جيىرما ءتورت جاستاعى دومبىراشى, ءارى توپتىڭ كونتسەرتمەيسترى ايبەك ارىمبەك ەل پرەزيدەنتى قاسىم-جومارت كەمەل ۇلى توقاەۆ التىن وردانىڭ 750 جىلدىعىن وتكىزۋ تۋرالى حالىققا جاريا ەتكەن سوڭ, مەرەيتويعا ارناپ كۇي شىعارۋ تۋرالى وي كەلگەنىن ايتادى. دومبىرامەن قاتار شاڭقوبىز, سىبىزعى اسپاپتارىن دا جاقسى مەڭگەرگەن كۇيشىنىڭ ايتۋىنشا, العاشقى تۋىندى ءبىر اپتانىڭ ىشىندە تۋعان.
«كۇي وتە جىلدام تەمپپەن ورىندالادى. بۇدان قازاق باتىرلارىنىڭ بەينەسىن كورۋگە بولادى. جالپى, جاستارعا پاتريوتتىق رۋح بەرۋ ماقساتىندا شىعارىلعان. ءۇش بولىممەن تۇراتىن كۇيدىڭ ۇزاقتىعى شامامەن ەكى مينۋتقا سوزىلادى», دەيدى ايبەك كەنجەباي ۇلى.
قازاقستاننىڭ گيننەسس رەكوردتار كىتابىنا ەنۋ ءۇشىن ەلوردا تورىندە وتكەن شارادا «قورقىت» ءداستۇرلى ساز توبى «التىن وردا» كۇيىن تۇڭعىش رەت ورىندادى. توپ جەتەكشىسى شولپان قورعانبەك جاس تالانتتىڭ تۋىندىسىن جوعارى باعالاپ, انسامبلگە لايىقتاپ وڭدەپ شىققان.
بۇعان دەيىن قازاقستاندىق جانە شەتەلدىك تۋىندىلاردى ورىنداپ, ونەر كورسەتىپ جۇرگەن جاس دارىننىڭ دەبيۋتتىك شىعارماسىنىڭ تۇساۋكەسەرى 18 ناۋرىز كۇنى وتەدى دەپ جوسپارلانعان. الايدا شارتاراپتى شارلاعان كوروناۆيرۋسقا بايلانىستى كەيىنگە شەگەرىپتى.
