مەديتسينا • 21 ناۋرىز، 2020

ۆيرۋسپەن كۇرەس جالعاسۋدا

36 رەتكورسەتىلدى

بۇگىندە نۇر-سۇلتان قالاسىنا شەتەلدەردەن كەلگەن وتانداستارىمىزدىڭ اراسىندا ۆيرۋس جۇقتىرۋ ىقتيمالدىعى جوعارى دەگەن جانە تاپسىرعان سىنامالارىندا ۆيرۋس بارلىعى انىقتالعان جاندار ەلورداداعى كوپسالالى مەديتسينالىق ورتالىق دارىگەرلەرىنىڭ ۇزدىكسىز باقىلاۋىندا ستاتسيوناردا جاتىر.

كلينيكا ديرەكتورى مۇحتار تولەۋتاەۆتىڭ ايتۋىنشا، قازىرگى ۋاقىتتا ۆيرۋس جۇقتىرعان 28 ادامنىڭ جاعدايى قالىپتى كۇيدە. «كۇندەلىكتى تەمپەراتۋرا، قان قىسىمدارى تەكسەرىلىپ، دارىگەرلەر مەن مەيىربيكەلەردىڭ باقىلاۋىنداعى جانداردا  كلينيكالىق اۋرۋدىڭ بەلگىلەرى جوق،  تەك تاپسىرعان سىنامالارىنان ۆيرۋس تابىلعانى بولماسا»، دەگەن مۇحتار ەسەنجان ۇلىنان ورتالىقتىڭ جۇمىسىنىڭ جاي-جاپسارىن سۇراپ بىلدىك.

حالىق «جامان ايتپاي جاقسى جوق»، «قامدانعان قاپى قالمايدى» دەپ بەكەر وي تولعاماسا كەرەك. سوندىقتان جان-جاقتى قامدانعان ورتالىقتا بۇگىندە 60-تان استام دارىگەرلەر مەن باسقا مەديتسينا قىزمەتكەرلەر كۇنى-ءتۇنى ۇيلەرىنە كەتپەستەن ورتالىقتا توتەنشە جاعدايدىڭ قاجەتتىلىگىنە وراي جۇمىس اتقارۋدا. ۆيرۋستىڭ ادام وكپەسىنە تيگىزەر زيانىن، سونداي ۋاقىتتا وزدىگىنەن تىنىس الا الماي قالاتىنىن ەسەپكە الا قالاداعى وزگە كلينيكالاردان وعان قاجەتتى اپپاراتتار جەتكىزىلىپتى.

- قۇداي بەتىن اۋلاق قىلىپ، كەرەك ەتكىزبەسىن بىراق الدەقانداي كۇن تۋسا ءبىراز اپپاراتتار دايىن. مۇنىمەن قوسا نەگىزگى ۆيرۋسپەن كۇرەستەگى مامانداردىڭ باسىمدىعى ءبىزدىڭ ورتالىقتان، الايدا،  باسقا ەمدەۋ مەكەمەلەرىنەن كومەككە دارىگەرلەر كەلدى. ال ەمدەۋ شارالارى دەنساۋلىق ساقتاۋ مينيسترلىگىنىڭ حالىقارالىق ستاندارتتار نەگىزىندە بەكىتكەن حاتتامالارى بويىنشا جۇزەگە اسىرىلادى، سول حاتتامالاردى قولدانباي-اق امان وتسەك دەيمىز، - دەيدى دارىگەر قاۋىمى.

كۇنى بويىنا قورعانىش كيىمدەرىمەن تۇمشالانىپ ەڭبەك ەتۋ وڭاي ەمەس، بىراق بۇل مەديتسينا قىزمەتكەرلەرىنىڭ وزدەرى ءۇشىن دە، پاتسيەنتتەر مەن كارانتيندە جاتقان 245 ادام ءۇشىن دە ماڭىزدى، باقىلاۋداعى ادامداردى كۇنىنە بىرنەشە رەت تەكسەرۋ تولىقتاي قورعانىش كيىمىن كيۋمەن عانا اتقارىلادى. بۇلاي جاساماسا بولمايدى، قاۋىپسىزدىك ءۇشىن قاجەتتى قادام،  ال مۇنداي كيىمدەر جەتكىلىكتى. كوپسالالى ورتالىق تەك ۆيرۋس دەپ قانا وتىرعان جوق، اشەيىندەگى قالىپتى، جوسپارلى جۇمىستار دا ءجۇرىپ جاتىر، ال ىندەت ىلمەگىنە ىلىككەندەردى قامتۋعا ورتالىقتا 387 ورىن ءبولىنىپتى.

- بۇل ۆيرۋس تۇتاس قوعام ءۇشىن سىن بولىپ وتىر. مەنى بۇل ىندەت اينالىپ وتەدى دەپ ەشكىم دە كەپىلدىك بەرە المايدى، سوندىقتان ءار ادام ءوز جەكە باسىنىڭ تازالىعىن ساقتاۋمەن قاتار، كوپشىلىك جينالاتىن جەردەن اۋلاق جۇرگەنى، قوعامدىق ورىندارعا بارماۋلارى بىرىنشىدەن-ءوزىن كەسەلدەن ساقتاعانى، ەكىنشىدەن، ماڭايىن، جاقىن-جۋىقتارىن قورعاعانى بولىپ شىقپاق، ال بىزدەر دارىگەرلەر قولىمىزدان كەلگەندى اتقارۋعا تاس-ءتۇيىن دايىنبىز. بۇگىندە قاندارىنىڭ قۇرامىندا ۆيرۋسى بار ادامداردا كليكالىق بەلگىلەر بولماعانىنا قاراماستان، جاعدايعا ءجىتى قاراۋ مىندەتىمىز، - دەيدى مۇحتار تولەۋتاەۆ.

سوڭعى جاڭالىقتار

ىستىق تاماق تاراتتى

قازاقستان • كەشە

ۇقساس جاڭالىقتار