قوعام • 17 ناۋرىز، 2020

ۇكىمەت بانكتەرگە نەسيەسىن كەشىكتىرگەندەرگە ءوسىمپۇلداردى ەسەپتەمەۋدى تاپسىردى

353 رەتكورسەتىلدى

الماتىداعى بيزنەس وكىلدەرى ءۇشىن داعدارىستى جاعدايدا ەل ۇكىمەتى قابىلداعان شارالار توپتاماسى بىرقاتار مۇمكىندىكتەرگە جول اشادى.

ۇكىمەت وتىرىسىندا قازاقستان رەسپۋبليكاسىنىڭ پرەمەر-ءمينيسترى اسقار مامين توتەنشە جاعداي كەزىندە تولەمىن كەشىكتىرگەن قارىز الۋشىلارعا ايىپپۇل ەسەپتەلمەيتىندىگىن ايتتى.

داعدارىسقا قارسى شارالار توپتاماسىن بەكىتكەن ۇكىمەت وتىرىسىندا كاسىپكەرلىك پەن وتاندىق ءوندىرىستى قولداۋ شارالارى قارالىپ، ونىڭ بارىسىندا  «بانكتەر قارىز الۋشىلار توتەنشە جاعداي ەنگىزىلگەن كەزدە تولەمدەردىڭ مەرزىمىن وتكىزىپ العان جاعدايدا ايىپپۇلدار مەن ءوسىمپۇلداردى ەسەپتەمەيتىن بولادى. «بارلىق بانكتەر قارجىلىق جاعدايى ناشارلاعان بيزنەس وكىلدەرىنە تولەم  مەرزىمىن ۇزارتۋ مۇمكىندىگىن بەرۋى كەرەك»، — دەپ اتاپ ءوتتى ا. مامين.

بيزنەستى قولداۋ جانە ەڭبەك نارىعىنداعى تۇراقتىلىقتى قامتاماسىز ەتۋ جونىندەگى شۇعىل شارالار توپتاماسى قارجىلاندىرۋدىڭ قولجەتىمدىلىگىن ارتتىرۋدى، كەپىلدىكتەر بەرۋدى، سالىقتىق ىنتالاندىرۋدى، بيزنەستى تەكسەرۋدى ازايتۋدى جانە جۇمىسپەن قامتاماسىز ەتۋدى قامتيدى. اتاپ ايتقاندا، 1 ترلن تەڭگەگە دەيىن نەسيە بەرۋ جانە «قاراپايىم زاتتار ەكونوميكاسى» باعدارلاماسى بويىنشا باسىم تاۋارلار ءتىزىمى كەڭەيتىلەدى، «بجك –  2025» مەملەكەتتىك باعدارلاماسى بويىنشا نەسيەنىڭ جوعارعى شەگى ۇلعايتىلادى جانە سالالىق شەكتەۋلەر الىنىپ تاستالادى، بيزنەستى نەسيەلەندىرۋ كەزىندە كەپىلدىك بەرۋ تەتىگى جەڭىلدەتىلەدى.

ءىرى ساۋدا نىساندارى، كينوتەاترلار، تەاترلار، كورمەلەر، سپورت وبەكتىلەرى زاڭدى تۇلعالار مەن جەكە كاسىپكەرلەر ءۇشىن م ۇلىك سالىعىنان ءبىر جىل مەرزىمگە بوساتىلاتىن بولادى، ءبىر توقسانعا وسىماقى ەسەپتەۋ توقتاتىلادى، 3 توقسان ءۇشىن سالىق ەسەپتىلىگىنىڭ مەرزىمى كەيىنگە اۋىستىرىلاتىن بولادى. جالپى بەلگىلەنگەن تارتىپتە جۇمىس ىستەيتىن جەكە كاسىپكەرلەر سالىقتاردان بوساتىلادى.

وتاندىق بيزنەس قوسىمشا قارجىلىق جۇكتەمەسىز بىرەگەيلەندىرىلگەن شارتتاردا (6%) ارەكەت ەتىپ تۇرعان مەملەكەتتىك باعدارلامالاردىڭ (بيزنەستىڭ جول كارتاسى – 2025، «ەڭبەك»، يدمب-2025، «قاراپايىم زاتتار ەكونوميكاسى» جانە ت. ب.) قولداۋدىڭ جەڭىلدىكتى شارالارىن پايدالاناتىن بولادى.

اوك سالاسىندا نەسيەلەندىرۋدىڭ جاڭا تەتىگى، سونداي-اق ءىرى قارا مال مەن اسىل تۇقىمدى بالاپانداردى قامتيتىن اوك بيولوگيالىق اكتيۆتەرىنىڭ يمپورتىنا ققس-دان بوساتۋ، سونىمەن قاتار 7 مىڭعا جۋىق شارۋانى اۋىل شارۋاشىلىعى ماقساتىنداعى جەرلەرگە سالىق تولەۋدەن بوساتۋ تۇرىندە قوسىمشا سالىقتىق ىنتالاندىرۋلار ەنگىزىلەدى.

«مەملەكەت باسشىسى قاسىم-جومارت كەمەل ۇلى توقاەۆتىڭ تاپسىرماسى بويىنشا ۇكىمەت شاعىن، ورتا جانە ءىرى بيزنەس كاسىپورىندارىن قولداۋدىڭ تەڭدەسسىز شارالارىن قابىلدايدى. بۇل شارالار، ەڭ الدىمەن، قازىرگى جۇمىس ورىندارىن ساقتاۋعا جانە كاسىپكەرلەر مەن ازاماتتاردىڭ ىسكەرلىك بەلسەندىلىگىن ىنتالاندىرۋ ارقىلى جاڭا جۇمىس ورىندارىن قۇرۋعا باعىتتالعان»، - دەدى ا. مامين.

اتالعان جۇمىسقا قازاقستان ازاماتتارىن تارتا وتىرىپ، ينفراقۇرىلىمدىق، الەۋمەتتىك نىسانداردى جانە جەرگىلىكتى ماڭىزى بار جولداردى جوندەۋدى قاراستىراتىن جۇمىسپەن قامتۋدىڭ جول كارتاسىن ىسكە اسىرۋعا 300 ملرد تەڭگە بولىنەدى.

ۇكىمەت باسشىسى ءۇش كۇندىك مەرزىمدە سالالىق مەملەكەتتىك باعدارلامالارعا كاسىپكەرلەردى قولداۋدىڭ جاڭا فورمالارىن ەنگىزۋ بويىنشا قاۋلىلار جوبالارىن دايىنداۋدى تاپسىردى. «مەملەكەت باسشىسىنىڭ جارلىقتارىن ىسكە اسىرۋ ءۇشىن ءبىز سالىق تولەۋشىلەردىڭ جەكەلەگەن ساناتتارى ءۇشىن سالىق مولشەرلەمەلەرىن بەلگىلەۋدىڭ ەرەكشە ءتارتىبىن انىقتاۋ، بيۋدجەتتى قالىپتاستىرۋ مەن ورىنداۋ، مەملەكەتتىك ساتىپ الۋدىڭ ارنايى ءتارتىبىن انىقتاۋ بويىنشا كوپتەگەن شەشىمدەردى قابىلدايمىز. جالپى، كاسىپكەرلىكتى جانە وتاندىق ءوندىرىستى قولداۋدىڭ جاڭا شارالارى 200 مىڭنان استام جاڭا جۇمىس ورنىن اشادى»،- دەدى ا. مامين.

 

الماتى

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار