«قۇرمەتتى قازاقستاندىقتار, وتكەن تاۋلىك ىشىندە ەلىمىزدە كوروناۆيرۋستىق ينفەكتسيا جۇقتىرۋدىڭ جاڭا وقيعاسى تىركەلگەن جوق. جالپى جۇقتىرعاندار سانى - 4 ادام. ولار دارىگەرلەردىڭ قاتاڭ باقىلاۋىندا. ناۋقاستارمەن بايلانىستا بولعان ازاماتتار انىقتالىپ, باقىلاۋعا الىندى» دەلىنگەن دەنساۋلىق مينيسترلىگىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى تاراتقان اقپاراتتا.
سونداي-اق مينيسترلىك رەسپۋبليكا بويىنشا COVID-19 ۆيرۋسىنىڭ الدىن الۋ جانە وعان قارسى كۇرەس جونىندەگى ءىس-شارالار تولىق كولەمدە جالعاساتىنىن ايتتى.
ەسكە سالساق, كەشە دەنساۋلىق ساقتاۋ ءمينيسترى گەرمانيادان كەلگەن ەكى ازاماتتان كوروناۆيرۋس انىقتالعانىن مالىمدەگەن.
كەيىنىرەك يتاليانىڭ ميلان قالاسىنان نۇر-سۇلتانعا 12 ناۋرىز كۇنى ۇشىپ كەلگەن قازاقستان ازاماتىنىڭ ىندەتكە شالدىققانى ايتىلدى.
ال ءتورتىنشى ناۋقاس تۋرالى دەنساۋلىق ساقتاۋ مينيسترلىگىنىڭ رەسمي وكىلى دياس احمەتشارىپ «قازاقستان» تەلەارناسىنداعى «اشىق الاڭ» باعدارلاماسىندا ايتتى. ول ازامات تا گەرمانيادان كەلگەن ۇشاقتىڭ ىشىندە بولعان.
