قىزىلجار وڭىرىندە تۇرعىن ءۇي-كوممۋنالدىق شارۋاشىلىعىن جاڭعىرتۋ باعدارلاماسىنا قاتىسۋعا تىلەك بىلدىرۋشىلەر قاتارى جىل ساناپ كوبەيىپ كەلەدى. ۇكىمەت تاراپىنان وسىناۋ ماڭىزدى جوبا قابىلدانعالى وبلىس ورتالىعىندا جۇزدەن استام نىسان جوندەۋدەن ءوتتى.
قىزىلجار وڭىرىندە تۇرعىن ءۇي-كوممۋنالدىق شارۋاشىلىعىن جاڭعىرتۋ باعدارلاماسىنا قاتىسۋعا تىلەك بىلدىرۋشىلەر قاتارى جىل ساناپ كوبەيىپ كەلەدى. ۇكىمەت تاراپىنان وسىناۋ ماڭىزدى جوبا قابىلدانعالى وبلىس ورتالىعىندا جۇزدەن استام نىسان جوندەۋدەن ءوتتى.بيىل 90-نان استام ءوتىنىش ءتۇسىپ, 60-ى وڭ شەشىم تاپتى. باعدارلامانىڭ تيىمدىلىگىن تالماي ءتۇسىندىرىپ جۇرگەن پاتەر يەلەرى كووپەراتيۆى قاۋىمداستىعىنىڭ جەتەكشىسى سەرگەي حۋدياكوۆتىڭ ايتۋىنشا, سوڭعى ەكى جىلدا بۇل ماقساتقا رەسپۋبليكالىق قازىنادان 1,5 ميلليارد تەڭگە باعىتتالعان. تۇرعىندار جوبالاۋ-سمەتالىق قۇجاتتامادا كورسەتىلگەن قاراجاتتىڭ 3 پايىزىن جيناسا, شىعىننىڭ قالعان بولىگى مەملەكەت ەسەبىنەن وتەلەدى. بيىل پەتروپاۆل قالاسىندا 19 كوپ قاباتتى ءۇيدىڭ شاتىرلارى مەن دالىزدەرى قالپىنا كەلتىرىلسە, 110 كوپ قاباتتى تۇرعىن ۇيلەردىڭ تەحنيكالىق زەرتتەۋىنە جەرگىلىكتى بيۋدجەتتەن 11 ميلليون تەڭگە ءبولىندى.
جوبانىڭ ارتىقشىلىعىن ءتۇسىنىپ, جوندەۋ جۇمىستارىنا قۋانا كەلىسكەن مير كوشەسى №87-ءشى ۇيدەگى 97 پاتەردىڭ تۇرعىندارى قازىر يگىلىكتى ءىستىڭ شاپاعاتىن كورىپ وتىر. جاۋىن-شاشىندى كۇندەرى تۇرعىزىلعانىنا جارتى عاسىردان اسقان باسپانانىڭ توبەسىنەن سۋ اعىپ, ابدەن ىعىر قىلاتىن, ىرگەتاسى دا شوگە تۇسكەن. باس مەردىگەر قىزمەتىن اتقارعان «پەترو Bilding» سەرىكتەستىگى ابدەن توزىعى جەتكەن ءۇيدىڭ شاتىرىن قالپىنا كەلتىرىپ, قابىرعالارى ارنايى جىلۋ ماتەريالدارىمەن قاپتالدى. جەرتولەدەگى جىلۋ جۇيەلەرى اۋىستىرىلدى. وزگە دە جوندەۋ جۇمىستارى تاپ-تۇيناقتاي اتقارىلىپ, بارلىعى 18 ميلليون تەڭگە جۇمسالدى. مۇندا نەگىزىنەن زەينەتكەرلەر مەن از قامتىلعان جانداردىڭ تۇراتىنىن ەسكەرسەك, ءوز كۇشتەرىمەن اتقارىپ شىعا المايتىنى بەسەنەدەن بەلگىلى ەدى. مەردىگەر ۇيىم قۇرىلىس ساپاسىنا كەمى ءۇش جىل كەپىلدىك بەرسە, تۇرعىندار جەڭىلدەتىلگەن نەسيەنى 15 جىلعا ءوزارا ءبولىپ تولەيتىن بولادى.
2011-2020 جىلدارعا ارنالعان تۇرعىن ءۇي-كوممۋنالدىق شارۋاشىلىعىن جاڭعىرتۋ جوباسىنىڭ شارتى جەڭىل ءارى قولجەتىمدى ەكەنىن يدا لەونتەۆا باسقاراتىن «شۋحوۆ 1 جانە 3» پاتەر يەلەرى كووپەراتيۆى دە جەتە باعالاعان سىڭايلى. ارقايسىسى 119 پاتەردەن تۇراتىن ەكى ءۇيدىڭ شىعىندارى 50 ميلليون تەڭگەنى قۇراپ, شاتىرلار, قاسبەتتەر, دالىزدەر جاڭارتىلدى. ءبىر سوزبەن ايتقاندا, بۇگىنگى زامان تالابىنا ساي نىسانعا اينالىپ, كوركەيىپ شىعا كەلدى.
از قامتىلعان جاندار باعدارلامانىڭ ارتىقشىلىعىن قۋاتتاۋمەن قاتار مەملەكەت تاراپىنان كورسەتىلگەن تۇرعىن ءۇي كومەگىنە دە ءدان ريزا. ماسەلەن, پيك ءتورايىمى يدا گەربەرتوۆنانىڭ جالپى تۇرعىن الاڭى 47,4 شارشى مەتر بولاتىن پاتەرىنە 110 مىڭ تەڭگە ەسەپتەلىپ, ونىڭ 40 مىڭ تەڭگەسى تۇرعىن ءۇي كومەگى ەسەبىنەن وتەلگەن. مۇنداي مىسالداردى كوپتەپ كەلتىرۋگە بولادى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.
