ءبىلىم • 17 ناۋرىز، 2020

اتا-انالار بالالارىن جەكەمەنشىك دامىتۋ ورتالىقتارىنا دا اپارماۋى ءتيىس

12 رەتكورسەتىلدى

ءبىلىم جانە عىلىم ءمينيسترى اسحات ايماعامبەتوۆ كوروناۆيرۋستىق ينفەكتسيادان قورعاۋ شارالارىن كۇشەيتۋ تۋرالى فەيسبۋك الەۋمەتتىك جەلىسىندە جازباسىن جاريالادى. وندا مەملەكەت باسشىسى قاسىم-جومارت توقاەۆ ۇكىمەتكە حالىقتى كوروناۆيرۋستىق ينفەكتسيادان قورعاۋ شارالارىن كۇشەيتۋدى مىندەتتەدى. پرەزيدەنت تاپسىرماسىن ورىنداۋ اياسىندا ءتيىستى جۇمىس اتقارىلۋدا، دەلىنگەن.

ءبىلىم بەرۋ ۇيىمدارىنا، مينيسترلىككە قاراستى مەكەمەلەردىڭ جۇمىسىنا، پەداگوگتەر مەن وقۋشىلاردىڭ ءوزارا ءىس-قيمىلىنا، وقۋ پروتسەسىن ۇيىمداستىرۋعا قاتىستى تاپسىرمالار كورسەتىلگەن ءبىلىم جانە عىلىم مينيسترلىگىنىڭ ارنايى بۇيرىعى جىبەرىلدى.

تاعى ءبىر مارتە نازار اۋدارۋلارىڭىزدى سۇرايمىز.

  1. مەكتەپكە دەيىنگى ءبىلىم بەرۋ مەكەمەلەرى شتاتتىق رەجيمدە جۇمىس ىستەۋدە. بالاباقشاعا بالالاردى اپارۋ نەمەسە اپارماۋ ماسەلەسى اتا-انالارىنىڭ قالاۋىنا بايلانىستى. كەلمەگەنى ءۇشىن بالاباقشادان شىعارىلمايدى. ياعني، بالاڭىزدى بالاباقشاعا اپارماساڭىز، ورنى ساقتالادى. سوندىقتان، اتا-انالارعا مۇمكىندىگىنشە بۇلدىرشىندەردى ۇيدە قالدىرۋعا كەڭەس بەرەمىز.
  2. 16 ناۋرىزدان باستاپ مەملەكەتتىك قوسىمشا ءبىلىم بەرۋ ۇيىمدارىنىڭ قىزمەتى توقتاتىلدى. وعان وقۋشىلار مەن جاسوسپىرىمدەر سارايى، مۋزىكا، كوركەمسۋرەت، ونەر مەكتەپتەرى جانە ت.ب. جاتادى. قر بعم بالالاردىڭ قۇقىقتارىن قورعاۋ كوميتەتى قازىرگى جاعدايدى ەسكەرە وتىرىپ، اتا-انالارعا بالالارىن جەكەمەنشىك دامىتۋ ورتالىقتارىنا دا اپارماۋعا كەڭەس بەرەدى.
  3. 2020 جىلعى 16 ناۋرىزدان باستاپ 5 ساۋىرگە دەيىن بالالار كوكتەمگى دەمالىستا بولادى. وسى ۋاقىت ارالىعىندا مەكتەپ مۇعالىمدەرى قاشىقتىقتان جۇمىس ىستەيدى. ارىپتەستەرىمىزگە ادىستەمەلىك جانە ساباققا دايىندىق جۇمىستارىن ۇيدە وتىرىپ ورىنداۋعا بولادى. ال مەكتەپ ديرەكتورلارى پەداگوگتەردىڭ قاشىقتىقتان جۇمىس ىستەۋى جانە كانيكۋل كەزىندە اتقارىلاتىن جۇمىس كولەمىنە ساي ايلىقتى تولىق تولەۋ تۋرالى اكتىلەردى قابىلدايدى.

كانيكۋل اياقتالعان سوڭ، قاجەت بولعان جاعدايدا، وقۋشىلاردى قاشىقتىقتان وقىتۋ ءۇشىن دايىندىق جۇمىستارى جۇرگىزىلۋدە. بۇل تۇرعىدا ارنايى توپ اقپاراتتىق جۇيەنى كونتەنتپەن قامتاماسىز ەتۋ، پەداگوگتەردى ۇيرەتۋ، سەرۆيستەردى تەستىلەۋ جانە ت.ب. باعىتتار بويىنشا جۇمىس اتقارۋدا. ۇيىمداستىرۋ جۇمىستارىن 5 ساۋىرگە دەيىن اياقتاۋىمىز قاجەت. ءبىلىم بەرۋ ۇيىمدارىندا بىرنەشە ەلەكتروندى پلاتفورما بار، قارقىندى جۇمىس جۇرگىزىلۋدە.

  1. 16 ناۋرىزدان باستاپ كوللەدجدەر مەن جوو ستۋدەنتتەرى قاشىقتىقتان وقىتۋ تەحنولوگيالارى نەگىزىندە ءبىلىم الۋعا كوشۋدە. وقىتۋ پروتسەسى بەكىتىلگەن وقۋ جۇكتەمەسىنە، جوسپارىنا، باعدارلاماسى مەن كەستەگە ساي جۇرگىزىلەدى.
  2. وقۋ پروتسەسىن ۇيىمداستىرۋ ءۇشىن پەداگوگتەر مەن ستۋدەنتتەرگە ەلەكتروندىق پلاتفورمالارعا كىرۋگە جاعداي جاسالادى. وقىتۋ قۇرالى رەتىندە ۆيدەو-ساباقتار، دەربەس ونلاين-جۇمىس، ونلاين-كۋرستار پايدالانىلادى. بىزدە «Bilimland»، «Google Classroom»، «MOODLE»، «Univer»، «Platonus»، «Canvas»، «Daryn.online» سىندى جاقسى جۇيەلەر بار. سونداي-اق، "Coursera” ءوز كۋرستارىن تەگىن ۇسىندى جانە «ZOOM» وقىتۋ بارىسىندا سەرۆيستى تەگىن پايدالانۋعا جاعداي جاسادى.

جوعارى وقۋ ورىندارى ءۇشىن قاشىقتىقتان وقىتۋ جۇيەسى جاڭاشىلدىق ەمەس ەكەندىگىن ەسكە سالامىز. قر بعم بۇيرىققا قول قويعان ساتتەن باستاپ، ارنايى تەحنولوگيالاردى پايدالانىپ جۇرگەن كەيبىر جوو ونلاين-فورماتتا وقىتۋدى باستاپ كەتتى.

تەحنيكالىق جانە كاسىپتىك ءبىلىم بەرۋ ۇيىمدارىندا قاشىقتىقتان وقىتۋ شامالى كۇردەلى جاقتارى بار.

دەگەنمەن، كوللەدجدەردىڭ باسىم بولىگى ءتيىستى جۇيە بويىنشا جۇمىس ىستەپ كورگەن. قالعاندارى قاتارعا قوسىلۋدا. قازىرگى ۋاقىتتا ارنايى جۇيەلەرگە كونتەنت جۇكتەۋ، واك ەنگىزۋ، سبر بويىنشا ۇلكەن جۇمىس اتقارىلۋدا.

كوللەدجدەر مەن جوعارى وقۋ ورىندارىنىڭ پەداگوگتەرى دە قاشىتىقتان جۇمىس ىستەۋىنە جاعداي جاسالاۋى كەرەك. جوو مەن كوللەدج باسشىلارىنا وسىعان قاتىستى ءتيىستى تاپسىرمالار بەردىم.

  1. جاتاقحانالارعا قاتىستى ساۋالدار جەتكىلىكتى. بيلەت نەمەسە قارجى تاپشىلىعى سىندا ءارتۇرلى جاعدايلارعا بايلانىستى قالادان كەتە المايتىن ستۋدەنتتەر جاتاقحانالاردا تۇرا بەرەدى. بىراق ولار تەك ءوز بولمەلەرىندە بولۋلارى ءتيىس.
  2. پەداگوگتەردىڭ بىلىكتىلىگىن ارتتىرۋ كۋرستارى ونلاين-فورماتتا وتكىزىلەدى. كەيبىر كۋرستاردىڭ وتكىزۋ مەرزىمى اعىمداعى جىلدىڭ ەكىنشى جارتىجىلدىعىنا اۋىستىرىلدى.
  3. جالپى ءبىلىم بەرەتىن پاندەر بويىنشا وقۋشىلاردىڭ رەسپۋبليكالىق وليمپياداسى مەن اۋىل مەكتەپتەرىنە ارنالعان «مىڭ بالا» ۇلتتىق زياتكەرلىك وليمپياداسىنىڭ IV كەزەڭىن جانە باسقا دا كونكۋرستاردى وتكىزۋ مەرزىمدەرى كەيىنگە شەگەرىلدى.
  4. ءبىلىم الۋشىلار مەن تاربيەلەنۋشىلەردىڭ حالىقارالىق سپورتتىق، مادەني، تۋريستىك ءىس-شارالارعا قاتىسۋىنا تىيىم سالىندى. سونداي-اق، بۇقارالىق ءىس- شارالار وتكىزۋگە بولمايدى.
  5. ءبىلىم بەرۋ ۇيىمدارىنا ءبىلىم بەرۋدىڭ بارلىق دەڭگەيلەرى بويىنشا وقۋ پروتسەسىن ۇيىمداستىرۋ جونىندەگى قر بعم-ءنىڭ ادىستەمەلىك ۇسىنىستارى بەرىلدى. قاجەت بولعان جاعدايدا ولار جاڭارتىلىپ وتىرادى.

پاندەميا كەزەڭىندە كەم دەگەندە 15 مەملەكەت مەكتەپتەردى ۋاقىتشا جابۋ تۋرالى شەشىم قابىلداعان. تاعى 14 ەلدىڭ بەلگىلى ءبىر وڭىرلەرىندە ورتا ءبىلىم بەرۋ ۇيىمدارىنىڭ جۇمىسى توقتاتىلدى. وسىلايشا، مەكتەپتەردى ۋاقىتشا جابۋ ماسەلەسى ازيا، ەۋروپا، تاياۋ شىعىس جانە اقش سياقتى مەملەكەتتەردى اينالىپ وتپەدى.

وسىعان بايلانىستى بالالار مەن ستۋدەنتتەرگە ءبىلىم بەرۋ جانە وقۋ پروتسەسىنىڭ ۇزدىكسىز جالعاسۋىن قاداعالاۋ باستى نازارعا الىنىپ وتىر.

بۇل پەداگوگتەر، ءبىزدىڭ ەلدەگى ءبىلىم بەرۋ جۇيەسى ءۇشىن اتا-انالار مەن ءبىلىم الۋشىلاردىڭ بەلسەندى اتسالىسۋى ارقىلى ورىندالاتىن ۇلكەن سىن ءارى ماڭىزدى مىندەت.

 

الماتى

سوڭعى جاڭالىقتار

قىرشىن كەتكەن ساڭلاق

سپورت • بۇگىن، 17:35

ۇقساس جاڭالىقتار