ىلە-شالا تۇسكە قاراي دەنساۋلىق ساقتاۋ ءمينيسترى ەلجان ءبىرتانوۆ نۇر-سۇلتان قالاسىندا بىردەن ىندەت جۇقتىرعان 14 ناۋقاستىڭ تىركەلگەنىن جەتكىزدى. «بۇل ناۋقاستار ءتارتىپ بويىنشا كارانتينگە جاتقىزىلىپ, ولارمەن بايلانىستا بولعان بارلىق ازامات انىقتالۋدا», دەدى مينيستر.
سونداي-اق ە.ءبىرتانوۆ باس سانيتارلىق دارىگەردىڭ جاڭا قاۋلىسىمەن قاۋىپتى مەملەكەتتەردىڭ قاتارى قايتا قارالىپ, وزگەرگەنىن ايتتى. اتاپ ايتقاندا, بۇكىل ازاماتتار كارانتينگە جاتقىزىلۋى ءتيىس 1 «ا» ساناتىنداعى مەملەكەتتەرگە فرانتسيا, يران, يتاليا, يسپانيا جانە گەرمانيا ەنگىزىلدى. 1 «ب» ساناتىنا قىتاي, كورەيا جانە بۇكىل شەنگەن ايماعىنداعى مەملەكەتتەر جاتقىزىلدى. بۇل ەلدەردەن كەلگەن ازاماتتار مىندەتتى تۇردە ءۇي كارانتينىندە بولۋى كەرەك. مينيستر بۇل ەلدەردەن كەلەتىن شەتەل ازاماتتارىنىڭ ەلىمىزگە كىرۋىنە تىيىم سالىنعانىن دا اتاپ ءوتتى. ال 2-ساناتتاعى فيليپپين, قاتار, ءۇندىستان, بىرىككەن اراب امىرلىكتەرى, ۇلىبريتانيا, ازەربايجان, تايلاند جانە اقش-تان كەلەتىن ازاماتتار مەديتسينالىق مونيتورينگكە الىنادى. سونىمەن قاتار وسى قاۋلى بويىنشا ەلىمىزدەگى بۇكىل مەديتسينالىق ۇيىمدارعا, الەۋمەتتىك مەديتسينالىق ۇيىمدارعا جانە ينتەرناتتارعا كارانتين ەنگىزىلەدى. مۇندايدا بۇل مەكەمەلەرگە تەك ءوز قىزمەتكەرلەرى عانا كىرۋگە رۇقسات. بۇعان قوسا مينيستر سانيتارلىق دەزينفەكتسيالاۋ كۇشەيتىلەتىنىن دە ايتتى.
نۇر-سۇلتان قالاسى قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ەلوردادا كوروناۆيرۋس جۇقتىرعان 14 ناۋقاسپەن بايلانىسقان ادامداردىڭ ءتىزىمى جاسالىپ جاتقانىن حابارلادى. «جرۆي-مەن ەلوردادا ستاتسيوناردا جاتقان ايەلدىڭ وتباسىنداعى ءبىر ادام گەرمانيادان كەلگەن بولاتىن. بايلانىسقان ادامدار رەتىندە ونى باقىلاۋعا الدىق. 16 ناۋرىز كۇنى ايەلدىڭ بويىنان كلينيكالىق بەلگىلەر بايقالعاندا, بىردەن اۋرۋحاناعا جاتقىزىلىپ, تەكسەرىلدى. بۇگىن كوروناۆيرۋستىق ينفەكتسيا انىقتالدى», دەدى ول ورتالىق كوممۋنيكاتسيالار قىزمەتىندەگى ونلاين بريفينگتە.
س.قيسىقوۆانىڭ ايتۋىنشا, وڭتۇستىك كورەيا مەن يتاليادان كەلگەن 4 قازاقستاندىق تا 16 ناۋرىزدا رەيستەن ءتۇسىرىلىپ, وقشاۋلانعان. ەندى ولارمەن بايلانىستا بولعان ادامدار انىقتالۋدا. 14 ادامنىڭ 5-ەۋى قالاداعى ينفەكتسيالىق بلوكتىڭ ستاتسيونارىندا جاتقان. قالعان 9 ادام دا اۋرۋحاناعا جاتقىزىلدى. بۇلاردىڭ بارلىعى قازاقستاننىڭ ازاماتتارى. 5 كىسى ەلىمىزدىڭ وزگە وڭىرلەرىنىڭ تۇرعىندارى بولسا, بىرەۋى نۇر-سۇلتاندا ۋاقىتشا تۇرىپ جاتقان, ال ەندى ءبىرى ەلوردا تۇرعىنى.
تۇستەن كەيىن قايتادان شۇعىل حابارلاندىرۋ جاساعان د.احمەتشارىپ ۆيرۋس جۇقتىرعان تاعى 5 ادامنىڭ تىركەلگەنىن جەتكىزدى. ونىڭ 4-ەۋى الماتىدا, 1-ەۋى ەلوردادا انىقتالعان. كەشەگى جاعداي بويىنشا الماتىدا كوروناۆيرۋس جۇقتىرعانداردىڭ سانى 15 ادام بولسا, ەلوردادا 18-گە جەتكەن. جالپى ەلىمىز بويىنشا 33 ناۋقاس تىركەلىپ وتىر.
