ۇندەۋدە قازاقستان پرەزيدەنتى كوروناۆيرۋس پاندەمياسىنا بايلانىستى ەلدىڭ بۇكىل اۋماعىندا 2020 جىلدىڭ 16 ناۋرىزىنان 15 ساۋىرىنە دەيىن توتەنشە جاعداي ەنگىزۋ تۋرالى جارلىققا قول قويعانىن ەسكە سالا وتىرىپ, نۇر-سۇلتان جانە الماتى قالالارىندا 2020 جىلعى 19 ناۋرىزدان باستاپ كارانتين رەجىمى ەنگىزىلگەنى, سوندىقتان بىرقاتار شارا مەن ۋاقىتشا شەكتەۋلەر بەلگىلەنگەنى, ولاردى ورىنداماۋ اكىمشىلىك جاۋاپتىلىققا اكەپ سوقتىراتىنى (اقبتك-ءنىڭ 476-بابى – 10 اەك ايىپپۇل نەمەسە 15 تاۋلىككە دەيىن قاماققا الۋ) اتاپ كورسەتىلگەن.
سونداي-اق ۇندەۋدە: «توتەنشە جاعداي كەزىندە بيلىك وكىلىنىڭ زاڭدى تالابىنا باعىنباعانى ءۇشىن قىلمىستىق جاۋاپتىلىق كوزدەلگەنىن تۇسىندىرەمىز (قك-ءنىڭ 379-بابى – 2 مىڭ اەك ايىپپۇلدان 2 جىلعا باس بوستاندىعىنان ايىرۋعا دەيىن). «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستىڭ 90-بابىنا سايكەس ازاماتتار مەديتسينالىق ۇيىمداردىڭ تالاپ ەتۋى بويىنشا تەكسەرۋدەن جانە ەمدەلۋدەن وتۋگە مىندەتتى. باس مەملەكەتتىك سانيتارلىق دارىگەردىڭ 2020 جىلعى 16 ناۋرىزداعى قاۋلىسىمەن ستاتسيونارلىق جانە ءۇي كارانتينى ەنگىزىلدى. ولاردى ىسكە اسىرۋ ماقساتىندا ۋاكىلەتتى ورگاندار ەپيدەميولوگيالىق جاعدايى قولايسىز ەلدەردەن كەلگەن ادامداردى انىقتاۋ, وقشاۋلاۋ جانە ەمدەۋ بويىنشا ءىس-شارالاردى قامتاماسىز ەتۋدە», دەپ جازىلعان.
بۇدان بولەك, ۇندەۋدە شەكتەۋ ءىس-شارالارى, ونىڭ ىشىندە كارانتين تۇرعىنداردىڭ جانە مەنشىك نىسانىنا قاراماستان زاڭدى تۇلعالاردىڭ ورىنداۋى ءۇشىن مىندەتتى ەكەنى ايتىلعان. «كارانتيننەن جالتارۋ, شەتەلگە شىعۋ تۋرالى مالىمەتتەردى جانە بايلانىستا بولعان ادامدار تۋرالى اقپاراتتى جاسىرۋ فاكتىلەرى بار. حالىقتىڭ قاۋىپسىزدىگىن قامتاماسىز ەتۋ ماقساتىندا ازاماتتاردان وتكىزىلەتىن ءىس-شارالارعا تۇسىنىستىكپەن قاراۋدى, دەنساۋلىق ساقتاۋ مينيسترلىگى مەن ءىىم قىزمەتكەرلەرىنىڭ زاڭدى تالاپتارىن ساقتاۋدى, ولارعا ينفەكتسيانى انىقتاۋ مەن الدىن الۋعا كومەك كورسەتۋدى سۇرايمىز. پوليتسيانىڭ وسىنداي تالاپتارىنا باعىنباعانى ءۇشىن اكىمشىلىك جاۋاپتىلىق كوزدەلگەنىن اتاپ وتەمىز (اقبتك-ءنىڭ 667-بابى – 40 اەك-كە دەيىن ايىپپۇل نەمەسە 10 تاۋلىككە دەيىن قاماققا الۋ).
سونداي-اق سانيتاريالىق-ەپيدەميولوگيالىق قاداعالاۋ ورگاندارىنىڭ نۇسقامالارىن ورىنداماعانى (اقبتك-ءنىڭ 462-بابىنىڭ 3-بولىگى – 500 اەك-كە دەيىن ايىپپۇل) جانە سانيتاريالىق ەرەجەلەر مەن گيگيەنالىق نورمالاردى بۇزعانى ءۇشىن (اقبتك-ءتىڭ 425-بابى – 5 ملن تەڭگەگە دەيىن ايىپپۇل) اكىمشىلىك جاۋاپتىلىق بەلگىلەنگەن.
بۇل رەتتە كاسىپكەرلىك سۋبەكتىلەرىنە قاتىستى قىزمەتىن توقتاتا تۇرۋ تۇرىندەگى جازا قولدانىلۋى مۇمكىن.
ەگەر مۇنداي ارەكەتتەر ابايسىزدا ادامداردى جاپپاي جۇقتىرۋعا نەمەسە ادام ولىمىنە اكەپ سوقسا, وندا قىلمىستىق جاۋاپتىلىق تۋىندايدى (قك-ءنىڭ 304-بابى – 2 مىڭ اەك ايىپپۇلدان 10 جىلعا باس بوستاندىعىنان ايىرۋعا دەيىن). سونىمەن بىرگە شىندىققا سايكەس كەلمەيتىن مالىمەتتەردى تاراتپاۋعا جانە ارانداتۋشىلىققا بەرىلمەۋگە شاقىرامىز.
قازىرگى جاعداي تۋرالى شىنايى اقپارات ۋاكىلەتتى مەملەكەتتىك ورگانداردىڭ رەسمي ينتەرنەت-رەسۋرستارىندا ورنالاستىرىلادى», دەلىنگەن.
