اقپارات جانە قوعامدىق دامۋ ءمينيسترى داۋرەن اباەۆ جەڭىمپازداردى قۇتتىقتاپ, تەلەۆيزيا قىزمەتكەرلەرىنىڭ شىعارماشىلىق ىزدەنىستەرىنە جول اشىپ, سالانىڭ دامۋىنا جانە ءوز ءىسىنىڭ شەبەرلەرى اراسىندا ادال باسەكەلەستىكتىڭ وسۋىنە سەرپىن بەرگەن جوبا ەكەنىن اتاپ ءوتتى. «ۇزدىك دەرەكتى فيلم» اتالىمىنىڭ مۇسىنشەسى «Atameken business» تەلەارناسىنىڭ «كورشىلەر» ءفيلمىنىڭ ۇجىمىنا تابىستالدى. ال «Qazaqstan» تەلەارناسىنىڭ «Ashyq alan» باعدارلاماسى جىلدىڭ ۇزدىك توك-شوۋى اتانسا, «ۇزدىك ويىن-ساۋىق باعدارلاماسى» بويىنشا «حابار» تەلەارناسىنىڭ «Central Asia’s Got Talent» باعدارلاماسى وزىپ شىقتى. «كتك» تەلەارناسىنداعى «بولشيە نوۆوستي» جوباسى «ۇزدىك اقپاراتتىق باعدارلاما» اتاندى. «ۇزدىك الەۋمەتتىك جوبا» مۇسىنشەسى «31 ارنادان» كورسەتىلگەن «اناشىم, ءبىز ۇيدەمىز» باعدارلاماسىنا بەرىلدى. «Gakku» تەلەارناسىنداعى «Bir toqsan» جوباسى «ۇزدىك تەلەۆيزيالىق سەريال» دەپ تانىلدى. سونىمەن بىرگە «الماتى» تەلەارناسى «ۇزدىك وڭىرلىك تەلەارنا» اتالىمىندا جەڭىپ شىقتى. «ۇزدىك تەلەجۋرناليست» اتالىمىندا جۋرناليست, «پەرۆىي كانال ەۆرازيا» تەلەارناسىنىڭ رەداكتورى ولەگ جۋركەۆيچ ماراپاتتالدى. ۆيتالي پوپوۆتىڭ «مير» تەلەارناسىنداعى «تۇركى الەمىنىڭ بەسىگى» جوباسى «ۇزدىك رەجيسسەرلىك جۇمىس» رەتىندە باعالاندى. «ۇزدىك تەلەجۇرگىزۋشى» ساناتىندا «QAZAQSTAN» تەلەارناسىنداعى جاينا جاقسىلىقوۆا جەڭىمپاز دەپ تانىلدى. ايتا كەتەيىك, «تۇمار» ۇلتتىق تەلەۆيزيالىق بايگەسى بيىل كەزەكتى رەت ۇيىمداستىرىلىپ وتىر. جۇلدە قازاقستاندىق تەلەيندۋستريانى ىنتالاندىرۋ ماقساتىندا بەرىلەدى.
ءبىر ايتىپ وتەرلىگى, بايقاۋ تاريحىندا تۇڭعىش رەت قازىلار القاسىنىڭ قۇرامىنا حالىقارالىق دەڭگەيدەگى ساراپشىلار ەندى. ماسەلەن, تەففي سىيلىعىنىڭ يەگەرى, New York Film Academy وقىتۋشىسى, «تۇمار 2020» سىيلىعىنىڭ قازىلار القاسىنىڭ مۇشەسى ەۆگەنيا ۆلاسوۆا «بايقاۋعا قاتىسۋعا ۇسىنىلعان قازاقستاندىق سەريالدار حالىقارالىق دەڭگەيگە شىعا الادى. حابار تاراتۋدىڭ قوس ءتىلى, قوس مادەنيەت, ءارى ءبىر ماقساتقا اسقان جىلدامدىقپەن ۇمتىلعان ءبىر حالىق, ءبىر ەل», دەدى. «تۇمار» ۇلتتىق تەلەۆيزيالىق سىيلىعى 2017 جىلى اقپارات جانە قوعامدىق دامۋ مينيسترلىگىنىڭ باستاماسىمەن تاعايىندالعان.
