كۇنى كەشە نۇر-سۇلتاندا وتكەن كوروناۆيرۋسقا قاتىستى ءباسپاسوز-ءماسليحاتىندا پرەمەر-ءمينيستردىڭ ورىنباسارى ەرالى توعجانوۆ: «ەل ىشىندە جوسپارلانىپ قويعان بىرنەشە جارىس بار ەكەنى بەلگىلى. اتاپ ايتار بولساق, «بارىس» حوككەي كلۋبى قاتىسىپ جاتقان گاگارين كۋبوگى, فۋتبولدان ەل چەمپيوناتى جانە تاعى باسقا جارىستار. دەگەنمەن ويىندار جوسپار بويىنشا وتەدى, بىراق كورەرمەننىڭ بارۋىنا تىيىم سالىنادى. بۇل حالىقارالىق تاجىريبە. بارلىق ەۋروپالىق ەلدەردە ءىرى كوماندالار ويناپ جاتىر, بىراق كورەرمەندەر جوق. بىزدە دە وسىنداي شەشىم قابىلداندى», دەدى.
سونداي-اق قازاقستان فۋتبول فەدەراتسياسى دا فۋتبول, فۋتزال, ايەلدەر فۋتبولى, بالالار مەن جاسوسپىرىمدەر, بۇقارالىق فۋتبول, ارداگەرلەر اراسىنداعى جارىستاردى, سونىمەن قاتار ءبىلىم بەرۋ سەمينارلارى مەن ءارتۇرلى فورۋمداردى وتكىزۋدى توقتاتۋ جونىندە شەشىم قابىلدادى.
قازىرگى تاڭدا شەتەلدە جارىستا جۇرگەن وتانداستارىمىز دا ەلگە ورالىپ جاتىر. قازاقستاننىڭ ۇلتتىق وليمپيادا كوميتەتىنىڭ تاراتقان اقپاراتى بويىنشا, ساداق اتۋدان قازاقستان قۇراماسى تايلاندتىڭ بانگكوك قالاسىندا ءوتىپ جاتقان ازيا كۋبوگىنىڭ فينالدىق كەزەڭىنە قاتىسپاي, ەلگە ورالادى. جەرلەستەرىمىزدەن ديانا ماكارچۋك التىن, اقبارالى قاراباەۆ قولا جۇلدەگە تالاسۋى ءتيىس ەدى. ال كوماندالىق ارالاس سىندا قازاقستاندىقتار فينالعا جولداما العان بولاتىن. سونىمەن قاتار حالىقارالىق تەننيس فەدەراتسياسى قازاقستان مەن ارگەنتينا اراسىنداعى فەدەراتسيا كۋبوگىنىڭ پلەي-وفف ويىندارىن بەلگىسىز مەرزىمگە شەگەردى. اتالعان جارىس 17-18 ساۋىرگە جوسپارلانعان ەدى.
كوروناۆيرۋس ينفەكتسياسىنىڭ تارالۋىنىڭ الدىن الۋ جانە ساقتىق شاراسىن ۇدەتۋ ماقساتىندا دزيۋدودان شەتەلدە جانە قازاقستاندا وتەتىن بىرقاتار جارىس كەيىنگە شەگەرىلدى. ال حالىقارالىق دزيۋدو فەدەراتسياسى وليمپيادالىق تسيكلدى تاعى ءبىر ايعا سوزدى. IJF كۇنتىزبەسىندەگى سوڭعى وزگەرتۋلەردە وليمپيادالىق تسيكل 30 ماۋسىمعا دەيىن سوزىلعان. ال قۇرلىقتىق جارىستار, جاسوسپىرىمدەر مەن جاستار اراسىنداعى تۋرنيرلەر 30 ساۋىرگە دەيىن وتپەيدى. تاەكۆوندودان قازاقستان قۇراماسى بەلگيادا وتەتىن رەيتينگتىك «Belgian Open G-2» تۋرنيرىنە قاتىسپايتىن بولدى. ال ساۋىردە يوردانيادا جوسپارلانعان تاەكۆوندودان ازيا ايماقتىق وليمپياداعا ىرىكتەۋ ءتۋرنيرى دە كەيىنگە قالۋى مۇمكىن. فريستايل-موگۋلدان يدرە فەللە (شۆەتسيا) ايماعىندا جوسپارلانعان الەم كۋبوگىنىڭ سوڭعى كەزەڭى وتپەيتىن بولدى. بۇل تۋرالى حالىقارالىق شاڭعى سپورتى (FIS) تۇرلەرى فەدەراتسياسى حابارلادى. بۇل قازاقستانداعى جانە قازاقستاندىق سپورتشىلار قاتىساتىن جارىستار. ال شەتەلدەگى ىشكى جارىستار ساۋىرگە دەيىن وتپەيتىن بولدى.
اتاپ ايتار بولساق, فۋتبولدان ەۋروپاداعى توپ-5 چەمپيونات ماتچتارى توقتاتىلدى. يتاليا چەمپيوناتى 9 ناۋرىزدان 3 ساۋىرگە, يسپانيا چەمپيوناتى 12 ناۋرىزدان 2 اپتاعا, سونىمەن قاتار فرانتسيا مەن انگليا بىرىنشىلىگى دە 4 ساۋىرگە دەيىن توقتاتىلدى. ال بۋندەسليگا كوماندالارى ازىرشە بۇل اپتا دەمالادى.
17-18 ناۋرىزدا ءوتۋى كەرەك بولعان چەمپيوندار ليگاسىنداعى «مانچەستەر سيتي» – «رەال», «يۋۆەنتۋس» – «ليون», «باۆاريا» – «چەلسي», «بارسەلونا» – «ناپولي» ويىندارى بەلگىسىز ۋاقىتقا اۋىستىرىلدى. ەۋروپا ليگاسىنداعى «سەۆيليا» – «روما» جانە «ينتەر» – «حەتافە» ماتچتارى دا كەيىنگە شەگەرىلدى.
باسقا سپورت تۇرلەرىنەن ۇلتتىق حوككەي ليگاسى 12 ناۋرىزدا, 11 ناۋرىزدا ۇلتتىق باسكەتبول ليگاسىنىڭ ويىندارى توقتاتىلدى. تەننيستەن ATP جارىستارى 12 ناۋرىزدان باستاپ 6 اپتاعا دەيىن, ITF – 20 ساۋىرگە دەيىن شەگەردى. سۋ پولوسى بويىنشا وليمپياداعا ىرىكتەۋ ءتۋرنيرى مامىرعا, ساۋىردە ماسكەۋدە ءوتۋى كەرەك بولعان اۋىر اتلەتيكادان ەۋروپا چەمپيوناتى شىلدەگە قالدىرىلدى.
بيىل جاز ايىندا ءوتۋى كەرەك بولعان فۋتبولدان ەۋروپا چەمپيوناتىنىڭ تاعدىرى ەرتەڭ بەلگىلى بولادى. ال توكيو وليمپياداسى مەن ساۋىردە وتەتىن حابيب نۋرماگومەدوۆ پەن توني فەرگيۋسون اراسىنداعى UFC 249 جەكپە-جەگىنىڭ تاعدىرى ۋاقىت ەنشىسىنە قالدىرىلدى.
ال «يۋۆەنتۋس» قورعاۋشىسى دانيەلە رۋگاني 11 ناۋرىز كۇنى كوروناۆيرۋس ينفەكتسياسىنا شالدىققان العاشقى فۋتبولشى رەتىندە تىركەلدى. سونىمەن قاتار اپل كلۋبتارىنىڭ ءبىرازىنان كوروناۆيرۋس بەلگىلەرى انىقتالدى. «لەستەر» باس باپكەرى كومانداسىنداعى ءۇش ويىنشىدان كوروناۆيرۋس تابىلعانىن مالىمدەدى. «چەلسي» شابۋىلشىسى كاللۋم حادسون-ودوي مەن «ارسەنال» كلۋبىنىڭ باس باپكەرى ميكەل ارتەتادا ۆيرۋس انىقتالعان. «ەۆەرتون» جانە «بورنمۋت» كلۋبىنىڭ ءبىر-ءبىر فۋتبولشىسىنان كوروناۆيرۋس تابىلعان. قازىرگى تاڭدا بۇل كلۋبتار كارانتينگە جابىلعان.
