ارتىنشا اقتاۋ قالاسىنىڭ تۇرعىنى كاسپي تەڭىزىنە كارىز سۋى توگىلىپ جاتىر دەگەن اقپاراتتى ۇيالى تەلەفونىنا ءتۇسىرىپ, تاراپ كەتكەن بولاتىن. جاعدايعا تۇسىنىك بەرگەن ماڭعىستاۋ وبلىسى ەكولوگيا دەپارتامەنتى بۇل اقپاراتتى «راستالماعان» دەپ ءتۇسىندىردى. ياعني اتالعان دەپارتامەنت وكىلدەرى شۋ شىققان ورىنعا – اقتاۋ قالاسى 1-شاعىن اۋدانىندا ورنالاسقان «تەننيس ورتالىعى» عيماراتى ماڭىنا بارىپ, تەڭىز جاعالاۋىنا كارىز سۋىنىڭ ەمەس, جەراستى سۋىنىڭ توگىلگەنىن انىقتاعان.
– تەڭىزگە كارىز سۋىن توگىپ جاتقان مەكەمەلەر انىقتالعان جوق. تەڭىزگە جاقىن ورنالاسقان قامىستاردىڭ اراسىنان جەراستى سۋى جەر بەتىنە شىققان. ناتيجەسىندە, «تەننيس ورتالىعى» عيماراتىنىڭ ارتى سۋعا تولىپ قالعان. الايدا سول تۇستاعى «مانيلا» جانە «نۇر پلازا» دەمالىس ورىندارىنىڭ ءدال ورتاسىنداعى جەر ۋچاسكەسى كىمگە تيەسىلى ەكەنى ازىرگە بەلگىسىز, – دەيدى وبلىستىق ەكولوگيا دەپارتامەنتىنىڭ ءبولىم باسشىسى ەرجان جۇماشەۆ.
اتالعان جەر ۋچاسكەسىنە «تەننيس ورتالىعى» مەكەمەسىنىڭ وكىلدەرى دە كەلگەن بولاتىن. ولاردىڭ ايتۋىنشا, بۇعان دەيىن عيماراتتى ءجيى سۋ الىپ كەتەتىن جانە بۇل ماسەلەنى سپورتشىلاردىڭ اتا-انالارى ءجيى كوتەرىپ, مەكەمە اكىمشىلىگى ناقتى ءبىر شەشىمگە كەلگەن-ءدى. ارنايى تەحنيكانىڭ كومەگىمەن قۇبىر جۇرگىزىلىپ, بۇگىندە اۋماق جەراستى سۋىنان قۇتىلعان. الايدا ءوسىپ تۇرعان قامىستار ءبىراز قيىندىق تۋعىزىپ وتىر.
ماسەلەگە وراي «قازگيدرومەت» رەسپۋبليكالىق مەملەكەتتىك كاسىپورنى ماڭعىستاۋ فيليالىنىڭ وكىلدەرى دە تەڭىز جانە جەراستى سۋلارىنان سىناما العان. اتالعان مەكەمەنىڭ ينجەنەر-حيميگى گۇلنارا ادىلباەۆانىڭ ايتۋىنشا, 10 كۇن سايىن كاسپي تەڭىزى جاعالاۋىندا ورىن تەپكەن دەمالىس ورىندارىنىڭ ءتورت نۇكتەسى تەكسەرىلىپ وتىرادى. ياعني سۋدىڭ قۇرامىندا 29 كومپونەنت انىقتالادى. ال تالداۋ قورىتىندىسى 5 كۇننەن سوڭ دايىن بولادى.
وبلىستىق ەكولوگيا دەپارتامەنتى وكىلدەرىنىڭ ايتۋىنشا, الدىمەن تەڭىز جاعالاۋىنداعى «مانيلا» جانە «نۇر پلازا» دەمالىس ورىندارىنىڭ ورتاسىنداعى بوس جاتقان جەر ۋچاسكەسىنىڭ قوجايىنىن انىقتاپ, ءتۇسىندىرۋ جۇمىستارىن جۇرگىزۋ قاجەت. ايتپەسە بۇل جاعدايدىڭ قايتالانا بەرۋى مۇمكىن.
ماڭعىستاۋ وبلىسى
