. ەل باسشىلارى، قايمانا قازاق بولىپ، ءبىر جاعادان باس، ءبىر جەڭنەن قول شىعارىپ، بۇل قيىندىققا قارسى تۇرا ءبىلۋىمىز كەرەك.

ونەر ادامى رەتىندە سەنبى-جەكسەنبى كۇندەرى ۇيدە وتىرماۋشى ەدىك. قازاقتىڭ تويى بىتپەگەن عوي. ۇلكەن مەرەكەلەردە كونتسەرتتىك شارالار بولىپ، ساحنالاردا ءان ايتىپ جاتۋشى ەدىك. قازىر مۇنىڭ ءبارى شەكتەدىك. دەگەنمەن، قاراپ جاتپايىق، قاڭتارىلىپ تۇرمايىق دەگەن نيەتپەن «قونعانىڭ، ونەر شىركىن، بەكەر مە ەدى» دەپ بابالىرىمىز ايتقانداي، ءبىز دە حال-قادەرىمىزشە الەۋمەتتىك جەلىدەن ءان جولداپ، حالقىمىزدىڭ كوڭىلىن كوتەرۋگە تىرىسىپ جاتىرمىز.

1

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار